ແຂວງອັດຕະປື ຕ້ອງການພະນັກງານ ແພດໝໍ ເພີ່ມຕື່ມຢ່າງໜ້ອຍ 300 ກວ່າຄົນຈຶ່ງຈະພຽງພໍກັບຄວາມຕ້ອງການ

ວັນທີ 22 ຕຸລາ 2024 ນີ້ ຂ່າວສານອັດຕະປືລາຍງານ ກ່ຽວກັບການຈັດສັນ ໂກຕາລັດຖະກອນ ທີ່ເປັນແພດໝໍຂອງຫົວໜ້າພະແນກສາທາລະນະສຸກແຂວງ ວ່າ: ໄລຍະຜ່ານມາແມ່ນອີງໃສ່ຕາໜ່າງການບໍລິການສຸຂະພາບແຕ່ລະຂັ້ນດ້ວຍການຈັດບູລິມະສິດໃຫ້ເຂດຫ່າງໄກສອກຫຼີກໃຫ້ພຽງພໍຂັ້ນພື້ນຖານ ຕາມມາດຕະຖານຂອງກະຊວງສາທາລະນະສຸກ ແຕ່ບັນຫາທີ່ ກະທົບຕໍ່ການປະຕິບັດໜ້າທີ່ການເມືອງ ແມ່ນຈໍານວນພະນັກງານ ແພດໝໍ ພະຍາບານບໍ່ພຽງພໍທາງດ້ານປະລິມານ ແລະ ຄຸນນະພາບ.

ປັດຈຸບັນ ແຂວງອັດຕະປືມີ ແພດ-ໝໍທັງໝົດ 514 ຄົນ, ເພື່ອໃຫ້ພຽງພໍ ແລະ ຮອງຮັບການບໍລິການໃຫ້ມີຄຸນນະພາບຕ້ອງບັນຈຸຕື່ມອີກຈໍານວນ 339 ຄົນ ຈຶ່ງຈະບັນຈຸຊັບຊ້ອນພຽງພໍຕາມຕໍາແໜ່ງງານໃນແຕ່ລະຂັ້ນຄື: ພະແນກສາທາລະນະສຸກ ຕ້ອງການເພີ່ມ 21 ຄົນ, ໂຮງໝໍແຂວງ 171 ຄົນ, ໂຮງຮຽນແພດ 8 ຄົນ, ເມືອງສາມັກຄີໄຊ 29 ຄົນ, ເມືອງສະໜາມໄຊ 37 ຄົນ, ສາທາເມືອງຊານໄຊ 3 ຄົນ, ເມືອງພູວົງ 6 ຄົນ ແລະ ສຸກສາລາທົ່ວແຂວງ 33 ແຫ່ງ ຕ້ອງການບັນຈຸເພີ່ມ 64 ຄົນ.

ທ່ານ ອິນປັນ ອິນທິລາດ ຫົວໜ້າພະແນກສາທາລະນະສຸກ ແຂວງອັດຕະປື ໃຫ້ຮູ້ຕື່ມວ່າ: ເພື່ອໃຫ້ພຽງພໍຕໍ່ການຮັບໃຊ້ບໍລິການປະຊາຊົນ ແຕ່ການສະໜອງມີຈຳກັດໃນແຕ່ລະປີ ທາງກະຊວງສາທາລະນະສຸກ ຮ່ວມກັບ ພະແນກສາທາແຂວງ ໄດ້ຈັດສັນໂຄຕາໃຫ້ສຸກສາລາ ຢູ່ເຂດຫ່າງໄກສອກຫຼີກໃຫ້ພຽງພໍ ບົນພື້ນຖານຢ່າງໜ້ອຍ 3 ຄົນ. ໃນຕົວຈິງບາງແຫ່ງ ມີແພດປິ່ນປົວ 2 ຄົນ, ພະຍາບານ 1 ຫຼື 2 ຄົນ, ຜະດຸງຄັນ 1 ຄົນ ບາງແຫ່ງກໍບໍ່ມີຜະດຸງຄັນ, ເຊິ່ງກຳລັງຈັດສັນ ຫຼື ສັບປ່ຽນພະນັກງານອາສາສະໝັກ, ພະນັກງານຢູ່ຂັ້ນເມືອງ ລົງໄປຊ່ວຍເປັນໄລຍະ, ສ່ວນການຈັດສັນໂຄຕາລັດຖະກອນ ແຕ່ປີ 2021-2024 ແມ່ນກະຊວງສາທາລະນະສຸກ ເປັນຜູ້ຈັດສັນໃຫ້ ໂດຍອີງຕາມວິຊາສະເພາະທີ່ຍັງຂາດ ແລະ ຈໍານວນທີ່ຍັງບໍ່ພໍຕາມມາດຕະຖານ ຕາມການເກັບກຳຂໍ້ມູນ ແລະ ຖານຂໍ້ມູນຕົວຈິງ ທີ່ມີລະບົບຕິດຕາມທາງອອນລາຍ ແລະ ທາງພະແນກສາທາລະນະສຸກແຂວງ ເປັນຜູ້ຈັດການສອບເສັງຄັດເລືອກເອົາບຸກຄະລາກອນເຂົ້າໃສ່ຕາມວິຊາສະເພາະ, ສ່ວນສະຖານທີ່ບັນຈຸ ແມ່ນກະຊວງສາທາລະນະສຸກ ເປັນຜູ້ລະບຸມາເທົ່ານັ້ນ ບໍ່ສາມາດປ່ຽນແປງໄດ້.

ທີ່ມາ: ຂ່າວສານອອນລາຍ ອັດຕະປື