ໄລຍະ 10 ເດືອນ 2024 ມີຄະດີຢາເສບຕິດ 3,395 ເລື່ອງ ຈັບຜູ້ຕ້ອງຫາໄດ້ 5,000 ກວ່າຄົນ ຢຶດຢາບ້າໄດ້ 81 ລ້ານກວ່າເມັດ

ທ່ານ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ລາຍງານຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະແຕ່ເດືອນ 1-10 ປີ 2024 ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ວັນທີ 20 ພະຈິກ 2024 ວ່າ: ວຽກງານແກ້ໄຂບັນຫາຢາເສບຕິດມີຜົນສໍາເລັດ ນັບແຕ່ເດືອນ 1-10 ປີ 2024 ໃນຂອບເຂດທົ່ວປະເທດ ສາມາດແກ້ໄຂມ້າງລາຍຄະດີຢາເສບຕິດ ໄດ້ທັງໝົດ 3,395 ເລື່ອງ, ຈັບຜູ້ຖືກຫາໄດ້ 5,168 ຄົນ/ຍິງ 505 ຄົນ, ຕ່າງປະເທດ 199 ຄົນ/ຍິງ 19 ຄົນ.

ຍຶດເຮໂຣອິນ 380.96 ກິໂລກຣາມ, ຢາບ້າ 81,030,733 ເມັດ ນໍ້າໜັກ 8,103.07 ກິໂລກຣາມ, ຢາໄອສ໌ 4,816.17 ກິໂລກຣາມ, ຢາຝິ່ນ 84,86 ກິໂລກຣາມ, ຄັນຊາ 3,583.24 ກິໂລກຣາມ, ເຄຕາມິນ 33,14 ກິໂລ ກຣາມ, ຢາອີ 2,584 ເມັດ ກັບ 61,44 ກິໂລກຣາມ, ໂຄເຄນ 0,99 ກິໂລກຣາມ, ແປ້ງຝຸ່ນ 10,092.84 ກິໂລ ກຣາມ, ສານເຄມີ 101 ຖັງ, ລົດໃຫ່ຍ 77 ຄັນ, ລົດຈັກ 480 ຄັນ, ປືນ 10 ກະບອກ, ລູກປືນ 1,677 ລູກ.

ປັດຈຸບັນ, ສາມາດສ້າງບ້ານປອດຢາເສບຕິດ ໄດ້ 3,222 ບ້ານ, ສ້າງບ້ານຄູ່ຂະໜານສີຂາວປອດຢາເສບຕິດ ໄດ້ 20 ບ້ານ (ກັບປະເທດໄທ ໄດ້ 17 ບ້ານ, ກັບປະເທດ ກຳປູເຈຍ ໄດ້ 3 ບ້ານ); ສ້າງບ້ານປອດຄະດີ ໄດ້ 2,899 ບ້ານ; ສ້າງໂຮງຮຽນ ສະຖາບັນການສຶກສາປອດຢາເສບຕິດ ໄດ້ 9,163 ໂຮງຮຽນ; ສ້າງສະຖານທີ່ປອດຢາເສບຕິດ ໄດ້ 38 ກົມກອງ/ຂະແໜງການ; ໄດ້ສ້າງຫ້ອງການປະສານງານຊາຍແດນເພື່ອຄວບຄຸມຢາເສບຕິດ (BLO) 24 ແຫ່ງ, ສູນປະສານງານແມ່ນ້ຳຂອງປອດໄພ ແລະ ສູນປະສານງານແມ່ນ້ຳຂອງ-ແມ່ນ້ຳລ້ານຊ້າງ 1 ແຫ່ງ ເພື່ອເປັນບ່ອນແລກປ່ຽນຂໍ້ມູນ-ຂ່າວສານການສະກັດກັ້ນບັນຫາຢາເສບຕິດຮ່ວມກັນ; ສ້າງຈຸດສະກັດກັ້ນກວດກາຢາເສບຕິດຂຶ້ນຢູ່ 4 ແຂວງຄື: ແຂວງບໍ່ແກ້ວ, ຫຼວງນ້ຳທາ, ອຸດົມໄຊ ແລະ ບໍລິຄໍາໄຊ ລວມທັງໝົດ 6 ຈຸດ.