ສິງກະໂປຢຸດການຄ້າກັບ ສປປ ເກົາຫລີ
ສິງກະໂປຢຸດການພົວພັນທາງການຄ້າກັບ ສປປ ເກົາຫລີ ຕາມມາດຕະການຂວ້ຳບາດຂອງສະຫະປະຊາຊາດ (ສປຊ) ທີ່ລົງໂທດ ສປປ ເກົາຫລີ ຮຸນແຮງຂຶ້ນ ເພາະຍັງເດີນໜ້າໂຄງການລູກສອນໄຟ ແລະ ນິວເຄຼຍ.
ກົມພາສີສິງກະໂປສົ່ງໜັງສືແຈ້ງເຖິງຜູ້ຄ້າ ແລະ ຕົວແທນໃນວັນທີ 14 ພະຈິກວ່າ: ສິງກະໂປຈະຫ້າມນຳເຂົ້າ ຫລື ສົ່ງອອກສິນຄ້າກັບ ສປປ ເກົາຫລີ ມີຜົນແຕ່ວັນທີ 18 ພະຈິກ ຜູ້ກະທຳຜິດຊ້ຳຈະຖືກລົງໂທດປັບໄໝສູງສຸດ 200.000 ໂດລາສິງກະໂປ ຫລື 4 ເທົ່າຂອງມູນຄ່າສິນຄ້າ ຫລື ຈຳຄຸກສູງສຸດ 3 ປີ ຫລື ທັງປັບໄໝທັງຈຳຄຸກ. ສິງກະໂປອອກປະກາດນີ້ພາຍຫລັງສອງເດືອນກ່ອນ ອາເມລິກາໄດ້ລົງໂທດບຸກຄົນ ແລະ ນິຕິບຸກຄົນຈຳນວນໜຶ່ງທີ່ກ່ຽວຂ້ອງກັບ ສປປ ເກົາຫລີ ໃນຈຳນວນນີ້ມີນິຕິບຸກຄົນ 2 ແຫ່ງທີ່ຕັ້ງຢູ່ສິງກະໂປລວມຢູ່ນຳ.
ນອກຈາກສິງກະໂປທີ່ເປັນຄູ່ຄ້າອັນດັບ 7 ຢຸດການຄ້າກັບ ສປປ ເກົາຫລີ ແລ້ວ, ຟີລິບປິນທີ່ເປັນຄູ່ຄ້າອັນດັບ 5 ກໍໄດ້ຢຸດການຄ້າກັບ ສປປ ເກົາຫລີ ໄປແລ້ວໃນເດືອນກັນຍາ ເພື່ອປະຕິບັດຕາມມະຕິລົງໂທດ ສປປ ເກົາຫລີ ຂອງ ສປຊ, ພາຍຫລັງ ສປປ ເກົາຫລີ ທົດລອງລູກສອນໄຟຫລາຍຄັ້ງໃນປີນີ້ ແລະ ທົດລອງນິວເຄຼຍຄັ້ງທີ 6 ເຊິ່ງເປັນຄັ້ງໃຫຍ່ທີ່ສຸດໃນເດືອນກັນຍາ. ສິງກະໂປເຕືອນພົນລະເມືອງໃນເດືອນນັ້ນໃຫ້ຫລີກເວັ້ນການເດີນທາງທີ່ບໍ່ຈຳເປັນໄປ ສປປ ເກົາຫລີ, ສິງກະໂປມີການພົວພັນທາງການທູດກັບ ສປປ ເກົາຫລີ ແຕ່ບໍ່ມີສະຖານທູດ. ຂະນະທີ່ ສປປ ເກົາຫລີ ມີສະຖານທູດຢູ່ເຂດການເງິນຂອງສິງກະໂປ. ທ່ານ ວິວຽນ ບາລາກລືນັນ ລັດຖະມົນຕີຕ່າງປະເທດສິງກະໂປ ກ່າວກັບສື່ມວນຊົນໃນປະເທດເດືອນພຶດສະພາວ່າ: ຍັງບໍ່ພ້ອມຕັດການພົວພັນທາງການທູດທັງໝົດກັບ ສປປ ເກົາຫລີ.
