ວຽກງານວັດທະນະທຳຍັງມີຫລາຍຈຸດຈະຕ້ອງໄດ້ປັບປຸງແກ້ໄຂ
ທ່ານຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ບົວເງິນ ຊາພູວົງ ໄດ້ມີຄໍາເຫັນຕໍ່ກອງປະຊຸມສະຫລຸບວຽກງານວັດທະນະທຳທົ່ວປະເທດປະຈຳປີ 2017 ທີ່ຈັດຂຶ້ນໃນວັນທີ 15 ກຸມພານີ້ວ່າ: ໃນຕໍ່ໜ້ານີ້, ວຽກງານວັດທະນະທຳ ແມ່ນຍັງມີຫລາຍຈຸດທີ່ຈະຕ້ອງໄດ້ປັບປຸງ ແລະ ແກ້ໄຂ, ໂດຍສະເພາະແມ່ນກົດໝາຍ ແລະ ນິຕິກຳກ່ຽວກັບການຄຸ້ມຄອງລັດ-ຄຸ້ມຄອງສັງຄົມດ້ານວັດທະນະທຳຍັງບໍ່ທັນເປັນລະບົບຄົບຊຸດ, ຂະນະດຽວກັນການເຜີຍແຜ່ນິຕິກໍາທີ່ມີແລ້ວກໍຍັງບໍ່ທັນກວ້າງຂວາງ, ທົ່ວເຖິງ ແລະ ການຕິດຕາມກວດກາກໍຍັງບໍ່ທັນເຂັ້ມງວດ, ເຊິ່ງສະແດງອອກຄືຍັງມີການເຄື່ອນໄຫວທີ່ຝືນກັບລະບຽບກົດໝາຍ ແລະ ມູນເຊື້ອວັດທະນະທຳອັນດີງາມຂອງຊາດ, ພາໃຫ້ເກີດມີສຽງວິຈານຈາກສັງຄົມບໍ່ໜ້ອຍໃນຜ່ານມາ. ນອກນີ້, ການປະດິດຄິດແຕ່ງບົດປະພັນວັນນະຄະດີ, ເພັງຮ້ອງ, ຂັບລຳ, ລະຄອນ, ຮູບເງົາ ແລະ ລາຍການສະແດງຕ່າງໆ ຈຳນວນໜຶ່ງຍັງບໍ່ທັນສອດຄ່ອງກັບແນວທາງນະໂຍບາຍວັດທະນະທໍາຂອງພັກໃນໄລຍະໃໝ່, ຮູບການ ແລະ ເນື້ອໃນຍັງບໍ່ມີຄວາມອຸດົມສົມບູນ, ບໍ່ຫລາກຫລາຍສີສັນ ແລະ ບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການຂອງສັງຄົມ. ອັນສໍາຄັນໜຶ່ງແມ່ນຂອດປະສານສົມທົບໃນການຄຸ້ມຄອງ ແລະ ແກ້ໄຂປາກົດການຫຍໍ້ທໍ້ທາງດ້ານວັດທະນະທຳ-ສັງຄົມລະຫວ່າງພາກສ່ວນຕ່າງໆຍັງບໍ່ທັນເລິກເຊິ່ງກົມກຽວ ແລະ ເຂັ້ມງວດ, ສະພາບການນຳເຂົ້າ-ສົ່ງອອກ ສິລະປິນ ຍັງມີລັກສະນະຊະຊາຍ, ຍັງບໍ່ທັນມີຂໍ້ກຳນົດທີ່ເປັນລັກສະນະເອກະພາບ. ສະນັ້ນໃນຕໍ່ໜ້ານີ້, ຂໍຮຽກຮ້ອງໃຫ້ຂະແໜງການກ່ຽວຂ້ອງ ຈົ່ງເພີ່ມທະວີຄວາມເອົາໃຈໃສ່ໃນການພັດທະນາວຽກງານດ້ານວັດທະນະທໍາໃຫ້ມີຄຸນນະພາບຫລາຍກວ່າເກົ່າ, ໂດຍສະເພາະເອົາໃຈໃສ່ຕິດຕາມປະເມີນຜົນ, ການປູກຈິດສຳນຶກໃຫ້ຄົນຮຸ້ນຫລັງໄດ້ຮູ້, ຮັກ, ປົກປັກຮັກສາ ແລະ ເສີມຂະຫຍາຍວັດທະນະທຳອັນດີງາມຂອງຊາດ, ເພື່ອສ້າງຄ່ານິຍົມໃຫ້ມີຄວາມຮັກ ແລະ ຫວງແຫນປະເທດຊາດບ້ານເມືອງສູງຂຶ້ນກວ່າເກົ່າ.
