ຜູ້ສັນຈອນຍັງບໍ່ໃຫ້ການຮ່ວມມືຕໍ່ການປະຕິບັດງານຂອງເຈົ້າໜ້າທີ່ຈະລາຈອນໄລຍະບຸນຊ່ວງເຮືອທ່າວັດຈັນ 2024
ພັທ ສຸລິຍາ ພັນທະບູນ ວ່າການກອງຮ້ອຍຕຳຫລວດຈະລະຈອນ ເມືອງຈັນທະບູລີ ນະຄອນຫລວງວຽງຈັນ ລາຍງານສະພາບການສັນຈອນໄລຍະງານບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ປະຈຳປີ 2024 ທີ່ທ່າວັດຈັນ ລະຫວ່າງ 15-18 ຕຸລາ ນີ້ວ່າ: ການປ້ອງກັນບຸນປະເພນີດັ່ງກ່າວແມ່ນໄດ້ບັນຈຸກໍາລັງໃສ່ທັງ ຈຸດວົງໃນ ແລະ ວົງນອກ; ໄດ້ນຳໃຊ້ກໍາລັງຈະລາຈອນທັງໝົດຫຼາຍກວ່າ 300ຄົນ.
ໃນຈຳນວນນີ້ໄດ້ປະຕິບັດໜ້າທີ່ວຽກງານຕາມເສັ້ນທາງດອນຈັນແຄມຂອງແຕ່ວົງວຽນປາກປ່າສັກ ຫາສາມແຍກສວນເຈົ້າອານຸວົງ; ໄຟແດງໂຮງໝໍມະໂຫສົດ ຮອດໄຟແດງກະຊວງແຜນການ ແລະ ການລົງທຶນ; ຖະໜົນເຈົ້າຟ້າງຸ່ມ ແລະ ເສັ້ນທາງຂຸນບູລົມ ນັບແຕ່ວົງວຽນປາກປ່າສັກ ຫາໄຟແດງຫລັກ 1 ສີຫອມ ແລະ ແຕ່ໄຟແດງຫລັກ 1 ສີຫອມ ຫາ ຫໍຄໍາ ເພື່ອອຳນວຍຄວາມສະດວກໃຫ້ປະຊາຊົນຜູ້ມາທ່ຽວບຸນ.
ຜ່ານການປະຕິບັດວຽກງານແຕ່ວັນທີ 15 ເປັນຕົ້ນມາ, ເຫັນວ່າການປະຕິບັດຕາມແຈ້ງການໃນການປິດທາງແຕ່ 6:00 ໂມງເຊົ້າ ຫາ 24:00 ໂມງ ເຫັນວ່າ ຜູ້ໃຊ້ລົດໃຊ້ຖະໜົນຈຳນວນຫຼາຍຍັງບໍ່ໄດ້ໃຫ້ການຮ່ວມມືຕໍ່ການປະຕິບັດງານຂອງເຈົ້າໜ້າທີ່ເທົ່າທີ່ຄວນ, ເຮັດໃຫ້ການສັນຈອນໄປມາຫຍຸ້ງຍາກສັບສົນຫຼາຍ ເຊິ່ງເຈົ້າໜ້າທີ່ກໍໄດ້ສຶກສາອົມຮົມ ແນະນໍາໃຫ້ຜູ້ຂັບຂີ່ ຮັບຮູ້ເຖິງການສັນຈອນໄປ-ມາ. ທັງນີ້ກໍເພື່ອອໍານວຍຄວາມສະດວກຂອງທຸກຄົນຜູ້ໃຊ້ລົດໃຊ້ຖະໜົນທີ່ມາທ່ຽວບຸນໃນປີນີ້ມີຄວາມສະດວກ ແລະ ປອດໄພ ຫລຸດຜ່ອນການເກີດອຸປະຕິເຫດ.
