ທີ່ດິນເປັນບັນຫາສັງຄົມນຳສະເໜີ ຫລາຍຜ່ານສາຍດ່ວນລັດຖະບານ
ເມື່ອທ້າຍອາທິດຜ່ານມານີ້, ຫ້ອງວ່າການລັດຖະບານໄດ້ຈັດກອງປະຊຸມ
ຖອດຖອນບົດຮຽນວຽກງານສາຍດ່ວນຂອງລັດຖະບານ 1516 ໂດຍການເປັນ
ປະທານຂອງທ່ານຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຫົວໜ້າຄະນະຮັບຜິດຊອບຕອບໂທລະສັບສາຍດ່ວນ, ພ້ອມດ້ວຍພາກສ່ວນກ່ຽວຂ້ອງຕ່າງໆເຂົ້າຮ່ວມ ເພື່ອຕີລາຄາຄືນຜົນການຈັດຕັ້ງປະຕິບັດວຽກງານສາຍດ່ວນຂອງລັດຖະບານ
ພາຍຫລັງໄດ້ເປີດນໍາໃຊ້ແຕ່ວັນທີ 14 ພະຈິກ 2016 ມາ
ຮອດປັດຈຸບັນ, ມີປະຊາຊົນ ແລະ ພາກສ່ວນຕ່າງໆໃນສັງຄົມໄດ້ສະເໜີບັນຫາ
ຕ່າງໆຜ່ານສາຍດ່ວນລັດຖະບານທັງໝົດ 2.700 ຄຳຖາມ, ໃນນັ້ນປະເພດຂໍຄຳແນະນໍາ ແລະ ປຶກສາມີ 2.250 ຄຳຖາມ ແລະ ບັນຫາພົນເດັ່ນກວ່າໝູ່ແມ່ນບັນຫາທີ່ດິນມີ 735 ຄຳຖາມ, ບັນຫາການປະຕິບັດຄຳຕັດສິນຂອງສານມີ 458 ຄຳຖາມ, ບັນຫາຢາເສບຕິດມີ 375 ຄຳຖາມ, ເລື່ອງເງິນເດືອນ 380 ຄຳຖາມ, ການສໍ້ລາດບັງຫລວງ 200 ຄຳຖາມ, ການລັກລອບຕັດໄມ້ 266 ຄຳຖາມ, ບັນຫາເສັ້ນທາງ 186 ຄຳຖາມ ແລະ ການຈັດສັນຕົວເລກລັດຖະກອນ 100 ຄຳຖາມ, ປັດຈຸບັນໄດ້ຮັບຄຳຕອບຈາກຂະແໜງການກ່ຽວຂ້ອງແລ້ວ
ປະມານ 100 ກວ່າສະບັບ ແລະ ຍັງບໍ່ໄດ້ຊີ້ແຈງ 144 ຄຳຖາມ.
