ອິດສະລາແອນໂຈມຕີທາງອາກາດ ພື້ນທີ່ອຸດສາຫະກໍາທາງຕາເວັນຕົກຊີຣີ

      ຊີຣີກ່າວວ່າ: ອິດສະລາແອນໂຈມຕີທາງອາກາດພື້ນທີ່ອຸດສາຫະກໍາຢູ່ພາກຕາເວັນຕົກຂອງປະເທດ ຖືເປັນການໂຈມຕີຄັ້ງທີສອງພາຍໃນອາທິດດຽວ.

     ສໍານັກຂ່າວແຫ່ງຊາດຊີຣີ (ຊານາ) ລາຍງານວ່າ: ກອງທັບອິດສະລາແອນປະຕິບັດການໂຈມຕີທາງອາກາດໂຈມຕີພື້ນທີ່ອຸດສາຫະກໍາ ຢູ່ເມືອງຮາສຊີ ແຂວງຮອມ ທາງຕາເວັນຕົກຂອງປະເທດ ຕອນຮຸ່ງເຊົ້າຂອງວັນທີ 10 ຕຸລາ ຕາມເວລາທ້ອງຖິ່ນ.

      ລາຍງານລະບຸຕໍ່ໄປວ່າ: ການໂຈມຕີທີ່ເກີດຂຶ້ນນອກຈາກສ້າງຄວາມເສຍຫາຍໃຫ້ແກ່ໂຮງງານແລ້ວ, ຍານພາຫະນະຫລາຍຄັນທີ່ບັນທຸກຢາ ແລະ ສິ່ງຂອງບັນເທົາທຸກ ໄດ້ຮັບຄວາມເສຍຫາຍຫລາຍຄັນ.

      ການເຄື່ອນໄຫວດັ່ງກ່າວຂອງອົງກອນສັງເກດການດ້ານສິດທິມະນຸດຊີຣີ (SOHR) ລາຍງານວ່າ: ກອງທັບອິດສະລາແອນປະຕິບັດການໂຈມຕີທາງອາກາດ ທໍາລາຍອາຄານຫລັງໜຶ່ງໃນນະຄອນຫລວງດາມັດກັດ ເຊິ່ງເຊື່ອວ່າເປັນຖານປະຕິບັດການຂອງກຸ່ມແຮັດໂບລາ ແລະ ກອງກໍາລັງພິທັກປະຕິວັດອີຣານ (IRGC) ໃນວັນທີ 9 ຕຸລາຜ່ານມາ.

     ທັງນີ້, SOHR ຢືນຢັນຜູ້ເສຍຊີວິດຈາກເຫດການດັ່ງກ່າວຢ່າງໜ້ອຍ 9 ຄົນ ໃນຈໍານວນນີ້ຢ່າງໜ້ອຍ 5 ຄົນເປັນພົນລະເຮືອນ ແລະ ຜູ້ເສຍຊີວິດຢ່າງໜ້ອຍ 2 ຄົນເປັນຊາວຕ່າງປະເທດ ເຊິ່ງແຫລ່ງຂ່າວໃນສະຖານເອກອັກຄະລັດຖະທູດອີຣານກ່າວວ່າ: ບໍ່ມີຜູ້ເສຍຊີວິດຄົນໃດຈາກເຫດການໂຈມຕີຄັ້ງນີ້ທີ່ເປັນຊາວອີຣານ.

      ສ່ວນອິດສະລາແອນຍັງບໍ່ມີຄວາມເຫັນຢ່າງເປັນທາງການກ່ຽວກັບເຫດການທີ່ເກີດຂຶ້ນ. ຂະນະທີ່ກະຊວງການຕ່າງປະເທດຊີຣີອອກຖະແຫລງການປະນາມອິດສະລາແອນ ແລະ ຮຽກຮ້ອງປະຊາຄົມສາກົນຮ່ວມກັນຫາທາງຢຸດຢັ້ງອິດສະລາແອນຈາກການດຶງໃຫ້ພາກພື້ນຕາເວັນອອກກາງຜະເຊີນການຜະເຊີນໜ້າ ແລະ ຈະມີຜົນກະທົບຮ້າຍແຮງ.