ເສັ້ນທາງດີ ມີຄວາມປອດໄພ ໄປມາກໍປະຢັດ ບົ່ງບອກເຖິງການພັດທະນາຂອງຊາດ

ໂດຍ: ທິດກໍ່າ

ມີຫລາຍໆຄົນອາດເຂົ້າໃຈວ່າ ການປະຢັດເປັນພຽງບໍ່ໃຊ້ຈ່າຍຟຸມເຟືອຍໃນການກິນຢູ່ປະຈໍາວັນ ຫລື ການດໍາລົງຊີວິດ ໃນເງື່ອນໄຂທີ່ປະເທດຊາດບ້ານເມືອງຂອງພວກເຮົາພວມທຸກຍາກລໍາບາກ ແລະ ດ້ອຍພັດທະນາ, ຊໍ້າບໍ່ໜໍາ ໃນສະພາບປັດຈຸບັນຍິ່ງປະສົບບັນຫາວິກິດທາງດ້ານເສດຖະກິດ-ການເງິນ, ເຂົ້າຍາກໝາກແພງ, ຄ່າແຮງຊໍ້າພັດຍັງຕໍ່າ ກະທົບໄປເຖິງຊີວິດການເປັນຢູ່ຂອງຄົນໃນຊາດ ໂດຍສະເພາະຜູ້ມີລາຍຮັບຕໍ່າ. ແຕ່ໃນຄວາມເປັນຈິງແລ້ວ ເວົ້າເຖິງການປະຢັດມັນກໍກວມລວມໄປເຖິງທຸກຂົງເຂດວຽກງານທີ່ປິ່ນອ້ອມໃນການສ້າງສາພັດທະນາ ກໍຄືການເຄື່ອນໄຫວໄປມາ ນັບທັງຊີວິດການເປັນຢູ່ຂອງພວກເຮົາ ເຊັ່ນຖ້າເວົ້າເຖິງການຜະລິດກໍຕ້ອງມີການປະຢັດຕົ້ນທຶນ, ປະຢັດເວລາ ແລະ ປະຢັດແຮງງານ, ແຕ່ໝາກຜົນທີ່ໄດ້ຮັບອອກມາມັນຄຸ້ມຄ່າ, ມີຄຸນນະພາບ, ປະສິດທິພາບ ແລະ ໃຊ້ງານໄດ້ຢ່າງຍາວນານ ນັ້ນລະຄືທາດແທ້ຂອງຄວາມປະຢັດ.

ອີກສິ່ງໜຶ່ງທີ່ເຮົາຄວນຄໍານຶງເຖິງການປະຢັດນັ້ນ ກໍຄືເຮົາມີຖະໜົນຫົນທາງດີງາມ, ມາດຕະຖານສາກົນ, ແລ່ນລົດໄປມາສະດວກສະບາຍ, ວ່ອງໄວໄປງ່າຍມາງ່າຍ ມັນກໍເປັນການປະຢັດນໍ້າມັນ ປະຢັດເວລາ ແລະ ປະຢັດການຫລຸ້ຍຫ້ຽນຂອງລົດ.

ດັ່ງເສັ້ນທາງເລກທີ 13 ໃຕ້ ນັບແຕ່ຍ່ານບ້ານຫລັກ 71 ເມືອງທ່າພະບາດ ແຂວງບໍລິຄໍາໄຊ ໄປຫາເມືອງທ່າແຂກ ແຂວງຄໍາມ່ວນ ທີ່ພວມກໍ່ສ້າງ ແລະ ໃກ້ຈະສໍາເລັດ 100% ໃນມໍ່ໆນີ້. ສະເພາະຍ່ານທີ່ກ່າວມານີ້ແນ່ນອນຮອດປີ 2025 ພວກເຮົາກໍຈະໄດ້ຊົມໃຊ້ຢ່າງສະດວກສະບາຍໂລ່ງອົກໂລ່ງໃຈ ແລະ ຊົມຊື່ນຍິນດີ. ໃນຫລາຍປີຜ່ານມາ ເຮົາເຄີຍເດີນທາງໄປແຂວງບໍລິຄໍາໄຊຮອດເມືອງປາກຊັນໃຊ້ເວລາ 2 ຫາ 3 ຊົ່ວໂມງ ແຕ່ໃນເມື່ອມີທາງດີທາງງາມໄປງ່າຍມາງ່າຍກໍຈະໃຊ້ເວລາພຽງ 1 ຫາ 2 ຊົ່ວໂມງ ຫລື ອາດຫຍໍ້ເວລາເປັນເຄິ່ງໜຶ່ງ.

