ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ

- MS Labour - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ
- AGL banner - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ

         ຄະນະຜູ້ແທນລາວນຳໂດຍທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງ ງານ ແລະ ສະຫວັດດີການສັງຄົມ, ທັງເປັນຮອງປະທານຄະນະກໍາມະການແຫ່ງຊາດ ເພື່ອຄົນພິການ ແລະ ອາຍຸສູງ, ພ້ອມຄະນະ ​ໄດ້​ເຂົ້າຮ່ວມກອງປະຊຸມລະດັບສູງ ເພື່ອທົບ ທວນຄືນການຈັດຕັ້ງປະຕິບັດ ທົດສະວັດຂອງຄົນພິການ ພາກພື້ນອາຊີ ແລະ ປາຊີຟິກ (2013-2022), ທີ່ໄຂຂຶ້ນ​ໃນ​ວັນທີ 30 ພະຈິກ-1 ທັນວາ​ຜ່ານ​ມາ​ນີ້, ທີ່ສປຈີນ, ເພື່ອທົບທວນການຈັດຕັ້ງປະຕິບັດທົດສະວັດຂອງຄົນພິການພາກພື້ນອາຊີ ແລະ ປາຊີຟິກ 5 ປີ ແລະ ວາງທິດທາງແຜນໃນ 5 ປີຕໍ່ໜ້າ (2013-2022), ການ ຈັດຕັ້ງປະຕິບັດຍຸດທະສາດອິນຊອນ ແລະ ສົນທິສັນຍາວ່າດ້ວຍສິດທິຂອງຄົນພິການ, ເຊິ່ງຂໍ້ມູນການຈັດຕັ້ງປະຕິບັດແມ່ນຄະນະກຳມະການ ເສດຖະກິດຂອງພາກພື້ນອາຊີ ແລະ ປາຊີຟິກ, ໄດ້ປະສານທົບທົບກັບບັນດາປະເທດ ສະມາຊິກເພື່ອສະໜັບ ສະໜູນແກ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ 2030.

ໃນໂອກາດນີ້, ຄະນະຜູ້ແທນລາວ ໄດ້ປະກອບຄໍາເຫັນ ແລະ ແຈ້ງໃຫ້ກອງ ປະຊຸມຊາບວ່າ:  ສ​ປ​ປ ລາວ ມີຄົນພິການ 160.881 ຄົນ, ຍິງ 80 115 ຄົນ, ໃນນີ້ 31% ແມ່ນພິການ ແລະ ເສຍອົງຄະ ຍ້ອນໄດ້ຮັບເຄາະຮ້າຍຈາກສິ່ງເສດເຫຼືອຂອງ ສົງຄາມ ກໍຄືລູກລະເບີດທີ່ຍັງບໍ່ທັນແຕກ, ຊຶ່ງສ່ວນໃຫຍ່ແມ່ນເດັກນ້ອຍ. ນອກນັ້ນ, ຍັງໄດ້ເອົາໃຈໃສ່ຈັດຕັ້ງຜັນຂະຫຍາຍສົນທິສັນຍາສາກົນ ວ່າດ້ວຍສິດທິຂອງຄົນພິການ,​ ຍຸດທະສາດອິນຊອນ ແລະ ທົດສະວັດຂອງຄົນພິການ 2013-2022, ໂດຍເຊື່ອມສານ ເຂົ້າໃສ່ບັນດານິຕິກໍາຕ່າງໆເຊັ່ນ: ກົດໝາຍວ່າ​ດ້ວຍ​ການສຶກສາ ແລະ ດຳລັດຂອງນາ ຍົກລັດຖະມົນຕີ ວ່າດ້ວຍຄົນພິການ. ເພື່ອປົກປ້ອງສິດ ແລະ ຜົນປະໂຫຍດຂອງຄົນ ພິການໃຫ້ດີຂື້ນ ແລະ ຍົກສູງບົດບາດວຽກງານຄົນພິການຂອງລາວສູ່ພາກພື້ນ ແລະ ສາກົນ, ຫົວໜ້າຄະນະຜູ້ແທນລາວ ໄດ້​ກ່າວ​ຕື່ມ​ວ່າ: ປັດຈຸ​ບັນ ລັດ​ຖະ​ບານ​ ໄດ້ຮ່າງກົດ​ໝາຍ​ວ່າ​ດ້ວຍຄົນ​ພິ​ການ ແລະ ກຳລັງສ້າງນະໂຍບາຍ, ແຜນຍຸດທະສາດ ແລະ ແຜນ ປະຕິບັດງານແຫ່ງຊາດທີ່ຈະສະເໜີສະພາຮັບຮອງໃນຕົ້ນປີ 2018 ນຳ​ອີກ.

