ສ.ເກົາຫລີ ຊ່ວຍເຫລືອລ້າ 13 ລ້ານໂດລາ ເພື່ອກໍ່ສ້າງຂົວ ແລະ ປັບປຸງຄວາມປອດໄພທາງຫລວງ ຢູ່ ສປປ ລາວ
ໜັງສືພິມວຽງຈັນທາຍລາຍງານວ່າ: ວັນທີ 19 ທັນວາ 2024 ຜ່ານມາ ອົງການຮ່ວມມືສາກົນ ສ.ເກົາຫລີ (KOICA) ໄດ້ໃຫ້ການຊ່ວຍເຫຼືອລ້າ 13 ລ້ານໂດລາສະຫະລັດ ເພື່ອກໍ່ສ້າງຂົວ ແລະ ປັບປຸງຄວາມປອດໄພທາງຫລວງ ຢູ່ ສປປ ລາວ ໂດຍຈະຍົກລະດັບ 6 ຂົວ ແລະ ຄວາມປອດໄພທາງຫລວງ ເທິງເສັ້ນທາງແຫ່ງຊາດເລກ 8 ສ່ວນຈາກແຂວງບໍລິຄໍາໄຊ ຫາແຂວງຄໍາມ່ວນ, ຊຶ່ງເປັນເສັ້ນທາງສໍາຄັນ ເຊື່ອມຕໍ່ລາວໃສ່ໄທ ແລະ ຫວຽດນາມ.
ທ່ານເອກອັກຄະລັດຖະທູດ Jung Yung Soo ໄດ້ສະແດງຄວາມຄາດຫວັງຢ່າງຈິງໃຈຕໍ່ການຜັນຂະຫຍາຍໂຄງການດັ່ງກ່າວໃຫ້ສຳເລັດຜົນ, ໂດຍພື້ນຖານໃນການພົວພັນຮ່ວມມືອັນແໜ້ນແຟ້ນລະຫວ່າງ ສ. ເກົາຫລີ ແລະ ສປປ ລາວ ໂດຍໃນປີ 2025 ຈະແມ່ນປີຄົບຮອບ 30 ປີແຫ່ງການສ້າງສາຍພົວພັນທາງການທູດລະຫວ່າງສ.ເກົາຫລີ-ລາວ ທັງຍັງຈະມີ ການຍົກລະດັບການພົວພັນເປັນ “ຄູ່ຮ່ວມມືຮອບດ້ານ” ເນື່ອງໃນໂອກາດສະເຫລີມສະຫລອງດັ່ງກ່າວ.
ທີ່ມາ: VientianeTimes
