ທຳລາຍສວນຢາຝິ່ນ ທີ່ປະຊາຊົນລັກລອບປູກ 12,000 ແມັດ ແລະ ນຳເຈົ້າຂອງສວນໄປສຶກສາອົບຮົມ

ວັນທີ 5 ກຸມພາ 2025 ກອງບັນຊາການປ້ອງກັນຄວາມສະຫງົບ ເມືອງຄໍາ ແຂວງຊຽງຂວາງ ໄດ້ສົມທົບກັບກໍາລັງປ້ອງກັນຊາດ, ອໍານາດການປົກຄອງບ້ານ ແລະ ພາກສ່ວນທີ່ກ່ຽວຂ້ອງ ນໍາພາໂດຍ ພັທ ສີທັດ ພຸດທະວົງສາ ຮອງກອງບັນຊາການປ້ອງກັນຄວາມສະຫງົບ ເມືອງຄໍາ ໄດ້ລົງທໍາລາຍສວນຢາຝິ່ນ ທີ່ປະຊາຊົນ ລັກລອບປູກ ຢູ່ກຸ່ມລ້ອງມັດ ເມືອງຄໍາ ແຂວງຊຽງຂວາງ ຈໍານວນ 4 ຕອນ ມີເນື້ອທີ່ທັງໝົດ 12,000 ຕາແມັດ ໂດຍການໃຊ້ໄມ້ຟາດ, ພ້າຖາງ ແລະ ລົກຕົ້ນນ້ອຍຖິ້ມ ເພື່ອບໍ່ໃຫ້ສາມາດກີດຢາງ ແລະ ເກັບກ່ຽວແນວພັນອີກ.

ຈາກນັ້ນ, ໄດ້ນໍາຕົວຜູ້ລັກລອບປູກຢາຝິ່ນ ມາສຶກສາອົບຮົມກ່າວເຕືອນ ແລະ ຊີ້ແຈງຜົນຮ້າຍໄພອັນຕະລາຍຂອງຢາຝິ່ນ ໃຫ້ປະຊາຊົນທີ່ລັກລອບປູກ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ.

ທີ່ມາ: ປກສ ແຂວງຊຽງຂວາງ