ລາວຫາລືປັບປຸງການຈັດຕັ້ງຂອງດ່ານຜ່ານແດນທົ່ວປະເທດ
ໃນທ້າຍອາທິດຜ່ານມານີ້, ທີ່ກະຊວງໂຍທາທິການ ແລະ ຂົນສົ່ງ, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ເປັນປະທານກອງປະຊຸມປຶກສາຫາລືວຽກງານການຈັດຕັ້ງ ແລະ ການເຄື່ອນໄຫວຂອງດ່ານຜ່ານແດນໃນທົ່ວປະເທດ ແລະ ໄດ້ຍົກໃຫ້ເຫັນວ່າ: ປັດຈຸບັນ, ສປປ ລາວເຮົາມີດ່ານທັງໝົດ 107 ແຫ່ງ ແລະ ແບ່ງເປັນ 3 ປະເພດຄື: ດ່ານສາກົນມີ 27 ແຫ່ງ, ໃນນັ້ນທາງບົກ 20 ແຫ່ງ, ທາງນ້ຳ 2 ແຫ່ງ, ສະໜາມບິນສາກົນ 4 ແຫ່ງ ແລະ ດ່ານສະຖານີລົດໄຟທ່ານາແລ້ງ 1 ແຫ່ງ. ດ່ານທ້ອງຖິ່ນມີ 32 ແຫ່ງ ແລະ ດ່ານປະເພນີມີ 48 ແຫ່ງ, ຊຶ່ງລ້ວນແຕ່ມີຄວາມສຳຄັນ ເພາະເປັນປະຕູເຂົ້າ-ອອກໃຫ້ແກ່ແຂກຕ່າງປະເທດເຂົ້າມາຢ້ຽມຢາມ ແລະ ທ່ອງທ່ຽວໃນປະເທດເຮົາ, ແຕ່ຂະນະດຽວກັນກໍເຫັນວ່າການຈັດຕັ້ງ ແລະ ການເຄື່ອນໄຫວຂອງບັນດາດ່ານຕ່າງໆຍັງບໍ່ທັນເປັນເອກະພາບກັນນັບແຕ່ສູນກາງຮອດທ້ອງຖິ່ນ, ໂດຍສະເພາະບາງດ່ານມີພະນັກງານຈາກຂະແໜງການຕ່າງໆມາປະຈໍາຫລາຍເກີນໄປ, ເຮັດໃຫ້ສິ້ນເປືອງງົບປະມານ, ບຸກຄະລາກອນ, ເວລາ ແລະ ເຮັດໃຫ້ມີຄວາມຫຍຸ້ງຍາກໃນການຄຸ້ມຄອງປະສານງານ ແລະ ບາງດ່ານຍັງມີໜີ້ສິນຄ່ານ້ຳປະປາ, ໄຟຟ້າ ແລະ ອື່ນໆຫລວງຫລາຍ. ສະນັ້ນ ເພື່ອໃຫ້ລະບົບການຈັດຕັ້ງ ແລະ ການເຄື່ອນໄຫວຂອງດ່ານໃນທົ່ວປະເທດເປັນເອກະພາບກັນ, ລັດຖະບານຈຶ່ງໄດ້ແຕ່ງຕັ້ງຄະນະຮັບຜິດຊອບໃນການຄົ້ນຄວ້າໂຄງປະກອບການຈັດຕັ້ງ, ພາລະບົດບາດ, ສິດ ແລະ ໜ້າທີ່ຂອງແຕ່ລະດ່ານ ລວມທັງຂັ້ນຄຸ້ມຄອງເພື່ອກຳນົດເຂົ້າໃນຮ່າງດຳລັດກ່ຽວກັບການຈັດຕັ້ງ ແລະ ການເຄື່ອນໄຫວຂອງດ່ານໃນຂອບເຂດທົ່ວປະເທດ ເພື່ອຮັບປະກັນການຕິດຕໍ່ພົວພັນເຊື່ອມໂຍງກັບປະເທດໃກ້ຄຽງ ແລະ ສາກົນ, ທັງເປັນການປະກອບສ່ວນເຂົ້າໃນການຊຸກຍູ້ການຂະຫຍາຍຕົວຂອງເສດຖະກິດແຫ່ງຊາດໃຫ້ເຂັ້ມ
ແຂງ.
