ຂົວມິດຕະພາບ ລາວ-ໄທ ແຫ່ງທີ V ບໍລິຄຳໄຊ-ບຶງການ ສໍາເລັດແລ້ວ 98.4%, ຄາດວ່າຈະເປີດນໍາໃຊ້ໃນທ້າຍປີ 2025 ນີ້
ທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງຂົວຂ້າມນໍ້າຂອງມິດຕະພາບ ລາວ-ໄທ ແຫ່ງທີ V ບໍລິຄໍາໄຊ-ບຶງການ ໄດ້ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນນີ້ວ່າ: ມາຮອດປັດຈຸບັນ, ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V ການກໍ່ສ້າງໂດຍລວມສໍາເລັດແລ້ວ 98.4%, ຄາດວ່າຈະເປີດນໍາໃຊ້ຂົວດັ່ງກ່າວ ຢ່າງເປັນທາງການ ໃນທ້າຍປີ 2025.
ຂົວມິດຕະພາບ ລາວ-ໄທ ແຫ່ງທີ V ມີຄວາມຍາວ 1,350 ແມັດ, ເບື້ອງລາວ ມີລວງຍາວ 535 ແມັດ, ເບື້ອງໄທ 815 ແມັດ, ກວ້າງ 17.40 ແມັດ ມີ 4 ເລນ, ມີ 2 ຊ່ອງຈະລາຈອນ, ມີຄູກາງ ແລະມີທາງຄົນຍ່າງສອງເບື້ອງ. ຂົວແຫ່ງນີ້ເປັນຂົວເຊື່ອມຕໍ່ແລວເສດຖະກິດ ຕາເວັນອອກ-ຕາເວັນຕົກ ລະຫວ່າງ ໄທ-ລາວ-ສສ ຫວຽດນາມ ຕື່ມອີກ.
ພາຍຫລັງ ເປີດໃຊ້ຢ່າງເປັນທາງການ ຈະເຮັດໃຫ້ການໄປ-ມາຫາສູ່ ຂອງປະຊາຊົນ ສອງປະເທດ ລາວ-ໄທ-ຫວຽດນາມ ສະດວກສະບາຍຂຶ້ນກວ່າເກົ່າ ທັງຈະເຮັດໃຫ້ປະຊາຊົນເຂດດັ່ງກ່າວ ມີວຽກເຮັດງານທຳ ແລະ ອື່ນໆ.
ທີ່ມາ: ໜັງສືພິມປະເທດລາວ
