ອາຫານທີ່ເຮັດໃຫ້ຮ່າງກາຍອົບອຸ່ນຫລາຍຂື້ນໃນຍາມໜາວ
ໃນຍາມໜາວອາກາດເຢັນ ຮ່າງກາຍຈະບໍ່ສະບາຍໄດ້ງ່າຍ ເນື່ອງຈາກຄວາມເຢັນ ແລະ ຄວາມແຫ້ງໃນຍາມໜາວເຮັດໃຫ້ເຊື້ອໄວຣັສຕ່າງໆມີສະພາບຄົງໂຕ ແລະ ແຜ່ພັນໄດ້ໄວ ສັງເກດໄດ້ວ່າໄຂ້ຫວັດມັກລະບາດຫລາຍໃນຍາມໜາວ ອີກເຫດຜົນໜຶ່ງກໍຄືຮ່າງກາຍຄົນເຮົາ ໂດຍສະເພາະເດັກນ້ອຍ ແລະ ຜູ້ເຖົ້າ ມີພູມຕ້ານທານທີ່ບໍ່ດີພຽງພໍ ເມື່ອສຳຜັດກັບອາກາດໜາວເຢັນ ຮ່າງກາຍຈຶ່ງບໍ່ສາມາດປັບສະພາບໄດ້ທັນ ເຮັດໃຫ້ຮ່າງກາຍອ່ອນແອ ແລະ ຮັບເຊື້ອຕ່າງໆເຂົ້າສູ່ຮ່າງກາຍໄດ້ງ່າຍໆ ເຊິ່ງອາຫານກໍເປັນໂຕຊ່ວຍໜຶ່ງທີ່ເຮັດໃຫ້ຮ່າງກາຍເກີດຄວາມອົບອຸ່ນ ແລະ ຫລຸດຄວາມໜາວເຢັນໃນຍາມໜາວລົງໄດ້.
– ອາຫານໃນກຸ່ມທັນຍາພືດ : ອາຫານກຸ່ມນີ້ຈະລວມເຖິງແກ່ນພືດທັງໝົດ ເຊິ່ງເຕັມໄປດ້ວຍຄຸນຄ່າທາງອາຫານ, ວິຕາມິນ ແລະ ແຮ່ທາດຕ່າງໆຫລວງຫລາຍ, ໄຍອາຫານທີ່ຊ່ວຍໃນການຍ່ອຍ, ງາ ຂາວ, ງາດຳ, ໝາກອຶ.
– ອາຫານໃນກຸ່ມຖົ່ວເປືອກແຂງ : ອາຫານກຸ່ມນີ້ມີໄຂມັນສູງ ແຕ່ເປັນໄຂມັນທີ່ດີຕໍ່ຮ່າງກາຍ ຈະຊ່ວຍຫລຸດໂອກາດເປັນພະຍາດຫົວໃຈ, ໃຫ້ພະລັງງານສູງ ເຊິ່ງຊ່ວຍໃຫ້ຮ່າງກາຍຮູ້ສຶກອົບອຸ່ນຂຶ້ນ ນອກຈາກນີ້ຍັງມີສານຕ້ານອະນຸມູນອິດສະລະທີ່ຊ່ວຍຫລຸດຄວາມສ່ຽງຕໍ່ການເກີດພະຍາດມະເຮັງໃນບາງອະໄວຍະວະໄດ້ ໂດຍສະເພາະແມ່ນຖົ່ວອາວມັອນ, ຖົ່ວດິນ ຫລື ຖົ່ວວອນນັດ.
– ອາຫານໃນກຸ່ມຊີ້ນສັດ : ຈາກການສຶກສາພົບວ່າອາຫານທີ່ມີໄຂມັນສູງຈະຊ່ວຍເຮັດໃຫ້ຮ່າງກາຍເກີດຄວາມອຸ່ນໄດ້ດີ ແຕ່ໃນຊີ້ນສັດສ່ວນຫລາຍຈະມີໄຂມັນປະເພດອີ່ມໂຕ ເຊິ່ງເປັນໄຂມັນທີ່ບໍ່ດີຕໍ່ຮ່າງກາຍ ເຮັດໃຫ້ເກີດພະຍາດໄຂມັນໃນເລືອດຕາມມາໄດ້, ແຕ່ຈະມີໄຂມັນສັດບາງຊະນິດທີ່ດີຕໍ່ຮ່າງກາຍ ເຊັ່ນ : ປາທະເລ ແລະ ສັດບາງຊະນິດທີ່ມີໄຂມັນອີ່ມໂຕຕໍ່າ ເຊັ່ນ : ປາທະເລນຳ້ເລິກ, ປາສະຫວາຍ, ຊີ້ນແບ້, ຊີ້ນແກະ, ໄກ່ງວງ.
– ອາຫານໃນກຸ່ມເຄື່ອງປຸງ ແລະ ພືດສະໝຸນໄພ : ຂີງ ເປັນພືດລົດຊາດຮ້ອນ ຊ່ວຍໃຫ້ຄວາມອົບອຸ່ນແກ່ຮ່າງກາຍ ເຮັດໃຫ້ລະບົບພູມຕ້ານທານດີຂຶ້ນ, ຫລຸດການເກີດໄຂ້ຫວັດ ຕາມຕຳລາແພດແຜນບູຮານໃຊ້ຂີງທັງດິບ ແລະ ແຫ້ງເພື່ອແກ້ໄຂ້ຫວັດ, ແກ້ອາການເຈັບຫົວ ແລະ ແກ້ໜາວ. ວິທີກິນແມ່່ນເອົາຂີງມາຕົ້ມແລ້ວດື່ມນຳ້ຂີງກໍເຮັດໃຫ້ຮ່າງກາຍອົບອຸ່ນຂຶ້ນໄດ້.
– ຜັກທຽມ : ຄວາມຮ້ອນຂອງຜັກທຽມຊ່ວຍເຮັດໃຫ້ຮ່າງກາຍອົບອຸ່ນຂຶ້ນ ຫາກເປັນຜັກທຽມດິບ ຍິ່ງມີນຳ້ມັນຫອຍລະເຫີຍຫລາຍກ່ວາ. ນອກຈາກນີ້ ຍັງສຶກສາພົບວ່າສານໃນຜັກທຽມຊ່ວຍຂ້າເຊື້ອແບັກທີີເຣຍ ເຊິ່ງເປັນສາເຫດຂອງການເກີດອາການຄໍອັກເສບ ແລະ ພະຍາດໄຂ້ຫວັດໃນຍາມໜາວໄດ້.
– ຫັວຜັກບົ່ວ : ຕຳລາແພດ ທັງຕາເວັນອອກ ແລະ ຕາເວັນຕົກ ນິຍົມໃຊ້ຫົວຜັກບົ່ວໃນການປິ່ນປົວພະຍາດ ເພາະມີຄຸນສົມບັດ ເຮັດໃຫ້ຮ່າງກາຍອົບອຸ່ນ ເພີ່ມພູມຕ້ານທານພະຍາດໃຫ້ແກ່ຮ່າງກາຍ, ແຕ່ຄວນລະວັງເພາະຫາກກິນຫລາຍເກີນໄປອາດເກີດອາ ການຮ້ອນໃນໄດ້.
– ພິກໄທ ແລະ ໝາກເຜັດ : ຍ້ອນຄຸນສົມບັດເຜັດຮ້ອນ ຈຶ່ງຊ່ວຍໃຫ້ຈະເລີນອາຫານ ແລະ ໄລ່ເຫື່ອ ຮ່າງກາຍຈຶ່ງຮູ້ສຶກອົບອຸ່ນ.
