ລາວເປີດປື້ມຄູ່ມືສະຖິຕິພະລັງງານແຫ່ງຊາດ
ເມື່ອບໍ່ດົນມາ ນີ້, ກະຊວງພະລັງງານ ແລະ ບໍ່ແຮ່ ຮ່ວມກັບສະຖາບັນຄົ້ນຄວ້າເສດຖະກິດອາຊຽນ ແລະ ອາຊີຕາເວັນອອກ ນຳສະເໜີປຶ້ມສະຖິຕິພະລັງງານແຫ່ງຊາດ 2018 ເຊິ່ງເປັນຫົວທຳອິດ ທີ່ສະເໜີຂໍ້ມູນກ່ຽວກັບການຊົມໃຊ້ຄວາມຕ້ອງການ ແລະ ການສະໜອງພະລັງງານຂອງ ສປປ ລາວ. ໂດຍການເຂົ້າຮ່ວມຂອງທ່ານ ຄຳມະນີ ອິນທິລາດ ລັດຖະມົນຕີກະຊວງ ພະລັງງານ ແລະ ບໍ່ແຮ່, ທ່ານ ຮິເດໂຕຊິ ນິຊິມູລະ ປະທານສະຖາບັນຄົ້ນຄວ້າເສດຖະກິດອາຊຽນ ແລະ ອາຊີຕາເວັນອອກ.
ທ່ານ ລັດຖະມົນຕີກະຊວງ ພະລັງງານ ແລະ ບໍ່ແຮ່ ໃຫ້ຮູ້ວ່າ: ສະຖາບັນຄົ້ນຄວ້າເສດຖະກິດອາຊຽນ ແລະ ອາຊີຕາເວັນອອກ ໄດ້ໃຫ້ການຊ່ວຍເຫຼືອຫຼາຍປະເທດໃນອາຊຽນມາແລ້ວ ລວມທັງ ສປປ ລາວ ນັບແຕ່ເດືອນມິຖຸນາ 2017 ສະຖາບັນດັ່ງກ່າວ ໄດ້ປະກອບສ່ວນເຂົ້າໃນການອັບເດດສະຖິຕິຂະແໜງພະລັງງານ ໂດຍການເຝິກໃຫ້ພະນັກງານກະຊວງ ແລະ ບັນດາພາກສ່ວນກ່ຽວຂ້ອງຕໍ່ຍອດປະສົບການຂອງຕົນ ຜ່ານການລົງເກັບກຳຂໍ້ມູນ ແລກປ່ຽນຄຳຄິດເຫັນ ກະກຽມ ແລະ ວິເຄາະຂໍ້ມູນຂອງການຊົມໃຊ້ພະລັງງານໃນແຕ່ລະຂະແໜງການສຳຄັນ ຜົນທີ່ໄດ້ຮັບ ກໍ່ຄືບົດລາຍງານສະຖິຕິສະບັບນີ້ ແມ່ນໄດ້ມີຮູບແບບຄ້າຍຄືກັນກັບຮູບແບບບົດລາຍງານຂອງປະເທດສະມາຊິກອາຊຽນອື່ນໆ ເຊິ່ງຄັ້ງນີ້ຍັງໄດ້ລົງນາມບົດບັນທຶກຄວາມເຂົ້າໃຈ ລະຫວ່າງ ກະຊວງ ພະລັງງານ ແລະ ບໍ່ແຮ່ ກັບສະຖາບັນຄົ້ນຄວ້າເສດຖະກິດສຳຫຼັບອາຊຽນ ແລະ ອາຊີຕາເວັນອອກ ເພື່ອສືບຕໍ່ຊ່ວຍເຫຼືອການສ້າງຂີດຄວາມສາມາດໃຫ້ແກ່ພະນັກງານລັດ ເພື່ອໃຫ້ສາມາດເຜີຍແຜ່ແນວທາງຄັ້ງທຳອິດດ້ານພະລັງງານຂອງລາວ ເສີມຂະຫຍາຍຄວາມຮູ້-ຄວາມສາມາດດ້ານເສດຖະກິດພະລັງງານ ແລະ ປະກອບສ່ວນເຂົ້າໃນການກະກຽມແຜນງານສຳລັບຍານພາຫະນະໄຟຟ້າ.
ສະຖາບັນຄົ້ນຄວ້າເສດຖະກິດອາຊຽນ ແລະ ອາຊີຕາເວັນອອກ ຮ່ວມກັບກົມນະໂຍບາຍພະລັງງານ ແລະ ແຜນການ ໄດ້ສ້າງຕັ້ງໜ່ວຍງານສະເພາະຂຶ້ນເພື່ອເກັບກຳຂໍ້ມູນ ແລະ ສຳຫຼວດການຊົມໃຊ້ພະລັງງານທີ່ຖືກໃຊ້ເຂົ້າໃນຂະແໜງການຂົນສົ່ງ ອຸດສາຫະກຳ-ການຄ້າ ແລະ ທີ່ພັກອາໄສ ໃນນີ້ໜຶ່ງໃນຂໍ້ມູນທີ່ຫາຍາກທີ່ສຸດແມ່ນຂະແໜງການຂົນສົ່ງເຊັ່ນ: ຂໍ້ມູນການໃຊ້ນ້ຳມັນເຊື້ອໄຟ ໄລຍະທາງຂອງລົດແຕ່ລະປະເພດ ລວມເຖິງປະລິມານການຊົມໃຊ້ພະລັງງານຕາມຄົວເຮືອນ ຫຼື ທີ່ພັກອາໄສ.
ທ່ານ ຮິເດໂຕຊິ ນິຊິມູຣະ ກ່າວວ່າ: ພວກເຮົາເຊື່ອວ່າການອັບເດດຂໍ້ມູນ ແລະ ສະຖິຕິດ້ານພະລັງງານຂອງ ສປປ ລາວ ບໍ່ພຽງແຕ່ຈະສາມາດຮັບໃຊ້ເຂົ້າໃນການວາງນະໂຍບາຍ ແຕ່ຍັງຈະຊ່ວຍຮັດແໜ້ນການຮ່ວມມືດ້ານພະລັງງານກັບປະເທດອື່ນໃນຂົງເຂດອາຊຽນ ຂົງເຂດພາກພື້ນອື່ນໆ ແລະ ສາກົນອີກດ້ວຍເຊັ່ນ: ສູນອາຊຽນດ້ານພະລັງງານ (ACE) ແລະ ອົງການພະລັງງານສາກົນ (IEA) ທີ່ຕ້ອງການຂໍ້ມູນໃນບາງຄັ້ງຄາວ ເພື່ອຮ່າງນະໂຍບາຍ ແລະ ການວິເຄາະຕ່າງໆ.
