ປກສ ເມືອງໝື່ນ ແຂວງວຽງຈັນ ສຶກສາອົບຮົມນັກຂັບຂີ່ດັດແປງສະພາບເຕັກນິກລົດ

ປກສ ເມືອງໝື່ນ ລາຍງານວ່າ: ວັນທີ 26 ກຸມພາ 2025 ຢູ່ຫ້ອງປະຊຸມພະແນກຕຳຫລວດ ປກສ ເມືອງໝື່ນ ໄດ້ສຶກສາອົບຮົມນັກຂັບຂີ່ທີ່ດັດແປງສະພາບເຕັກນິກລົດຈັກ ຂັບຂີ່ກວນເມືອງ ສ້າງສຽງເນືອງນັນ, ຂັບຂີ່ລົດໄວເກີນກຳນົດ ເຮັດໃຫ້ສັງຄົມບໍ່ມີຄວາມສະຫງົບ ແລະ ບໍ່ມີຄວາມເປັນລະບຽບຮຽບຮ້ອຍ, ໂດຍ ການເຂົ້າຮ່ວມຂອງ ພັທ ລັງສີ ສຸຂະລິວົງ ຮອງຫົວຫນ້າກອງບັນຊາການປກສເມືອງຜູ້ຊີ້ນຳວຽກງານພະແນກຕຳຫລວດ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ພັຕ ສີລິວັນ ສີອັກຄະສອນ ຫົວຫນ້າກອງຈາລະຈອນ ເມືອງໝື່ນ ໄດ້ກ່າວວ່າ: ເພື່ອເປັນການສະກັດກັ້ນປະກົດການຫຍໍ້ທໍ້ຕ່າງໆໃຫ້ຫລຸດນ້ອຍຖອຍລົງ ແນໃສເຮັດໃຫ້ການໃຊ້ລົດໃຊ້ຖະໜົນມີຄວາມປອດໄພ ແລະ ເປັນລະບຽບຮຽບຮ້ອຍດີດັ່ງນັ້ນເຈົ້າໜ້າທີ່ຕຳຫຼວດຈະລາຈອນ ປກສ ເມືອງໝື່ນ ຈຶ່ງໄດ້ກວດກາຕິດຕາມລົດຈັກທີ່ດັດແປງສະພາບເຕັກນິກ ເຊິ່ງສາມາດກັກໄດ້ຈຳນວນ 13 ຄັນ ມີການດັດແປງໃສ່ທໍ່ຄວັນສຽງດັງ, ໃສ່ຢາງເສັ້ນນ້ອຍ ແລະ ອື່ນໆ ຈຶ່ງໄດ້ນຳຜູ້ກ່ຽວດັ່ງກ່າວ ພ້ອມທັງຜູ້ປົກຄອງມາເຮັດບົດບັນທຶກສຶກສາອົບຮົມ ກ່າວເຕືອນ ພ້ອມທັງມອບໃຫ້ຜູ້ປົກຄອງໄປສຶກສາອົບຮົມຕໍ່.

ທີ່ມາ: ຂ່າວສານ ເມືອງໝື່ນ