ບາງພຶດຕິກຳທີ່ຄູ່ຮັກສ່ວນຫລາຍບໍ່ຢາກອົດທົນ

ພຶດຕິກຳທີ່ຄູ່ຮັກສ່ວນຫລາຍບໍ່ຄ່ອຍພໍໃຈກັນຈົນໃນທີ່ສຸດກໍສາມາດກາຍເປັນທີ່ມາຂອງພຶດຕິກຳທີ່ບໍ່ສາມາດອົດທົນໄດ້ນັ້ນ ຫລັກໆກໍມີຢູ່ບໍ່ເທົ່າໃດຂໍ້ດັ່ງນີ້ :

1. ກິ່ນໂຕ ຫລື ກິ່ນເໝັນຂອງເຄື່ອງນຸ່ງ : ເລື່ອງໃຫຍ່ເລີຍກໍເວົ້າໄດ້ ເຖິງວ່າຈະແຕ່ງໂຕດີ ແຕ່ຖ້າມີກິ່ນໂຕກໍຖືວ່າຈົບ ຫລື ບາງເທື່ອນຸ່ງເຄື່ອງທີ່ມີກິ່ນເໝັນອັບຊຸ່ມຍ່າງໄປໃສທຸກຄົນກໍຕ້ອງເອົາມືບີບດັງ ຫລື ປິ່ນໜ້າໜີໄປຕາມໆກັນ.
2. ມາລະຍາດເທິງໂຕະອາຫານ : ບໍ່ມີໃຜດອກຢາກນັ່ງຮ່ວມໂຕະກັບຄົນທີ່ຫຍຳ້ອາຫານສຽງດັງ ບາງເທື່ອກໍບໍ່ເອົາມືອັດປາກ ຫຍຳ້ຫຍັງຢູ່ຄົນທີ່ນັ່ງນຳເຫັນໝົດ ຫລື ບາງຄົນກໍກິນເຂົ້າແບບຟ້າວຟັ່ງ ຫລື ບາງຄົນກິນໄປເວົ້າໄປນຳ ຫຍຳ້ບໍ່ທັນໝົດ ເສດອາຫານກໍຟົ້ງອອກມາກໍມີ.
3. ຖິ້ມພາລະໄວ້ໃຫ້ສານຕໍ່ : ຍົກໂຕຢ່າງເຊັ່ນ : ຖ້ວຍຊາມກິນແລ້ວກໍເອົາໄປວາງໄວ້ອ່າງ ລໍຖ້າໃຫ້ຄົນມາລ້າງ ບໍ່ລ້າງຈານບໍ່ມີໃຜວ່າດອກ ແຕ່ຂໍໃຫ້ຊ່ວຍເອົາເສດອາຫານທີ່ກິນເຫລືອໄປຖິ້ມໃສ່ຖັງຂີ້ເຫຍື້ອກ່ອນ ເທົ່ານີ້ຄົນເຮັດຕໍ່ກໍພໍໃຈແລ້ວ.
4. ຖິ້ມເສດຜົມໄວ້ໃນອ່າງ : ມັນເບິ່ງໜ້າລັງກຽດ ຖ້າທ່ານຕັດຜົມ, ແຖໜວດ ຫລື ຕັດເລັມໜວດແລ້ວບໍ່ຖິ້ມເສດຂົນເຫລົ່ານັ້ນລົງໃນຖັງຂີ້ເຫຍື້ອ ແຕ່ພັດຖິ້ມມັນໄວ້ໃນອ່າງລ້າງມື ຫລື ອ່າງລ້າງໜ້າ ນອກຈາກຈະເຮັດໃຫ້ທໍ່ຕັນແລ້ວມັນຍັງເບິ່ງໜ້າລັງກຽດ ລອງຄິດເຖິງສະພາບຂອງຄົນທີ່ມາໃຊ້ຕໍ່ໃຜຈະກ້າໃຊ້.
5. ກິ່ນປາກ : ເລື່ອງນີ້ເລື່ອງໃຫຍ່ ເພາະການເວົ້າລົມກັນແມ່ນການສື່ສານຫລັກທີ່ພວກເຮົາທຸກຄົນລ້ວນແຕ່ໃຊ້ກັນ ດັ່ງນັ້ນ ກ່ອນທີ່ຈະລົມກັບໃຜຄວນກວດເບິ່ງໃຫ້ດີກ່ອນ ຫລື ຈະໃຫ້ດີຖູແຂ້ວບ້ວນປາກທຸກເທື່ອຫລັງກິນເຂົ້າກໍຈະດີຫລາຍ, ແຕ່ຖ້າຫາກເຮັດທຸກຢ່າງແລ້ວ ຫຍຳ້ໝາກຝຣັ່ງແລ້ວ ແຕ່ກໍຍັງບໍ່ເຊົາ ແນະນຳວ່າຄວນໄປຫາທັນຕະແພດເພື່ອກວດຫາສາເຫດຂອງກິ່ນປາກ ແລະ ປິ່ນປົວ.