ອະນາໄມໂລກເຕືອນ HIV/AIDS ລະບາດຫລາຍຂຶ້ນຢູ່ເອີຣົບ
ເຈົ້າໜ້າທີ່ສາທາລະນະສຸກລາຍງານວ່າ: ຈຳນວນຜູ້ຕິດເຊື້ອໄວຣັສເອຊໄອວີ/ເອດສ໌ (HIV/AIDS) ລາຍໃໝ່ຢູ່ເອີຣົບເພີ່ມຫລາຍຂຶ້ນຈົນເຖິງລະດັບສູງສຸດໃນປີ 2016 ນັບແຕ່ບັນທຶກສະຖິຕິມາ ເອີ້ນວ່າເປັນອັດຕາການແຜ່ລະບາດທີ່ໜ້າຕົກໃຈ.
ອົງການອະນາໄມໂລກພາກພື້ນເອີຣົບຖະແຫລງໃນລາຍງານຮ່ວມກັບສູນຄວບຄຸມ ແລະ ປ້ອງກັນພະຍາດຢູ່ເອີຣົບວ່າ: ປີ 2016 ມີຜູ້ຕິດເຊື້ອໄວຣັສ HIV ສາເຫດຂອງພະຍາດເອດສ໌ປະມານ 160.000 ຄົນໃນ 53 ປະເທດ ໂດຍ 80% ຢູ່ເອີຣົບຕາເວັນອອກ. ຖະແຫລງການຂອງອົງການອະນາໄມໂລກເອີຣົບລະບຸວ່າ: ນີ້ຖືເປັນຕົວເລກຜູ້ຕິດເຊື້ອສູງສຸດນັບແຕ່ບັນທຶກສະຖິຕິມາ ແລະ ຖ້າທ່າອ່ຽງຍັງເພີ່ມຂຶ້ນແບບນີ້ ຈະເຮັດໃຫ້ໂລກບໍ່ສາມາດປະຕິບັດຕາມເປົ້າໝາຍຢຸດການລະບາດຂອງເຊື້ອ HIV ໄດ້ພາຍໃນປີ 2030. ຜູ້ຊ່ຽວຊານກ່າວວ່າ: ຜູ້ຕິດເຊື້ອຈຳນວນຫລາຍໄດ້ຮັບເຊື້ອ HIV ມາຫລາຍປີແລ້ວກ່ອນຈະໄດ້ຮັບການບົ່ງມະຕິພະຍາດ ຈຶ່ງເຮັດໃຫ້ເຊື້ອໄວຣັສແຜ່ໄປສູ່ຜູ້ອື່ນ ແລະ ຄວບຄຸມຍາກ. ການໄດ້ຮັບບົ່ງມະຕິພະຍາດແຕ່ເລີ່ມຕົ້ນມີຄວາມສຳຄັນຢ່າງຍິ່ງ ເນື່ອງຈາກຜູ້ຕິດເຊື້ອຈະໄດ້ຮັບຢາຕ້ານເອດສ໌ໄວຂຶ້ນ ຈຶ່ງມີໂອກາດຈະມີຊີວິດຢູ່ໄດ້ດົນກວ່າ ແລະ ສຸຂະພາບດີກວ່າ. ອົງການອະນາໄມໂລກພາກພື້ນເອີຣົບປະກອບມີ 53 ປະເທດ ທີ່ມີປະຊາກອນລວມກັນເກືອບ 900 ລ້ານຄົນ.
