ລັດຖະມົນຕີກະຊວງການຕ່າງປະເທດລາວ ສົ່ງສານສະແດງຄວາມເຫັນໃຈ ຕໍ່ເຫດການເຮືອບິນອິນເດຍຕົກ
ວັນທີ 13 ມິຖຸນາ 2025 ນີ້ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈ ເຖິງ ທ່ານ ສຸບຣາມານຍໍາ ໃຈຊັງເກີ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ອິນເດຍ ຕໍ່ເຫດການອຸບັດເຫດເຮືອບິນຂອງສາຍການບິນອິນເດຍ ຖ້ຽວບິນ AI171 ຕົກຢູ່ເມືອງອາເມດາບັດ, ລັດກູຈະຮັດ ຂອງປະເທດອິນເດຍ.
ເນື້ອໃນສານໄດ້ລະບຸວ່າ: ຂ້າພະເຈົ້າ ໄດ້ຮັບຂ່າວດ້ວຍຄວາມເສົ້າສະຫລົດໃຈ ຕໍ່ເຫດການອຸບັດເຫດເຮືອບິນຂອງສາຍການບິນອິນເດຍ, ຖ້ຽວບິນ AI171 ຕົກຢູ່ເມືອງອາເມດາບັດ, ລັດກູຈະຮັດ ຂອງປະເທດອິນເດຍ ໃນວັນທີ 12 ມິຖຸນາ 2025 ທີ່ຜ່ານມາ, ອັນໄດ້ເຮັດໃຫ້ຜູ້ ໂດຍສານ ແລະ ນັກບິນເສຍຊີວິດ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະ ລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈ ແລະ ໄວ້ອາໄລຢ່າງສຸດຊຶ້ງມາຍັງ ທ່ານ ແລະ ຜ່ານທ່ານ ໄປຍັງ ລັດຖະບານ ແລະ ປະຊາຊົນ ອິນເດຍ ໂດຍສະເພາະຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍຈາກອຸບັດເຫດໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ລັດຖະບານອິນເດຍ ແລະ ປະຊາຊົນອິນເດຍ ໂດຍສະເພາະຄອບຄົວທີ່ໄດ້ຮັບເຄາະຮ້າຍ ຈະຜ່ານຜ່າຄວາມໂສກເສົ້າ ແລະ ສະພາບຄວາມຫຍຸ້ງຍາກໃນຄັ້ງນີ້ໂດຍໄວ.
