ສາມາດໂຟນ ໂຈນປຸ້ນເວລາຂ້າຄວາມສະຫລາດ

- advert banner 728 90 728x90 - ສາມາດໂຟນ ໂຈນປຸ້ນເວລາຂ້າຄວາມສະຫລາດ

ຫຼາຍຄົນກໍຄົງເປັນເຈົ້າຂອງ “ສະມາດໂຟນ (Smartphone)” ທີ່ມີຄວາມສາມາດຫຼາກຫຼາຍ ຖ້າຮ້ອງ “ສາມາດໂຟນ” ກໍຄົງບໍ່ຜິດ ແຕ່ສິ່ງທີ່ໜ້າຄິດກໍຄື ມີມືຖືແບບນີ້ ໃຜກໍຄືວ່າຫຍຸ້ງຢູ່ຕະຫຼອດ, ກົ້ມໆເງີຍໆຢູ່ຫັ້ນແລ ສະຫຼຸບແລ້ວ ເຮົາໃຊ້ເວລາ ນຳສາມາດໂຟນມື້ຫນຶ່ງເທົ່າໃດ?

- new3 - ສາມາດໂຟນ ໂຈນປຸ້ນເວລາຂ້າຄວາມສະຫລາດ

ຜູ້ຂຽນເຊື່ອວ່າ ດຽວນີ້ພວກເຮົາບໍ່ຍອມລົດລະສາຍຕາຈາກໜ້າຈໍໂທລະສັບເກີນກວ່າ ສອງຊົ່ວໂມງດອກຖ້າບໍ່ຄາ ເຮັດວຽກອັນໃດອັນໜຶ່ງເລັ່ງດ່ວນ ແລະສຳຄັນ ເຊິ່ງມັນຮວມທັງຄົນທຸກຮຸ່ນ,  ໄວໜຸ່ມ, ໄວກາງຄົນ ຄົນສູງອາຍຸກໍຍັງບໍ່ເວັ້ນລະເດີ!

ມີການສຶກສາອັນຫນຶ່ງທີ່ຕີພີມລົງໃນ ວາລະສານ ສະມາຄົມ ການຄົ້ນຄວ້າກ່ຽວກັບຜູ້ບໍລິໂພກ (The Journal of the Association for Consumer Research) ມີຂໍ້ສະຫລຸບວ່າ “ຖ້າເຮົາເອົາໂທລະສັບ ໂດຍສະເພາະສາມາດໂຟນເຮົານີ້ລະ ໃກ້ໆຕົວເຮົາ ເຖິງວ່າມັນຊິມອດໄວ້ກໍຕາມ ແຕ່ຍັງປະກົດວ່າ ປະສິພາບໃນການເຮັດວຽກຂອງພວກເຮົານັ້ນຫຼຸດລົງ, ສິ່ງສຳຄັນ ຫຼາຍຄົນກໍຄິດບໍ່ເຖິງວ່າ ສາມາດໂຟນ ທຳຮ້າຍຄວມຈື່ຈຳ, ທຳຮ້າຍຄວາມສະຫຼາດຂອງຄົນເຮົາຢ່າງໜ້າເຫຼືອເຊື່ອ!”

ການສຶກສານີ້ໄດ້ທົດລອງນຳຄົນສອງກຸ່ມເຮັດວຽກອັນດຽວກັນ, ກຸ່ມຫນຶ່ງໃຫ້ເອົາໂທລະສັບໄວ້ຫ້ອງອື່ນ ແລະ ອີກກຸ່ມຫນຶ່ງໃຫ້ເອົາໂທລະສັບໄວ້ໃນຖົງ ຜົນປະກົດວ່າ ຜູ້ທີ່ເອົາໂທລະສັບໄວ້ຫ້ອງອື່ນນັ້ນເຮັດວຽກໄດ້ດີກວ່າ ຜູ້ເອົາໂທລະສັບໄວ້ໃກ້ຕົວ.

