ຜົນຈັບສະຫລາກຮອບ 16 ທີມ ຢູຟາ ແຊ້ມປ້ຽນລີກ
ຜົນການຈັບສະຫລາກບານເຕະ ຢູຟາ ແຊ້ມປ້ຽນລີກ ຮອບ 16 ທີມສຸດທ້າຍ ຢູ່ສຳນັກງານໃຫຍ່ຂອງສະຫະພັນບານເຕະເອີຣົບ (ຢູຟາ) ປະເທດສະວິດ ໃນວັນທີ 11 ທັນວານີ້ ຜົນປາກົດວ່າ: ຣິລ ມາດຣິດ ຍັກໃຫຍ່ຈາກ ລາລີກາ ສະເປນ ແຊ້ມເກົ່າ 2 ສະໄໝ ພົບເສິກໜັກເມື່ອຖືກຈັບມາພົບກັບ ປາຣີສ ແຊງແຊກແມງ ທີມມະຫາເສດຖີຈາກ ລີກ ເອິງ ຝຣັ່ງ. ຂະນະທີ່ ເຊລຊີ ແຊ້ມພຣີເມຍລີກ ອັງກິດ ງານໜັກເຊັ່ນກັນເມື່ອໂຄຈອນມາພົບກັບ ບາເຊໂລນາ ມະຫາອຳນາດບານເຕະແຫ່ງ ລາລີກາ.
ທາງດ້ານ ທອດແນມ ຮອດສະເປີ ພົບງານຊ້າງເຊັ່ນກັນ ຫລັງຖືກຈັບມາພົບກັບ ຢູເວນຕຸສ ຍັກໃຫຍ່ຈາກອີຕາລີ ເຊິ່ງເປັນຮອງແຊ້ມເກົ່າຂອງຖ້ວຍໃບນີ້. ຂະນະທີ່ ແມນເຊສເຕີ ຢູໄນເຕັດ, ແມນເຊສເຕີ ຊິຕີ້ ລວມທັງ ລີເວີພູລ ພົບງານບໍ່ໜັກ ໂດຍ ແມນເຊສເຕີ ຢູໄນເຕັດ ຖືກຈັບພົບກັບ ເຊບີຢາ ທີມຈາກລີກສະເປນ. ຂະນະທີ່ ແມນເຊສເຕີ ຊິຕີ້ ພົບກັບ ບາເຊິລ ທີມດັງຈາກສະວິດ, ສ່ວນ ລີເວີພູລ ພົບກັບ ປໍໂຕ ຍອດທີມຈາກລີກໂປຣຕຸເກສ.
ສະຫລຸບຜົນການຈັບສະຫລາກຮອບ 16 ທີມສຸດທ້າຍ ຢູຟາ ແຊ້ມປ້ຽນລີກ: ຢູເວນຕຸສ-ທອດແນມ ຮອດສະເປີ, ບາເຊິລ-ແມນເຊສເຕີ ຊິຕີ້, ປໍໂຕ-ລີເວີພູລ, ເຊບີຢາ-ແມນເຊສເຕີ ຢູໄນເຕັດ, ຣີລ ມາດຣິດ-ປາຣີສ ແຊງແຊກແມງ, ຊັກຕາ ໂດເນກ-ໂຣມາ, ເຊລຊີ-ບາເຊໂລນາ, ບາເຢິນ ມິວນິກ-ເບຊິກຕັສ ໂດຍການແຂ່ງຂັນນັດທຳອິດຈະແຂ່ງກັນໃນວັນທີ 13-14 ແລະ 20-21 ກຸມພາ, ສ່ວນການແຂ່ງຂັນນັດທີ 2 ຈະແຂ່ງກັນໃນວັນທີ 6-7 ແລະ 13-14 ມີນາ 2018.
