ກໍາປູເຈຍເຕືອນປະຊາຊົນລະວັງ “ເງິນໂດລາອາເມລິກາປອມ” ລະບາດ

       ທະນາຄານກາງກໍາປູເຈຍປະກາດເຕືອນໃຫ້ປະຊາຊົນລະວັງທະນະບັດໂດລາອາເມລິກາປອມ ຫລັງພົບວ່າມີການໝູນວຽນຢູ່ໃນຕະຫລາດເພີ່ມຂຶ້ນ.

       ທະນາຄານກາງກໍາປູເຈຍອະນຸຍາດໃຫ້ທະນາຄານ ແລະ ສະຖາບັນການເງິນຢຶດທະນະບັດໂດລາອາເມລິກາປອມຂອງລູກຄ້າໂດຍບໍ່ຕ້ອງຈ່າຍຄ່າທົດແທນ ແລະ ສົ່ງຕໍ່ໃຫ້ໜ່ວຍງານທີ່ກ່ຽວຂ້ອງຂອງອາເມລິກາ ເພື່ອດໍາເນີນການສອບສວນໃນການປ້ອງກັນການໝູນວຽນຂອງເງິນໂດລາປອມ ແລະ ເປັນຂັ້ນຕອນດໍາເນີນງານຕາມຄໍາຮ້ອງຂໍຂອງໜ່ວຍຂ່າວອາເມລິກາ.

       ຜູ້ອໍານວຍການໃຫຍ່ຝ່າຍເບິ່ງແຍງທະນາຄານຂອງທະນາຄານກາງກໍາປູເຈຍ ກ່າວວ່າ: ທະນາຄານ ແລະ ສະຖາບັນການເງິນ ຈໍາເປັນຕ້ອງເປີດເຜີຍຕົວຕົນຂອງລູກຄ້າທີ່ໝູນວຽນເງິນໂດລາປອມຕໍ່ທະນາຄານກາງກໍາປູເຈຍ, ພ້ອມເຕືອນໃຫ້ປະຊາຊົນເຝົ້າລະວັງເປັນພິເສດ ແລະ ກວດສອບທະນະບັດໂດລາອາເມລິກາຢ່າງລະອຽດກ່ອນຮັບມາ.