ກອງປະຊຸມສະຖິຕິທົ່ວປະເທດເນັ້ນຜະລິດຂໍ້ມູນເພື່ອການພັດທະນາແບບຍືນຍົງ
ກອງປະຊຸມສະຖິຕິທົ່ວປະເທດປະຈຳປີ 2017 ໄດ້ຈັດຂຶ້ນໃນວັນທີ 13 ກຸມພານີ້ຢູ່ແຂວງໄຊຍະບູລີ, ໄດ້ເນັ້ນຫົວຂໍ້: ການຜະລິດຂໍ້ມູນສະຖິຕິທາງການ ເພື່ອຕິດຕາມ ແລະ ປະເມີນຜົນແຜນພັດທະນາເສດຖະກິດ-ສັງຄົມ ແລະ ເປົ້າໝາຍການພັດທະນາແບບຍືນຍົງ.
ທ່ານຮອງເຈົ້າແຂວງໄຊຍະບູລີ ກ່າວວ່າ: ກອງປະຊຸມສຳມະນາຄັ້ງນີ້, ແມ່ນມີຄວາມໝາຍສຳຄັນເປັນຢ່າງຍິ່ງຕໍ່ຂະແໜງສະຖິຕິໃນການທົບທວນຖອດຖອນບົດຮຽນດ້ານວິຊາການ, ດ້ານການຈັດຕັ້ງປະຕິບັດ ແລະ ພັດທະນາວຽກງານສະຖິຕິໃຫ້ດີຂຶ້ນ, ແນໃສ່ຮັບປະກັນການຕອບສະໜອງຂໍ້ມູນສະຖິຕິໃຫ້ແກ່ການວາງແຜນນະໂຍບາຍ, ແຜນການ, ການຄົ້ນຄ້ວາວິໄຈ ແລະ ຜູ້ຊົມໃຊ້ທັງພາກລັດ ແລະ ເອກະຊົນ. ພ້ອມໄດ້ລົງເລິກການສະຫລຸບຕີລາຄາ ການຈັດຕັ້ງປະຕິບັດວຽກງານຂອງລະບົບສະຖິຕິແຫ່ງຊາດປີ 2017 ແລະ ທິດທາງປີ 2018-2019, ນັບທັງການປະຕິບັດກົດໝາຍວ່າດ້ວຍສະຖິຕິສະບັບປັບປຸງ ເປັນຍຸດທະສາດພັດທະນາລະບົບສະຖິຕິແຫ່ງຊາດແບບຍືນຍົງ 2016-2025 ແລະ ວິໄສທັດຮອດປີ 2030. ນອກນີ້, ຍັງມີການແລກປ່ຽນການຜະລິດຂໍ້ມູນ ເພື່ອສະໜອງການຄິດໄລ່ຕົວຊີ້ບອກການຕິດຕາມ ແຜນພັດທະນາເສດຖະກິດ-ສັງ ຄົມ ແລະ ເປົ້າໝາຍການພັດທະນາແບບຍືນຍົງ (SDGI), ລວມເຖິງວຽກງານປັບປຸງວຽກສະຖິຕິຂັ້ນທ້ອງຖິ່ນ.
ກອງປະຊຸມຄັ້ງນີ້, ແມ່ນເພື່ອຢັ້ງຢືນ ແລະ ຮັບປະກັນຕໍ່ການຜະລິດບັນດາຕົວ ຊີ້ບອກດ້ານ ສະຖິຕິ, ໃຫ້ມີຄຸນນະພາບ ແລະ ຫຍັບເຂົ້າສູ່ມາດຕະຖານສາກົນ, ມີກົນໄກ, ມີລະບອບ, ລະບຽບ ແລະ ວິທີການເກັບກຳຂໍ້ມູນທີ່ຖືກຕ້ອງ, ເປັນເອກະພາບແຕ່ຂັ້ນສູງກາງເຖິງທ້ອງຖິ່ນ, ຮັບປະກັນການສະໜອງຂໍ້ມູນທາງດ້ານເສດຖະກິດ-ສັງຄົມ ໃນແຕ່ລະໄລຍະ, ເຮັດໃຫ້ການປັບປຸງວິທີເກັບກຳຂໍ້ມູນສະຖິຕິ, ການຜະລິດ, ປຸງແຕ່ງ ແລະ ວິໄຈ ດ້ວຍການນຳໃຊ້ເຄື່ອງມືທີ່ທັນສະໄໝຢ່າງເປັນລະບົບຄົບຊຸດ.
