ຂໍພິສູດຕົວເອງ ! ປ໊ອກບາ ບໍ່ໜີ ແມນຢູ
ເດິ ຊັນ ສື່ຂອງອັງກິດ ລະບຸ ປອລ ປ໊ອກບາ ມິດຟິລ ແມນເຊັສເຕີ ຢູໄນເຕັດ ຍັງບໍ່ຄິດຈະບອກລາທີມ ເພາະຕ້ອງການພິສູດຕົວເອງໃຫ້ໄດ້ ເຊິ່ງຄົນໃຫຍ່ຄົນໂຕ ແມນເຊັສເຕີ ຢູໄນເຕັດ ຍັງບໍ່ຢາກຂາຍລາວອອກໄປເຊັ່ນກັນ.
ປອລ ປ໊ອກບາ ກອງກາງຄົນດັງຂອງ ແມນເຊັສເຕີ ຢູໄນເຕັດ ສະໂມສອນຍັກໃຫຍ່ແຫ່ງ ພຣີເມຍລີກ ອັງກິດ ຍັງຢາກຢູ່ກັບທີມຕໍ່ໄປ ເພ່ືອຈະພິສູດຝີຕີນຂອງຕົນເອງໃຫ້ໄດ້ ຕາມລາຍງານຂອງ ເດິ ຊັນ ສື່ຊື່ດັງຂອງອັງກິດ.
ອະນາຄົດຂອງ ປ໊ອກບາ ເປັນບັນຫາຮ້ອນທີ່ຫລາຍຄົນເວົ້າເຖິງຕະຫລອດໄລຍະຫລາຍເດືອນຜ່ານມາ ພາຍຫລັງລາວບໍ່ຄ່ອຍດີໃນຫລາຍນັດ ແລະ ຍັງລືກັນວ່າ ການພົວພັນຂອງລາວກັບ ໂຊເຊ ມູຣິນໂຢ ຜູ້ຈັດການທີມຊາວໂປຣຕຸກີສຢູ່ໃນຂັ້ນຊຸດໂຊມ.
ທັງນີ້ ໃນເກມນັດທີ່ ແມນເຊັສເຕີ ຢູໄນເຕັດ ເສຍໃຫ້ ເວສບຣອມວິຊ ອັລປ້ຽນ 0-1 ຄາສະໜາມ ໂອລ ແທຣ໊ຟຟອດ ແບບສຸດຊ໊ອກ ໃນວັນທີ 15 ເມສາຜ່ານມານັ້ນ ປ໊ອກບາ ກໍຖືກປ່ຽນຕົວອອກຈາກເກມອີກຄັ້ງ ຈົນເຮັດໃຫ້ອະນາຄົດຂອງລາວກັບທີມມືດມົນລົງອີກ ແລະ ບໍ່ດົນຫລັງຈາກນັ້ນ ກໍມີລາຍງານລະບຸວ່າ ມູຣິນໂຢ ພ້ອມຈະປ່ອຍລາວອອກຈາກທີມ.
ເຖິງຢ່າງໃດກໍຕາມ ຫລ້າສຸດ ເດິ ຊັນ ລະບຸວ່າ ອະດີດນັກເຕະ ຢູເວນຕຸສ ຍັງບໍ່ຄິດຈະໄປບ່ອນໃດ ເພາະລາວຢາກສະແດງຜົນງານກັບທີມໃຫ້ໄດ້ ເຊິ່ງນັ້ນຖືວ່າສອດຄ່ອງກັບຄວາມຕ້ອງການຂອງຜູ້ບໍລິຫານຂອງ ແມນເຊັສເຕີ ຢູໄນເຕັດ ເພາະພວກເຂົາຍັງບໍ່ຢາກປ່ອຍນັກເຕະອາຍຸ 25 ປີອອກໄປຄືກັນ ຫລັງຈາກທຸ່ມເງິນໃນເບື້ອງຕົ້ນສູງເຖິງ 105 ລ້ານເອີໂຣ ໃນການດຶງ ປ໊ອກບາ ກັບມາຢູ່ກັບທີມ.
