ຍີ່ປຸ່ນຢືນຢັນຈະເປັນຄູ່ຮ່ວມພັດທະນາທີ່ດີຂອງລາວ
ໃນໂອກາດສະເຫລີມສະຫລອງວັນຄ້າຍວັນປະສູດຂອງສົມເດັດພະເຈົ້າຈັກກະພັດ ທ່ານ ອາກິຮີໂຕະ ຄົບຮອບ 84 ພັນສາ, ໃນວັນທີ 7 ທັນວານີ້, ທີ່ເຮືອນພັກຂອງທ່ານເອກອັກຄະລາຊະທູດ ທີ່ນະຄອນຫລວງວຽງຈັນ, ໃນງານລ້ຽງດັ່ງກ່າວ, ທ່ານ ທາເຄຊິ ຮິຄິຮາຣະ ເອກອັກຄະລາຊະທູດຍີ່ປຸ່ນ ປະຈຳລາວ ໄດ້ຍ້ອນເບິ່ງຄືນເຖິງສາຍພົວພັນ ລາວ-ຍີ່ປຸ່ນ, ຊຶ່ງໃນປີນີ້, ທັງສອງປະເທດກໍໄດ້ມີການຍົກລະດັບສາຍພົວພັນມາເປັນຄູ່ຮ່ວມມືຍຸດທະສາດ, ໂດຍກ່າວເຖິງການແລກປ່ຽນຢ້ຽມຢາມຂອງການນຳຂັ້ນສູງສອງປະເທດ, ໂດຍສະເພາະການຢ້ຽມຢາມຢ່າງເປັນທາງການຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໃນເດືອນມີຖຸນາຜ່ານມານີ້, ທ່ານໄດ້ກ່າວເຖິງຄວາມຄືບໜ້າຂອງແຜນຮ່ວມມືເພື່ອການພັດທະນາລາວ-ຍີ່ປຸ່ນຄື: ການຊ່ວຍເຫລືອຮັກສາສະຖຽນລະພາບດ້ານການເງິນ, ໂຄງການຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ ແລະ ການເກັບກຳຂໍ້ມູນເພື່ອຍົກລະດັບການເຊື່ອມຈອດລະຫວ່າງຮ່າໂນຍ ແລະ ນະຄອນ ຫລວງວຽງຈັນ, ນອກນີ້ ທ່ານທູດຍັງຢືນຢັນຈະເປັນຄູ່ຮ່ວມທີ່ດີ ແລະ ຊ່ວຍເຫລືອດ້ານຕ່າງໆໃຫ້ຫລາຍຂຶ້ນ.
ຂະນະດຽວກັນ, ທ່ານທູດຍັງໄດ້ມອບລາງວັນໃຫ້ 4 ທ່ານທີ່ມີຜົນງານປະກອບ ສ່ວນເຂົ້າໃນການເສີມຂະຫຍາຍສາຍພົວພັນ ແລະ ມິດຕະພາບລະຫວ່າງຍີ່ປຸ່ນ ແລະ ສປປ ລາວຄື: ທ່ານນາງ ຈັນທະສອນ ອິນທະວົງ ຜູ້ອາໄສຢູ່ປະເທດຍີ່ປຸ່ນໄລຍະຍາວ ທີ່ໄດ້ປະກອບສ່ວນເຂົ້າໃນການເຜີຍແຜ່ສິລະປະການຕ່ຳຜ້າພື້ນເມືອງລາວ ແລະ ການກໍ່ຕັ້ງສູນຝຶກອົບຮົມວິຊາຊີບຫ້ວຍຫົງ ເພື່ອພັດທະນາສັກກະຍະພາບແມ່ຍິງລາວ; ທ່ານນາງ ຊາຈິໂກະ ໂທມິນາກະ ຜູ້ກໍ່ຕັ້ງ ແລະ ຕົວແທນຈາກອົງການທີ່ບໍ່ສັງກັດລັດຖະບານທີ່ມີ ຊື່ວ່າ: IV Japan, ໂດຍທ່ານໄດ້ຊ່ວຍເຫລືອການຝຶກອົບຮົມຕ່າງໆບໍ່ວ່າຈະເປັນການເສີມສວຍ, ການເຮັດອາຫານ, ການຕ່ຳຫູກໃຫ້ນັກຮຽນລາວ, ສາມສືບປີທີ່ຜ່ານມານີ້, ມີນັກຮຽນຈຳນວນຫລາຍກວ່າ 2.000 ຄົນຈົບຈາກສູນຝຶກອົບຮົມດັ່ງກ່າວ; ທ່ານ ຫານຊະນະ ສີສານ ປະທານສະມາຄົມຫັດຖະກຳ, ໂດຍທ່ານໄດ້ຮ່ວມມືກັບນັກອອກແບບປະເທດຍີ່ປຸ່ນໃນການອອກແບບລາຍຜ້າລາວ ແລະ ເຜີຍແຜ່ຄວາມງາມ ແລະ ຄວາມຫລາກຫລາຍຂອງຜົນງານຫັດຖະກຳລາວໃຫ້ແກ່ຄົນຍີ່ປຸ່ນ ແລະ ທ່ານນາງ ຄິໂຢໂກະ ຢາຊຸອິ ຕົວແທນຈາກອົງການກອງທຶນຫໍສະໝຸດ ເພື່ອເດັກນ້ອຍລາວທີ່ອາໄສຢູ່ເຂດພູສູງ ແລະ ຍັງໄດ້ປະກອບສ່ວນເຂົ້າສູ່ກິດຈະກຳການເລົ່າເລື່ອງ ແລະ ນິທານພື້ນບ້ານຂອງຊົນເຜົ່າມົ້ງ ແລະ ພິມປຶ້ມກ່ຽວກັບວັດທະນະທຳລາວ ແລະ ຊົນເຜົ່າມົ້ງອີກດ້ວຍ.
