ຫຼວງນໍ້າທາ ແຕ່ງຕັ້ງ ຫົວໜ້າຄະນະຈັດຕັ້ງແຂວງ ແລະ ຫົວໜ້າພະແນກການເງິນ ຄົນໃໝ່

ວັນທີ 16 ທັນວາ 2024 ຜ່ານມາ  ແຂວງຫຼວງນໍ້າທາ ມອບ-ຮັບໜ້າທີ່ ຫົວໜ້າຄະນະຈັດຕັ້ງແຂວງ ແລະ ຫົວໜ້າພະແນກການເງິນແຂວງ ລະຫວ່າງ ຜູ້ເກົ່າ ແລະ ຜູ້ໃໝ່ ໂດຍການເປັນປະທານຂອງ ສະຫາຍ ວຽງສະຫວັດ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງນໍ້າທາ.

ມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຮັບຮອງເອົາ ທ່ານ ຫຼ້າປະເສີດ ສີປະເສີດ ກຳມະການປະຈຳພັກແຂວງ ເປັນຫົວໜ້າຄະນະຈັດຕັ້ງແຂວງ ແລະ ຕົກລົງແຕ່ງຕັ້ງ ທ່ານ ຈັນພິພັກ ກອງຈຳປາ ກຳມະການພັກແຂວງ ເລຂາພັກເມືອງ ເຈົ້າເມືອງໆສິງ ເປັນຫົວໜ້າພະແນກການເງີນແຂວງ ພ້ອມທັງເຊັນບົດບັນທຶກມອບ – ຮັບໜ້າທີ່ຫົວໜ້າຄະນະຈັດຕັ້ງແຂວງ ແລະ ຫົວໜ້າພະແນກການເງີນແຂວງ.

ທ່ານ ວຽງສະຫວັດ ສີພັນດອນ ກ່າວວ່າ: ການແຕ່ງຕັ້ງຍົກຫຍາຍບຸກຄະລາກອນແມ່ນມີຄວາມຈຳເປັນພາວະວິໄສ ໃນການຄັບເຄື່ອນກົງຈັກການຈັກຕັ້ງຂອງພັກ-ລັດ ເພື່ອຮັບປະກັນໃຫ້ບົດບາດການນຳພາຂອງພັກມີຄວາມໜັກແໜ້ນເຂັ້ມແຂງ ເພື່ອຮັບປະກັນການພັດທະນາໃນໄລຍະໃໝ່ກໍຄືການນໍາພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາ, ເວົ້າລວມເວົ້າສະເພາະກໍຄືການປັບປຸງຄຸນນະພາບຊິວິດການເປັນຢູ່ຂອງປະຊາຊົນບັນດາເຜົ່າ ຢູ່ພາຍໃນແຂວງຫຼວງນໍ້າທາ ໃຫ້ດີຂຶ້ນເທ່ື່ອລະກ້າວ, ພ້ອມທັງໄດ້ເນັ້ນໜັກໃຫ້ຜູ້ທີ່ໄດ້ຮັບໝ້າທີ່ໃໝ່ຈົ່ງເຊີດຊູຄວາມເປັນແບບຢ່າງນໍາໜ້າທາງດ້ານຄຸນທາດການເມືອງ ຄຸນສົມບັດສິນທຳປະຕິວັດ, ມີແບບແຜນວິທີເຮັດວຽກຢ່າງມີວິທະຍາສາດ ເພື່ອເຮັດໃຫ້ແຂວງຫຼວງນໍ້າທາພັດທະນາດີຂຶ້ນໄປເລື້ອຍໆ.