ຈີນຈະເລີ່ມເກັບພາສີ ສິ່ງແວດລ້ອມໃນເດືອນເມສາ
ທຸລະກິດ ແລະ ອົງການຕ່າງໆກວ່າ 260.000 ແຫ່ງທົ່ວຈີນທີ່ປ່ອຍມົນລະພິດຈະຕ້ອງເລີ່ມຈ່າຍພາສີສິ່ງແວດລ້ອມໃນເດືອນເມສາເປັນຕົ້ນໄປ. ຈາກການລາຍງານຂອງສຳນັກຂ່າວຊິນຮົວ ໃນວັນທີ 28 ກຸມພາ.
ສຳນັກຂ່າວຣອຍເຕີລາຍງານຈາກນະຄອນຫລວງປັກກິ່ງ ປະເທດຈີນ ໃນວັນທີ 28 ກຸມພາວ່າ: ກົດໝາຍພາສີຄຸ້ມຄອງສິ່ງແວດລ້ອມຂອງຈີນທີ່ເລີ່ມມີຜົນບັງຄັບນັບແຕ່ວັນທີ 1 ມັງກອນ ກຳນົດໃຫ້ຜູ້ເສຍພາສີຍື່ນເອກະສານເສຍພາສີທຸກ 3 ເດືອນ ໂດຍໄລຍະທຳອິດຈະເລີ່ມແຕ່ວັນທີ 1 ເມສາທີ່ຈະເຖິງນີ້.
ກົດໝາຍສະບັບໃໝ່ມີເປົ້າໝາຍໃສ່ກຸ່ມທຸລະກິດ ແລະ ສະຖາບັນຕ່າງໆຂອງລັດ ທີ່ປ່ອຍຂອງເສຍຕາມລາຍການທີ່ກຳນົດ ໂດຍກົງເຂົ້າສູ່ສິ່ງແວດລ້ອມ ແລະ ກຳນົດວ່າບໍລິສັດຈະຕ້ອງຈ່າຍພາສີ ສຳລັບການສ້າງມົນລະພິດທາງສຽງ, ມົນລະພິດໃນອາກາດ ແລະ ນ້ຳ.
ພາສີສິ່ງແວດລ້ອມເປັນກໍລະນີຫລ້າສຸດຂອງມາດຕະການທີ່ລັດຖະບານນຳອອກມາໃຊ້ ເພື່ອພະຍາຍາມທຳຄວາມສະອາດສິ່ງແວດລ້ອມໃນປະເທດ ທີ່ໄດ້ຮັບຜົນກະທົບຢ່າງໜັກຫລາຍທົດສະວັດ ຈາກການເຕີບໃຫຍ່ຢ່າງບໍ່ຢຸດຢັ້ງຂອງການພັດທະນາເສດຖະກິດ.
