ກອງປະຊຸມສໍາມະນາກ່ຽວກັບກົນໄກການຮ່ວມມືອາຊຽນ-ສ ເກົາຫລີ ຄັ້ງທີ 3

ໃນວັນທີ 3-4 ເມສາ ນີ້, ກະຊວງການຕ່າງປະເທດ ຮ່ວມກັບສໍານັກງານການທູດ ສ ເກົາຫລີ ປະຈໍາອາຊຽນ, ໄດ້ຈັດກອງປະຊຸມສໍາມະນາກ່ຽວກັບການສົ່ງເສີມກົນໄກການຮ່ວມມືອາຊຽນ-ສ ເກົາຫລີ ຄັ້ງທີ 3, ຂຶ້ນທີ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ ນາງ ຄໍາເພົາ ເອີນທະວັນ ຮອງລັດຖະມົນຕີ ກະຊວງການຕ່າງປະເທດ, ມີບັນດາຄະນະຜູ້ແທນ ສ ເກົາຫລີ ແລະ ຂະແໜງການຕ່າງໆອ້ອມຂ້າງສູນກາງເຂົ້າຮ່ວມ. ເພື່ອແນໃສ່ສ້າງຄວາມຮັບຮູ້ ແລະ ເຂົ້າໃຈເຖິງການຮ່ວມມື ອາຊຽນ-ສ ເກົຫລີ, ໂດຍສະເພາະ ການເປັນຄູ່ຮ່ວມຍຸດທະສາດລະຫວ່າງສອງປະເທດ, ລວມທັງຂະແໜງການບຸລິມະສິດ ແລະ ທິດທາງຮ່ວມມືສໍາລັບ ອາຊຽນ-ສ ເກົາຫລີ ແລະ ເຂົ້າໃຈຕື່ມອີກກ່ຽວກັບລະບຽບຫຼັກການຂອງການຂຽນໂຄງການ ແລະ ຂັ້ນຕອນການນໍາສະເໜີໂຄງການ, ເພື່ອລະດົມທຶນຈາກກອງທຶນຮ່ວມມື ອາຊຽນ-ສ ເກົາຫລີ, ເພື່ອຈັດຕັ້ງປະຕິບັດໂຄງການຕ່າງໆຂອງລາວ ແນໃສ່ປະກອບສ່ວນເຂົ້ໃນການພັດທະນາເສດຖະກິດ-ສັງຄົມຂອງລາວ ແລະ ທັງເປັນການສົ່ງເສີມຄວາມສາມາດຂອງຂະແໜງການໃນ ສປປ ລາວ ສາມາດເຊື່ອມໂຍງພາກພື້ນອີກດ້ວຍ.

ໃນກອງປະຊຸມດັ່ງກ່າວ, ທ່່ານຮອງລັດຖະມົນຕີ ກະຊວງການຕ່າງປະເທດ, ໄດ້ກ່າວວ່າ: ການພົວພັນຮ່ວມມື ລະຫວ່າງອາຊຽນ-ສ ເກົາຫລີ ໃນຖານະຄູ່ຮ່ວມຍຸດທະສາດ, ການຮ່ວມມືສອງຝ່າຍນັບມື້ໄດ້ຮັບການເສີມຂະຫຍາຍ, ຊຶ່ງກວມເອົາຫຼາຍຂະແໜງການເຊັ່ນ: ດ້ານການເມືອງ-ຄວາມໝັ້ນຄົງ, ເສດຖະກິດ, ວັດທະນະທໍາ-ສັງຄົມ, ການເຊື່ອມໂຍງອາຊຽນ ແລະ ຄວາມຮັດແຄບຄວາມແຕກໂຕນດ້ານການພັດທະນາພາຍໃນອາຊຽນ ແລະ ທ່ານຍັງໄດ້ເນັ້ນໃຫ້ຜູ້ເຂົ້າຮ່ວມເອົາໃຈໃສ່ ຜັນຂະຫຍາຍເນື້ອໃນຈິດໃຈກອງປະຊຸມສໍາມະນາຄັ້ງນີ້ ໃຫ້ເກີດດອກອອກຜົນ, ໂດຍສະເພາະການຂຽນໂຄງການລະອຽດ ເພື່ອລະດົມທຶນຈາກກອງທຶນຮ່ວມມືອາຊຽນ-ສ ເກົາຫລີ ນໍາມາຈັດຈັດຕັ້ງປະຕິບັດຢູ່ລາວໃຫ້ໄດ້ຮັບຜົນ.

ໃນໂອກາດດຽວກັນ, ທ່ານ ຊິນຊອງຊຸນ ເອກອັກຄະລັດຖະທູດ ສ ເກົາຫລີ ປະຈໍາລາວ ແລະ ທ່ານ ກີມ ຢອງແຈ ເອກອັກຄະລັດຖະທູດ ສ ເກົາຫລີ ປະຈໍາອາຊຽນ ໄດ້ຢໍ້າຄືນທີ່ຈະສືບຕໍ່ສະໜັບສະໜູນ ແລະ ໃຫ້ການຮ່ວມມືກັບອາຊຽນ ກໍຄືລາວ, ແນໃສ່ສົ່ງເສີມການພົວພັນຮ່ວມມືລະຫວ່າງ ອາຊຽນ-ສ ເກົາຫລີ ເວົ້າລວມເວົ້າສະເພາະ ການພົວພັນຮ່ວມມື ສປປ ລາວ-ສ ເກົາຫລີ ໃຫ້ນັບມື້ໄດ້ຮັບການເສີມຂະຫຍາຍ.