ອີກການສຶກສາຫນຶ່ງໃນປີ 2014​ ທີ່ລົງວາລະສານ “ພຶດຕິກຳມະນຸດໃນຍຸກຄອມພິວເຕີ” ເວົ້າວ່າ “ຜູ້ຄົນຈະມີຄວາມຮູ້ສຶກກະວົນກະວາຍຫຼາຍຂຶ້ນເມື່ອບໍ່ເຫັນໂທລະສັບຂອງພວກເຂົາຈັກຄາວຫນຶ່ງ”, ອັນນີ້ສະແດງໃຫ້ເຫັນວ່າ ຄົນໃນຍຸກນີ້ກຳລັງເປັນທາດຂອງເທັກໂນໂລຊີ, ນັບແຕ່ຕື່ນນອນມາ ຈະຄວ້າຫາ ໂທລະສັບ ແລະໄດ້ເບິ່ງໜ້ອຍຫນຶ່ງກໍຍັງດີ ກ່ອນຈະໄປເຮັດອັນອື່ນ, ບາງຄົນເບິ່ງໂທລະສັບຈົນເພີນ ເສຍເວລາໄປຫຼາຍນາທີ.

- lattana 1 - ສາມາດໂຟນ ໂຈນປຸ້ນເວລາຂ້າຄວາມສະຫລາດ

ພວກເຮົາເຮັດວຽກໃນແຕ່ລະມື້ ຈະມັກເອົາໂທລະສັບວາງໄວ້ຂ້າງໆຕົນເອງສະເໝີ ບໍ່ວ່າຈະມີຫຍັງເກີດຂຶ້ນ ກໍຈະມັກຈັບໂທລະສັບມາເບິ່ງເລື້ອຍໆ ແນ່ນອນລະມັນເຮັດໃຫ້ເຮົາເສຍສະມາທິ ໃນການສຸມໃສ່ວຽກງານໃດຫນຶ່ງ ແລະ ຂາດຄວາມຈື່ຈຳທີ່ດີ.

ເພາະສະນັ້ນ ນັກຄົ້ນຄວ້າຈຶ່ງແນະນຳວ່າ “ຄວນຈະພິລະນາເອົາໂທລະສັບໄວ້ຫ່າງໆແດ່ກໍດີ ເມື່ອເວລາເຮັດວຽກ”; ເພື່ອນຮ່ວມງານຂອງຜູ້ຂຽນຄົນໂຮນລັງ ເວົ້າສູ່ຟັງວ່າ “ດຽວນີ້ຢູ່ປະເທດໂຮນລັງ ຄົນໃຫ້ຄວາມສົນໃຈ ສາມາດໂຟນໜ້ອຍລົງແລ້ວ ເພາະເບິ່ງຄືວ່າມັນມາທຳລາຍເວລາອັນມີຄ່າ ໃນການໃຊ້ຊີວິດແບບຄົນໄປເທື່ອລະໜ້ອຍ ແລ້ວຫັນມານຳໃຊ້ໂທລະສັບແບບບໍ່ມີຄວາມສາມາດຫຼາຍ ພຽງແຕ່ໂທໄດ້ກໍພໍ” ວ່າຊັ້ນ.

ໃນອີກແງ່ມູນຫນຶ່ງ ພວກເຮົາກໍສາມາດດຶງເອົາຜົນປະໂຫຍດຢ່າງຫຼວງຫຼາຍຈາກ ສາມາດໂຟນໄດ້ ຖ້າໃຊ້ຖືກທາງ, ເພາະສະນັ້ນ ພວກເຮົາຄວນເປັນນາຍມັນໂດຍການນຳໃຊ້ຢ່າງມີສະຕິ, ຢ່າປ່ອຍໃຫ້ເຮົາເປັນທາດຂອງເທັກໂນໂລຢີ ຢ່າງບໍ່ຮູ້ເມື່ອຄີງ!.

error: Content is protected !!