ປິດການແຂ່ງຂັນກິລາບານບ້ວງ 3 ຊາດລຸ່ມແມ່ນ້ຳຂອງ
ທ້າຍອາທິດຜ່ານມານີ້, ທີ່ສະໜາມກິລາແຂວງຈຳປາສັກໄດ້ປິດການແຂ່ງຂັນກິລາບານບ້ວງຮຸ່ນອາຍຸຕ່ຳກວ່າ 18 ປີ 3 ຊາດລຸ່ມແມ່ນ້ຳຂອງ ໂດຍການເຂົ້າຮ່ວມມີທ່ານ ອາລົງກອນ ເພັງສະຫວັນ ເລຂາທິການສະຫະພັນບານບ້ວງແຫ່ງຊາດລາວ, ຄະນະປະທານສະຫະພັນບານບ້ວງແຂວງຈຳປາສັກ, ບັນດາຄູຝຶກ, ນັກກິລາ.
ທ່ານນາງ ອໍລະດີ ຈິນດາໄມ ຮອງປະທານສະຫະພັນບານບ້ວງແຂວງຈຳປາສັກ ກ່າວວ່າ: ການແຂ່ງຂັນກິລາບານບ້ວງ 3 ຊາດແມ່ນ້ຳຂອງປະກອບທີມຍິງ-ຊາຍຈາກນະຄອນຫລວງວຽງຈັນ, ທີມ ຍິງ-ຊາຍແຂວງຈຳປາສັກ, ທີມຍິງ-ຊາຍກຳປູເຈຍ ແລະ ທີມຍິງ-ຊາຍຈາກໄທ. ຜ່ານການແຂ່ງຂັນປາກົດວ່າ: ທີມຊາຍທີ 1 ໄດ້ແກ່ກຳປູເຈຍ, ທີ 2 ໄທ ແລະ ທີ 3 ເຈົ້າພາບແຂວງຈຳປາສັກ. ສຳລັບທີມຍິງ ທີ 1 ໄທ, ທີ 2 ກຳປູເຈຍ ແລະ ທີ 3 ນະຄອນຫລວງວຽງຈັນ. ແນວໃດກໍຕາມ ການແຂ່ງຂັນຄັ້ງນີ້ບໍ່ໄດ້ເນັ້ນເຖິງຜົນໄດ້ ຫລື ເສຍ, ແຕ່ໄດ້ເນັ້ນເຖິງການແລກປ່ຽນປະສົບການລະຫວ່າງນັກກິລາທັງສາມປະເທດເຊິ່ງກັນ ແລະ ກັນ ເພື່ອເຮັດໃຫ້ວົງການກິລາບານບ້ວງລາວມີການພັດທະນາດີຂຶ້ນ ໂດຍສະເພາະແມ່ນນັກກິລາບານບ້ວງຂອງແຂວງຈຳປາສັກໃຫ້ມີປະສົບການຫລາຍຂຶ້ນ ເພື່ອກະກຽມຄວາມພ້ອມເຂົ້າຮ່ວມການແຂ່ງຂັນກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບທ້າຍປີນີ້ ໃຫ້ຕິດໜຶ່ງໃນສາມຄືຄັ້ງທີ 10 ທີ່ແຂວງອຸດົມໄຊເຈົ້າພາບ (ໄດ້ຫລຽນທອງ).
ນອກຈາກທີ່ກ່າວມານັ້ນແລ້ວ, ຍັງເປັນການສົ່ງເສີມການທ່ອງທ່ຽວລາວປີ 2018 ນີ້ ໃຫ້ມີບັນຍາ ກາດຟົດຟື້ນ ທັງປະກອບສ່ວນດຶງດູດນັກທ່ອງທ່ຽວເຂົ້າມາທ່ຽວໃນປີທ່ອງທ່ຽວໃຫ້ບັນລຸຕາມເປົ້າໝາຍ 5 ເທື່ອຄົນ.
