ຕິດຕາມກອງປະຊຸມຄວາມໝັ້ນຄົງ ອາຊີ-ປາຊີຟິກ Shanri-La Dialogue 2025 ຢູ່ສິງກະໂປ


ກອງປະຊຸມສຸດຍອດດ້ານຄວາມໝັ້ນຄົງທີ່ສໍາຄັນທີ່ສຸດຂອງພາກພື້ນ ອາຊີ-ປາຊີຟິກ ກໍາລັງຈະເລີ່ມຂຶ້ນໃນອາທິດນີ້ແລ້ວ ນັ້ນຄືເວທີ Shangri-La Dialogue 2025 ເຊິ່ງຈັດໂດຍສະຖາບັນ IISS (International Institute for Strategic Studies) ໃນເວລານີ້ກໍາລັງກຽມຕ້ອນຮັບຜູ້ນໍາດ້ານປ້ອງກັນປະເທດຈາກທົ່ວໂລກ ໂດຍກອງປະຊຸມຈະມີຂຶ້ນລະຫວ່າງວັນທີ 30 ພຶດສະພາ – 1 ມິຖຸນາ 2025 ຢູ່ປະເທດສິງກະໂປ.
ເວທີນີ້ບໍ່ພຽງເປັນບ່ອນລວມຕົວຂອງລັດຖະມົນຕີປ້ອງກັນປະເທດ, ຜູ້ນໍາທະຫານ, ນັກການທູດ ແລະ ຜູ້ຊ່ຽວຊານດ້ານຄວາມໝັ້ນຄົງຈາກອາຊີ-ປາຊີຟິກ, ເອີຣົບ ແລະ ອາເມລິກາເໜືອເທົ່ານັ້ນ, ແຕ່ຍັງເປັນພື້ນທີ່ “ເຈລະຈາທາງຍຸດທະສາດ” ເພື່ອຮັບມືຄວາມທ້າທາຍຮອບດ້ານຂອງພາກພື້ນໃນໄລຍະເວລາທີ່ການເມືອງໂລກກໍາລັງປ່ຽນຜ່ານຢ່າງວ່ອງໄວ.
ບຸກຄົນສໍາຄັນທີ່ຢືນຢັນເຂົ້າຮ່ວມ ບໍ່ວ່າຈະເປັນທ່ານ ເອັມມານູເອລ ມາຄຣົງ ປະທານາທິບໍດີຝຣັ່ງ ເຊິ່ງທ່ານຈະກ່າວສູນທອນພົດເປີດກອງປະຊຸມໃນວັນທີ 30 ພຶດສະພາ ໂດຍຖືເປັນຄັ້ງທໍາອິດທີ່ຜູ້ນໍາຝຣັ່ງຂຶ້ນກ່າວໃນເວທີນີ້. ພ້ອມຄາດໝາຍວ່າຈະສະທ້ອນວິໄສທັດຂອງຝຣັ່ງໃນຖານະປະເທດເອີຣົບທີ່ມີບົດບາດໃນອິນໂດ-ປາຊີຟິກ.
ນອກຈາກນີ້, ຍັງມີທ່ານ ອັນວາ ອິບຣາຮິມ ນາຍົກລັດຖະມົນຕີມາເລເຊຍ ຈະກ່າວຖະແຫລງພິເສດ ສະທ້ອນມຸມມອງຂອງປະເທດກໍາລັງພັດທະນາໃນພາກພື້ນອາຊີຕາເວັນອອກສຽງໃຕ້ ແລະ ທ່ານ ພີດ ເຮກເຊ ລັດຖະມົນຕີປ້ອງກັນປະເທດອາເມລິກາ ເປັນອີກໜຶ່ງຜູ້ມີບົດບາດສໍາຄັນທີ່ຢືນຢັນເຂົ້າຮ່ວມ ແລະ ຈະຂຶ້ນເວທີຫາລືກັບຜູ້ນໍາຈາກທົ່ວພາກພື້ນ.
ຂະນະທີ່ຫົວຂໍ້ຕົ້ນຕໍທີ່ໜ້າຕິດຕາມໃນປີນີ້ ໄດ້ແກ່:
- ຄວາມໝັ້ນຄົງໃນມະຫາສະໝຸດອິນເດຍ (Securing the Indiam Ocean)
- ບັນຫາການປົກປ້ອງອະທິປະໄຕທາງທະເລ, ປາບປາມການລະເມີດກົດໝາຍເຊັ່ນ: ການປະມົງຜິດກົດໝາຍ, ລັກລອບຂົນຢາເສບຕິດ ແລະ ການຄ້າມະນຸດໃນນ່ານນໍ້າເສດຖະກິດສໍາຄັນຂອງໂລກ.
- ການແກ້ໄຂຄວາມສ່ຽງຈາກການແຜ່ຂະຫຍາຍອາວຸດນິວເຄຼຍໃນພາກພື້ນອາຊີ-ປາຊີຟິກ
- ການຫາກົນໄກຄວບຄຸມ ແລະ ຫລຸດອາວຸດນິວເຄຼຍ ທ່າມກາງຄວາມເຄັ່ງຕຶງລະຫວ່າງລັດມະຫາອໍານາດນິວເຄຼຍຫລາຍປະເທດໃນພາກພື້ນ.
- ການແຂ່ງຂັນລະຫວ່າງມະຫາອໍານາດ (Great Power Competition)
- ການປະທະທາງຍຸດທະສາດລະຫວ່າງອາເມລິກາ ແລະ ຈີນໃນພາກພື້ນ ລວມທັງບົດບາດຂອງປະເທດຕ່າງໆ ໃນການຮັກສາຄວາມສົມດູນ.
ເວທີ Shangri-La Dialogue ຖືກຕິດຕາມຫລາຍໃນປີນີ້ ເພາະເກີດຂຶ້ນໃນໄລຍະທີ່ອິນໂດ-ປາຊີຟິກກໍາລັງເບາະບາງ ແລະ ການຫາລືຄັ້ງນີ້ອາດກໍານົດທິດທາງຄວາມໝັ້ນຄົງຂອງພາກພື້ນໃນອະນາຄົດອັນໃກ້ນີ້.
ອ້າງອີງ: