ປກສ ເມືອງສີສັດຕະນາກມອບຊັບຄືນເຈົ້າຂອງ
ເມື່ອທ້າຍອາທິດຜ່ານມານີ້, ເຈົ້າໜ້າທີ່ ປກສ ເມືອງສີສັດຕະນາກນະຄອນ ຫລວງວຽງຈັນ, ໄດ້ມອບລົດຈັກຈຳນວນ 10 ຄັນທີ່ຖືກຄົນຮ້າຍລັກໄປຄືນໃຫ້ເຈົ້າຂອງເດີມ, ໂດຍທ່ານພັນຕີ ຈັນທະຈອນ ຫົວໜ້າຫ້ອງການສືບສວນ-ສອບສວນ ປກສ ເມືອງດັ່ງກ່າວເປັນຜູ້ມອບ.
ເຈົ້າໜ້າທີ່ ໃຫ້ຮູ້ວ່າ: ໃນປີ 2017 ຜ່ານມາ, ມີສະພາບລົດເສຍເກີດຂຶ້ນຫລາຍໂດຍສະເພາະຢູ່ໃນເມືອງສີສັດຕະນາກ, ສະນັ້ນ ເຈົ້າໜ້າທີ່ຈຶ່ງໄດ້ຮີບຮ້ອນແກ້ໄຂ ແລະ ສາມາດຈັບກຸ່ມແກ້ງລັກລົດຈັກໄດ້ 9 ກຸ່ມໃຫຍ່ຄື: ກຸ່ມທ້າວ ແນ່ງ ຢູ່ ບ້ານທົ່ງພານທອງເມືອງສີສັດຕະນາກນະຄອນຫລວງວຽງຈັນ ພ້ອມໝູ່ 3 ຄົນ ແລະ ເກັບກູ້ລົດມາໄດ້ 5 ຄັນ, ພ້ອມນີ້ ຍັງໄດ້ຂະຫຍາຍຜົນ ແລະ ສືບຕໍ່ແກ້ໄຂຜູ້ຮ່ວມຂະບວນການ, ຊຶ່ງໃນຕົ້ນເດືອນມີນາຜ່ານມານີ້, ສາມາດຈັບຕົວຜູ້ຮ່ວມຂະບວນການໄດ້ຕື່ມອີກ 3 ຄົນ, ຊຶ່ງປັດຈຸບັນເຈົ້າໜ້າທີ່ພວມເລັ່ງສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີໃຫ້ໄດ້ໂດຍໄວ.
ເຈົ້າໜ້າທີ່ ໃຫ້ຮູ້ວ່າ: ໃນປີ 2017 ຜ່ານມາຢູ່ນະຄອນຫລວງວຽງຈັນມີປະກົດການຫຍໍ້ທໍ້ເກີດຂຶ້ນກວ່າ 1.500 ເລື່ອງ, ພົ້ນເດັ່ນແມ່ນບັນຫາລັກຊັບ, ມົ້ວສຸມຢາເສບຕິດ, ຊຶ່ງມີລົດຈັກເສຍກ່ວາ 200 ຄັນ, ລົດໃຫຍ່ 10 ກວ່າຄັນ ແລະ ຊັບສິນອື່ນໆ.