ກອງປະຊຸມໄດ້ຮັບຮອງເອົາບົດລາຍງານຂອງໜ່ວຍງານວິຊາການໃນການເກັບກຳຂໍ້ມູນສະຖິຕິກ່ຽວກັບຄວາມຄືບໜ້າການຈັດຕັ້ງປະຕິບັດທົດສະວັດຂອງຄົນພິການຢູ່ພາກພື້ນ ອາຊີ ແລະ ປາຊີຟິກ, ຮັບຮອງເອົາຖະແຫຼງການປັກກິງ ແລະ ແຜນປະຕິບັດງານ ເພື່ອ ເລັ່ງທວງການຈັດຕັ້ງປະຕິບັດຍຸດທະສາດອິນຊອນ. ຄະນະຜູ້ແທນລາວໄດ້ຖືເອົາໂອກາດ ດັ່ງກ່າວຜັນຂະຫຍາຍການພົວພັນ ແລະ ຮ່ວມມືສອງຝ່າຍກັບ ສປຈີນ ເພື່ອເສີມຂະຫຍາຍການຮ່ວມມືດ້ານວຽກງານສຸຂະພາບ ແລະ ຄວາມປອດໄພແຮງງານໃນສະຖານ ທີ່ເຮັດວຽກ, ຊຶ່ງຜ່ານການປຶກສາຫາລື ສອງຝ່າຍ ເຫັນດີເປັນເອກະພາບສົ່ງເສີມການຮ່ວມມືວຽກງານດັ່ງກ່າວ. ໂດຍກຳນົດ ບັນດາກິດຈະກຳລະອຽດ ແລະ ສ້າງແຜນງານການຮ່ວມມື ຫຼື ບົດບັນທຶກຄວາມເຂົ້າໃຈ, ເຊິ່ງຄາດວ່າຈະໃຫ້ມີການລົງນາມກັນໃນທ້າຍປີ 2018.

- Wave100S AD to Website 2020 0 - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ

ນອກ​ນີ້, ຄະນະ​ຜູ້ແທນລາວ ຍັງໄດ້ພົບປະກັບຮອງລັດຖະມົນຕີ ກະຊວງ ສາທາລະນະສຸກ ແລະ ສະຫວັດດີການສັງຄົມ ຂອງ ສ.ເກົາຫຼີ ເພື່ອສົ່ງເສີມການຮ່ວມມື ໂດຍສະເພາະແມ່ນບົດບັນທຶກຄວາມເຈົ້າໃຈທີ່ສອງກະຊວງໄດ້ລົງນາມ ແລະ ຈັດຕັ້ງ ປະຕິບັດຍຸດທະສາດ ອິນຊອນ ວ່າດ້ວຍເຮັດໃຫ້ສິດທິຂອງຄົນພິການກາຍເປັນຈິງ, ຜ່ານ ການປຶກສາຫາລືຝ່າຍ ສ.ເກົາຫຼີ ຍິນດີສືບຕໍ່ໃຫ້ການຊ່ວຍ​ເຫລືອ, ພັດທະນາ ແລະ ປັບປຸງ ວຽກງານຄົນພິການຂອງລາວໃຫ້ດີຂຶ້ນ.

- WhatsApp Image 2020 05 27 at 5 - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ
- WhatsApp Image 2020 05 27 at 5 - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ
- WhatsApp Image 2020 05 27 at 5 - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ
- WhatsApp Image 2020 05 27 at 5 - ລັດຖະມົນຕີ​ແຮງ​ງານ ​ເຂົ້າ​ຮ່ວມ​ກອງ​ປະຊຸມ​ລະດັບ​ສູງວຽກ​ງານ​ຄົນ​ພິການທີ່ ສປ.ຈີນ
error: Alert: Content is protected !!