ເມື່ອປຽບທຽບໃສ່ຍຸກກ່ອນໜ້ານີ້ຫລາຍສິບປີ ການໄປມາໃຊ້ລົດໃຊ້ຖະໜົນຍິ່ງມີຄວາມຫຍຸ້ງຍາກຫລາຍກວ່ານີ້ສິບເທົ່າ, ກ່ອນສະຖາປະນາ ສປປ ລາວ ເສັ້ນທາງຫລວງແຫ່ງຊາດເລກທີ 13 ແຕ່ເໜືອຮອດໃຕ້ ເປັນທາງດິນແດງ, ນໍ້າງື່ມ, ນໍ້າກະດິງ ແລະ ຫລາຍບ່ອນບໍ່ທັນມີຂົວ ຕ້ອງໄດ້ຂີ່ບັກລຽນຄິວຂ້າມນໍ້າ. ຖ້າຕ້ອງການໄປວຽກຢູ່ພາກກາງ ແຂວງສະຫວັນນະເຂດ ຂີ່ລົດອອກຈາກວຽງຈັນໄປນອນປາກຊັນ, ອອກຈາກປາກຊັນໄປນອນທ່າແຂກ, ອອກຈາກທ່າແຂກໄປນອນສະຫວັນນະເຂດ ຕື່ນເຊົ້າມາຈຶ່ງໄດ້ເຮັດວຽກ.

ນີ້ຄືຄວາມແຕກຕ່າງໃນຍຸກກ່ອນກັບຍຸກນີ້. ຕົກມາສະໄໝນີ້ ເຖິງວ່າມີການສ້າງສາພັດທະນາໄປໄວ ແຕ່ມາສົມທຽບໃສ່ໝູ່ກັບເຮົາພັດຍັງມີການພັດທະນາຫລ້າຫລັງກວ່າເຂົາ. ຕາມທິດກໍ່າວ່າ ຖ້າບໍ່ມີການສໍ້ລາດບັງຫລວງຢ່າງແຜ່ລາມຫລວງຫລາຍ ເສັ້ນທາງຢູ່ບ້ານເຮົາອາດປູຄອນກີດ ຫລື ປູຢາງຂົ້ວໝົດທົ່ວປະເທດ ເພາະມີຊັບໃນດິນສິນໃນນໍ້າຫລວງຫລາຍ, ມີບໍ່ເງິນ, ບໍ່ຄໍາ ແລະ ສາລະພັດບໍ່ແຮ່ ແຕ່ວ່າເສັ້ນທາງ 13 ໃຕ້ແຕ່ຍ່ານຫລັກ 21 ເມືອງໄຊທານີ ນະຄອນຫລວງວຽງຈັນ ໄປຫາບ້ານຫລັກ 71 ເມືອງທ່າພະບາດ ແຂວງບໍລິຄຳໄຊ ຍັງເປັນບວກຂຸມ, ມີຂີ້ຝຸ່ນໄງ້ກຸ້ມ ເວລາແລ່ນຜ່ານກໍທຸກທັງລົດທັງຄົນ.

ດັ່ງພວກເຮົາຮູ້ນໍາກັນແລ້ວວ່າ, ການມີເສັ້ນທາງດີທາງງາມນອກຈາກໄປມາສະດວກ ປອດໄພ ແລະ ປະຢັດແລ້ວ ມັນຍັງເປັນໃບໜ້າໃບຕາຂອງປະເທດຊາດ, ສະແດງເຖິງຄວາມຈະເລີນຮຸ່ງເຮືອງເຂັ້ມແຂງຂອງຊາດບ້ານເມືອງ ອີກດ້ວຍ.