ປະທານສະມາຄົມມິດຕະພາບລາວ- ຍີ່ປຸ່ນ ໄດ້ມອບຫຼຽນກຽດຕິຄຸນອາທິດອຸໄທ, ດາວຄຳ ແລະ ດາວເງິນ (ຊັ້ນ2) ໃຫ້ ລັດຖະມົນຕີ ກະຊວງສຶກສາທິການ ແລະ ກິລາ

ວັນທີ 18 ທັນວາ 2024 ນີ້, ທີ່ເຮືອນພັກທູດຍີ່ປຸ່ນ ປະຈຳນະຄອນຫຼວງວຽງຈັນ ປະທານສະມາຄົມມິດຕະພາບລາວ- ຍີ່ປຸ່ນ ໄດ້ມອບຫຼຽນກຽດຕິຄຸນອາທິດອຸໄທ, ດາວຄຳ ແລະ ດາວເງິນ (ຊັ້ນ2) ໃຫ້ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ຊຶ່ງເປັນໜຶ່ງໃນກຽດຕິຄຸນພົນລະເຮືອນທີ່ສູງສຸດຂອງຍີ່ປຸ່ນ, ມອບຫຼຽນໂດຍທ່ານ ໂຄອິຊຶມິ ຊຶໂຕມຸ ເອກອັກຄະຣາຊະທູດຍີ່ປຸ່ນປະຈຳ ສປປ ລາວ, ມີບັນດາຮອງລັດຖະມົນຕີ ແລະ ອະດີດລັດຖະມົນຕີ, ຕາງໜ້າຄົນຍີ່ປຸ່ນທີ່ອາໄສຢູ່ໃນປະເທດລາວ ແລະ ພາກສ່ວຍກ່ຽວຂ້ອງເຂົ້າຮ່ວມ.

ທ່ານທູດ ຍີ່ປຸ່ນກ່າວວ່າ: ນີ້ເພື່ອເປັນການຍ້ອງຍໍ ແລະ ສັນລະເສີນຜົນງານອັນອັນພົ້ນເດັ່ນຂອງ ທ່ານພຸດ ສິມມາລາວົງ ຊຶ່ງໃນໄລຍະດຳລົງຕຳແໜ່ງເປັນຮອງຄະນະບໍດີ ແລະ ເປັນຄະນະບໍດີຄະນະວິທະຍາ ສາດສັງຄົມ, ມະຫາ ວິທະຍາໄລແຫ່ງຊາດ ທ່ານ ໄດ້ອຸທິດຕົນໃນການສະໜັບສະໜູນນັກຄົ້ນຄວ້າຄົນຍີ່ປຸ່ນທີ່ຢູ່ໃນຄະນະ, ທັງຍັງໄດ້ໃຫ້ການປຶກສາ ໃນການສຳຫລວດ ແລະ ຄົ້ນຄວ້າຂອງເຂົາເຈົ້າ ທັງໄດ້ປະກອບສ່ວນຢ່າງໃຫຍ່ຫຼວງໃນການສ້າງນັກຄົ້ນຄວ້າຄົນຍີ່ປຸ່ນ ທີ່ຄົ້ນຄວ້າກ່ຽວກັບປະເທດລາວ ແລະ ການແລກ ປ່ຽນ ທາງວິຊາການລະຫວ່າງລາວ ແລະ ຍີ່ປຸ່ນ.

ໃນຖານະລັດຖະມົນຕີກະຊວງສຶກສາທິການ ແລະ ກິລາ, ນັບແຕ່ປີ2021 ຮອດປັດຈຸບັນ, ທ່ານໄດ້ຮ່ວມກັບລັດຖະບານຍີ່ປຸ່ນແລະອົງການຈັດຕັ້ງສາກົນປະຕິບັດນະໂຍບາຍຕ່າງໆຢ່າງຕັ້ງໜ້າເພື່ອຟື້ນຟູໂອກາດທາງດ້ານການສຶກສາທີ່ສູນເສຍໄປຍ້ອນພະຍາດໂຄວິດ ເຊັ່ນ ການຈັດຕັ້ງລະບົບການຮຽນຮູ້ເສີມໂດຍນຳເອົາການຮຽນຮູ້ແບບດີຈີຕອນເຂົ້າມານຳໃຊ້ ແລະຍັງໄດ້ເຂົ້າຮ່ວມງານຕ່າງໆເພື່ອເຜີຍແຜ່ໝາກຜົນການຊ່ວຍເຫຼືອຂອງປະເທດຍີ່ປຸ່ນ. ພ້ອມກັນນັ້ນ, ທ່ານຍັງໄດ້ປະກອບສ່ວນໃນການເຮັດໃຫ້ “ໂຄງການປັບປຸງສະໜາມກິລາເຈົ້າອະນຸວົງ” ໂຄງການນີ້ຈະກາຍເປັນສັນຍາລັກແຫ່ງສາຍພົວພັນມິດຕະພາບ ແລະ ການຮ່ວມມືຂອງສອງປະເທດອີກດ້ວຍ.
ໄດ້ປະກອບສ່ວນເຂົ້າໃນວຽກງານດັ່ງກ່າວ.

ນອກຈາກນັ້ນ, ໃນຖານະປະທານສະມາຄົມມິດຕະພາບລາວ-ຍີ່ປຸ່ນ, ທ່ານພຸດ ສິມມາລາວົງຍັງໄດ້ຕ້ອນຮັບບັນດາການນຳລະດັບສູງຈາກຍີ່ປຸ່ນຢ່າງອົບອຸ່ນເປັນຈຳນວນຫຼາຍຄັ້ງແລະໄດ້ແລກປ່ຽນຄຳຄິດຄຳເຫັນຢ່າງມີຄວາມໝາຍກັບບັນດາທ່ານດັ່ງກ່າວ. ທ່ານຍັງເປັນອະດີດນັກສຶກສາລາວທີ່ຮຽນຈົບຈາກມະຫາວິທະຍາໄລ Tohoku ປະເທດຍີ່ປຸ່ນດ້ວຍທຶນການສຶກສາຂອງກະຊວງສຶກສາທິການ, ວິທະຍາສາດ, ກິລາ ແລະ ວັດທະນະທຳຂອງຍີ່ປຸ່ນ (MEXT) ແຕ່ປີ1997 ຫາ1999 ແລະ ໄດ້ຮັບປະລິນຍາໂທສາຂາປະຫວັດສາດອີກດ້ວຍ.