ລັດຖະບານ ເລັ່ງຊອກສາເຫດນັກທ່ອງທ່ຽວຕ່າງປະເທດ ເສຍຊີວິດຢູ່ເມືອງວັງວຽງ ແລະ ສັ່ງປິດເຮືອນພັກຈຸດເກີດເຫດ
ສຳນັກຂ່າວສານປະເທດລາວ ລາຍງານວັນທີ 23 ພະຈິກ 2024 ນີ້ວ່າ: ຕໍ່ເຫດການນັກທ່ອງທ່ຽວຕ່າງປະເທດ ເສຍຊີວິດຢູ່ເມືອງວັງວຽງ ແຂວງວຽງຈັນ ປັດຈຸບັນ ອຳນາດການປົກຄອງ ເມືອງວັງວຽງ ແຂວງວຽງຈັນ ໄດ້ສົມທົບກັບກະຊວງ, ກົມ, ອົງການ ແລະ ພາກສ່ວນທີ່ກ່ຽວຂ້ອງ ລົງຊຸກຍູ້, ຕິດຕາມ, ກວດກາ ເຊິ່ງສາເຫດໃນເບື້ອງຕົ້ນ ອາດເກີດຍ້ອນດື່ມເຄື່ອງດື່ມ ທີ່ມີສານພິດເຈືອປົນ ແລະ ບັນຫາອື່ນໆ ຢູ່ເຮືອນພັກ NANA Backpacker Hostel ໃນວັນທີ 12 ພະຈິກ 2024 ຜ່ານມາ, ເຮັດໃຫ້ມີຜູ້ເສຍຊີວິດ 3 ຄົນ. ໃນນັ້ນ, ຜູ້ທີ 1 ເສຍຊີວິດກັບທີ ຢູ່ເຮືອນພັກດັ່ງກ່າວ ແລະ ອີກ 2 ຄົນ, ມີອາການສາຫັດ ໄດ້ສົ່ງໄປປິ່ນປົວຢູ່ໂຮງໝໍ ສູນກາງ ຢູ່ນະຄອນຫລວງວຽງຈັນ ຫລັງຈາກນັ້ນ, ກໍໄດ້ເສຍຊີວິດ ໃນເວລາຕໍ່ມາ ສ່ວນສາເຫດຂອງການເສຍຊີວິດຕົວຈິງນັ້ນ, ພາກສ່ວນທີ່ກ່ຽວຂ້ອງຂັ້ນເມືອງ, ແຂວງ ໄດ້ສົມທົບກັບ ສູນກາງ ຊອກຄົ້ນຫາຂໍ້ມູນຕ່າງໆທີ່ຍັງບໍ່ທັນຈະແຈ້ງ ກ່ຽວກັບເຫດການ ການເສຍຊີວິດ ຕິດພັນກັບການ ເຈັບປ່ວຍ ຂອງຄົນຕ່າງປະເທດ ໃນຄັ້ງນີ້ ໃຫ້ມີຄວາມຊັດເຈນໂດຍໄວ ບົນພື້ນຖານຂອງການກວດກາ, ຢັ້ງຢືນຜົນຂອງການວິໄຈ ທາງດ້ານວິທະຍາສາດ ເພື່ອລາຍງານລັດຖະບານ ແລະ ໃຫ້ກະຊວງການຕ່າງປະເທດ ຊີ້ແຈງຕໍ່ຕ່າງປະເທດ ຢ່າງເປັນທາງການ.
ທ່ານ ບຸນຈັນ ມາລາວົງ ເຈົ້າເມືອງວັງວຽງ ໃຫ້ສຳພາດຕໍ່ສື່ມວນຊົນ ວ່າ: ເບື້ອງຕົ້ນ ໄດ້ແນະນຳໃຫ້ຫ້ອງການທີ່ກ່ຽວຂ້ອງ ປະສານສົມທົບກັນແຈ້ງປິດກິດຈະການ ການບໍລິການ ຢູ່ເຮືອນພັກດັ່ງກ່າວ. ພ້ອມກັນນັ້ນ, ກໍໄດ້ໃຫ້ພາກສ່ວນທີ່ກ່ຽວຂ້ອງ ສືບຕໍ່ເກັບກຳຂໍ້ມູນ ແລະ ບັນຫາຕ່າງໆທີ່ພົວພັນເຖິງການເຈັບປ່ວຍ ກໍຄື ການເສຍຊີວິດຂອງນັກທ່ອງທ່ຽວ ເພື່ອຊອກຫາສາເຫດ ທີ່ຊັດເຈນ. ຕໍ່ກັບສະພາບ ແລະ ເຫດການ ທີ່ເກີດຂຶ້ນ ແມ່ນມີຜົນກະທົບ ແລະ ສ້າງພາບພົດ ທີ່ບໍ່ດີຕໍ່ການຄຸ້ມຄອງ ກໍຄື ການທ່ອງທ່ຽວຂອງ ສປປ ລາວ ໂດຍສະເພາະ ແມ່ນການທ່ອງທ່ຽວ ຢູ່ເມືອງວັງວຽງ ແຂວງວຽງຈັນ ເຊິ່ງມີຫລາຍປັດໄຈ ແລະ ສາເຫດ ຕ້ອງໄດ້ພິຈາລະນາແກ້ໄຂ ໃນສະເພາະໜ້າ ແລະ ຍາວນານ ໃຫ້ເປັນລະບົບກົມກຽວກັນ ເປັນຕົ້ນ ຈະດໍາເນີນມາດຕະການຕາມລະບຽບກົດໝາຍ ຕໍ່ຫົວໜ່ວຍທຸລະກິດ, ຜູ້ປະກອບການ ທີ່ມີສ່ວນພົວພັນໃນການບໍລິການ ອາຫານ ແລະ ເຄື່ອງດື່ມ ເປັນເຫດໃຫ້ຜູ້ມາໃຊ້ບໍລິການ ມີການເສຍຊີວິດ ແລະ ເຈັບປ່ວຍ ໃຫ້ທັນສະພາບການ ແລະ ເຂັ້ມງວດ.
ສຳລັບ ຜູ້ເສຍຊີວິດທັງ 3 ຄົນ, ຜູ້ທີ 1 ແມ່ນເພດຊາຍ ຄົນເຊື້ອຊາດ-ສັນຊາດ ອາເມລິກາ, ອາຍຸ 57 ປີ ແລະ ອີກ 2 ຄົນແມ່ນເພດຍິງ ຄົນສັນຊາດ-ເຊື້ອຊາດ ເດັນມາກ, ອາຍຸ 20 ປີ ແລະ 21 ປີ.
ຫລັງຈາກເຫດການທີ່ເກີດຂຶ້ນດັ່ງກ່າວ, ອຳນາດການປົກຄອງເມືອງ, ແຂວງ ໄດ້ໃຫ້ພາກສ່ວນທີ່ກ່ຽວຂ້ອງລົງຕິດຕາມ, ກວດກາ, ຊຸກຍູ້ ຫົວໜ່ວຍທຸລະກິດ, ຜູ້ປະກອບການຮ້ານບັນເທີງ, ຮ້ານອາຫານ ແລະ ອື່ນໆ ໃຫ້ມີຄວາມເອົາໃຈໃສ່ໃນການຄຸ້ມຄອງ, ການບໍລິການຕ່າງໆ ໃຫ້ມີຄວາມເໝາະສົມ, ບົນພື້ນຖານຂອງລະບຽບຫລັກການ ເພື່ອຮັບປະກັນຄວາມປອດໄພຂອງນັກທ່ອງທ່ຽວ ທີ່ເຂົ້າມາໃຊ້ບໍລິການ.
