ບົດບາດໜ້າທີ່ສຳຄັນຂອງ HR ມີຄືແນວໃດ ?
HR ນັ້ນເປັນຄຳຫຍໍ້ມາຈາກພາສາອັງກິດວ່າ Human Resource ຫລື Human Resource Management ເຊິ່ງກໍແມ່ນວຽກຂອງຝ່າຍບຸກຄົນ ຫລື ການບໍລິຫານຊັບພະຍາກອນມະນຸດ ໂດຍເປັນການໃຊ້ກົນລະຍຸດວາງແຜນການເຮັດວຽກໃຫ້ມີ ຄວາມສຳພັນກັບທຸກໆຝ່າຍໃນອົງກອນໃຫ້ມີປະສິດທິພາບຫລາຍທີ່ສຸດ ໂດຍຕ້ອງບັນລຸວັດຖຸປະສົງໃນການເຮັດວຽກໃນທຸລະກິດໃດໆກໍຕາມ ທັງຕໍ່ການເຮັດວຽກເປັນໝູ່ຄະນະ ແລະ ການເຮັດວຽກຄົນດຽວ ແລະ ຕ້ອງມີການພັດທະນາປັບປຸງຢູ່ຕະຫລອດເວລາ ໂດຍຜູ້ບໍລິຫານອົງກອນຕ່າງໆນັ້ນຈຳເປັນຕ້ອງຄັດເລືອກ ແລະ ເຟັ້ນຫາບຸກຄົນທີ່ຈະມາເຮັດໜ້າທີ່ໃນການບໍລິຫານຊັບພະຍາກອນມະນຸດ ຫລື ຝ່າຍບຸກຄົນໃຫ້ດີພ້ອມ ເພາະເປັນຕຳແໜ່ງທີ່ຕ້ອງເຮັດໜ້າທີ່ໃນການຄັດສັນບຸກຄົນເຂົ້າມາເຮັດວຽກຮ່ວມໃນອົງກອນ ເຊິ່ງຈະໄດ້ພະນັກງານທີ່ດີ ຫລື ບໍ່ດີກໍແມ່ນຢູ່ກັບ HR ຫລື ຝ່າຍບຸກຄົນນີ້ທີ່ເປັນຄົນຄັດເລືອກໃນເບື້ອງຕົ້ນ.
+ ຄຸນສົມບັດຂອງຜູ້ທີ່ເຮັດໜ້າທີ່ເປັນ HR ທີ່ດີມີຫຍັງແດ່ ?
– ຕ້ອງເປັນຜູ້ທີ່ມີມະນຸດສຳພັນດີຕໍ່ຜູ້ອື່ນ.
– ຕ້ອງເຂົ້າກັບຜູ້ອື່ນໄດ້ງ່າຍ.
– ມີຄວາມຍິ້ມແຍ້ມແຈ່ມໃສ, ໃບໜ້າຕ້ອນຮັບຜູ້ຄົນຢູ່ສະເໝີ.
– ຕ້ອງມີຄວາມຮອບຮູ້ພໍສົມຄວນ ເນື່ອງຈາກຕ້ອງຄອຍຕອບຄຳຖາມພະນັກງານ ແລະ ທຸກໆຝ່າຍໃນອົງກອນ.
– ຕ້ອງເປັນຜູ້ທີ່ມີຄວາມໜ້າເຊື່ອຖື ພ້ອມກັບສ້າງຄວາມປະທັບໃຈໄດ້ສະເໝີ.
– ຕ້ອງຊ່າງສັງເກດ, ຄອຍຕິດຕາມຂ່າວສານຕ່າງໆ ທັງພາຍນອກອົງກອນ ແລະ ພາຍໃນອົງກອນ ຕະຫລອດຈົນໃນອົງກອນ ນຳ.
– ຕ້ອງມີຄວາມຮັບຜິດຊອບຕໍ່ວຽກ ແລະ ໜ້າທີ່ຂອງຕົນເອງຢູ່ສະເໝີ.
+ ໜ້າທີ່ຂອງການເຮັດວຽກໃນຕຳແໜ່ງ HR ມີຫຍັງແດ່ ?
– ຕ້ອງຮູ້ຈັກການກຳນົດກົນລະຍຸດ ຫລື ຫລັກໃນການບໍລິຫານຊັບພະຍາກອນມະນຸດໃຫ້ດີ ແລະ ເກີດປະສິດທິພາບສູງສຸດໄດ້.
– ຕ້ອງຄອຍວາງແຜນໃນດ້ານການຮັບສະໝັກພະນັກງານທີ່ດີ ແລະ ມີປະສິດທິພາບເຂົ້າມາເຮັດວຽກໃນອົງກອນນັ້ນໆໄດ້.
– ຕ້ອງມີການຝຶກອົບຮົມ ແລະ ພັດທະນາຕົນເອງ ແລະ ອົງກອນຢູ່ສະເໝີ.
– ຕ້ອງຕິດຕາມປະເມີນຜົນໃນການປະຕິບັດງານຕ່າງໆຂອງບຸກຄົນພາຍໃນອົງກອນນັ້ນໆ.
– ຕ້ອງສາມາດດຳເນີນການຈັດການວາງແຜນໃນເລື່ອງລະບຽບວິໄນຂອງການເຮັດວຽກຕ່າງໆໄດ້.
– ຕ້ອງດູແລໃນເລື່ອງຂອງສຸຂະພາບ ແລະ ຄວາມປອດໄພຂອງພະນັກງານຕ່າງໆໄດ້.
– ຕ້ອງຕິດຕາມສົ່ງເສີມແຮງງານສຳພັນ ແລະ ຮັບຜິດຊອບເລື່ອງລະບົບຂໍ້ມູນ, ການກວດສອບ ຕະຫລອດຈົນການວິໄຈດ້ານຊັບພະຍາກອນມະນຸດໄດ້ດີ.
ດັ່ງນັ້ນ ຈະເຫັນໄດ້ວ່າການເຮັດວຽກໃນຕຳແໜ່ງ HR ຂອງບໍລິສັດ ຫລື ອົງກອນຕ່າງໆເອີ້ນໄດ້ ວ່າເປັນຕຳແໜ່ງສຳຄັນຫລາຍຕຳແໜ່ງໜຶ່ງ ເພາະຫາກຂາດຕຳແໜ່ງນີ້ໄປ ກໍຈະເຮັດໃຫ້ການເຮັດວຽກຂອງບໍລິສັດ ຫລື ອົງກອນເກີດການຕິດຂັດ ແລະ ບໍ່ສາມາດເລືອກເຟັ້ນຫາບຸກຄົນ ຫລື ພະນັກງານດີໆເກັ່ງໆເຂົ້າມາເຮັດວຽກໃນອົງກອນໄດ້ຢ່າງເຕັມປະສິດທິພາບ.
