ລາວບັງຄັບໃຫ້ພີມຮູບພາບຄໍາເຕືອນອັນຕະລາຍ ໃສ່ຊອງຢາສູບມີຜົນແຕ່1ພຶດສະພາເປັນຕົ້ນໄປ
ຄະນະກຳມະການແຫ່ງຊາດເພື່ອການຄວບຄຸມຢາສູບ ໃຫ້ຮູ້ວ່າ: ສປປ ລາວໄດ້ເພີ່ມຄວາມເຂັ້ມງວດໃນການຄວບຄຸມການໂຄສະນາຜົນຮ້າຍຈາກຜະລິດຕະພັນຢາສູບຫລາຍຂຶ້ນ, ຫລັງຈາກໄດ້ບັງຄັບໃຊ້ມາດຕະການຕ້ອງພີມຮູບພາບຄໍາເຕືອນອັນຕະລາຍກວມຫລາຍກວ່າ 75% ຂອງເນື້ອທີ່ຊອງ ແລະ ຕຸດຢາສູບທຸກຍີຫໍ້ທີ່ຜະລິດຢູ່ພາຍໃນ ແລະ ນໍາເຂົ້າຈາກຕ່າງປະເທດນັບແຕ່ວັນທີ 1 ພຶດສະພາ 2017 ເປັນຕົ້ນໄປ.
ທ່ານ ພັດ ເກິ່ງຊາເນດ ຫົວໜ້າກົມອານາໄມ ແລະ ສົ່ງເສີມສຸຂະພາບກະຊວງສາທາລະນະສຸກ, ຫົວໜ້າກອງເລຂາຄະນະກໍາມະການແຫ່ງຊາດເພື່ອຄວບຄຸມຢາສູບ ກ່າວວ່າ: ການບັງໃຊ້ມາດຕະການດັ່ງກ່າວແມ່ນປະຕິບັດພັນທະສົນທິສັນຍາສາກົນວ່າດ້ວຍການຄວບຄຸມຢາສູບທີ່ລາວໄດ້ເຂົ້າເປັນພາຄີ ແລະ ກົດໝາຍວ່າດ້ວຍການຄວບຄຸມຢາສູບ, ເພື່ອໃຫ້ສັງຄົມໄດ້ຮັບຮູ້ຂໍ້ມູນຂ່າວສານຢ່າງຈະແຈ້ງກ່ຽວກັບພິດໄພ, ຄວາມອັນຕະລາຍຂອງການສູບຢາ ແລະ ການໄດ້ຮັບຄວັນຢາສູບຂອງຜູ້ອື່ນ, ສົ່ງເສີມວຽກງານປ້ອງກັນພະຍາດບໍ່ຕິດຕໍ່ ແລະ ທັງເປັນເຄື່ອງມືຊ່ວຍພາກລັດໃນການກວດກາ ແລະ ສະກັດກັ້ນຢາສູບຜິດກົດໝາຍອີກດ້ວຍ.
ທ່ານຫົວໜ້າກອງເລຂາດັ່ງກ່າວ ໃຫ້ຮູ້ວ່າ: ກໍລະນີພົບເຫັນມີການລະເມີດຕໍ່ຜົນບັງຄັບໃຊ້ດັ່ງກ່າວ, ໃນເບື້ອງຕົ້ນຈະໄດ້ດໍາເນີນມາດຕະການຕັກເຕືອນສຶກສາອົບຮົມ, ຢຶດ, ປັບໄໝ ຫລື ໃຫ້ໂຈະການດຳເນີນທຸລະກິດຊົ່ວຄາວ ຕາມກໍລະນີໜັກເບົາ, ເຊິ່ງຄາດວ່າອີກປະມານ 3 ເດືອນຕໍ່ໜ້າຜະລິດຕະພັນຢາສູບທີ່ບໍ່ໄດ້ພີມຮູບພາບ ແລະ ຄໍາເຕືອນອັນຕະລາຍຈະບໍ່ມີຈຳໜ່າຍໃນທ້ອງຕະຫລາດໃນທົ່ວປະເທດອີກຕໍ່ໄປ.
