ສິງກະໂປຈະເລີ່ມທົດລອງລະບົບ ສະແກນຕາຢູ່ຈຸດກວດຄົນເຂົ້າເມືອງ
ໜັງສືພິມເດິສເຕຣດທາມຂອງສິງກະໂປ ລາຍງານໃນວັນທີ 6 ສິງຫາວ່າ: ສິງກະໂປຈະເລີ່ມທົດລອງລະບົບສະແກນຕາຢູ່ຈຸດກວດຄົນເຂົ້າເມືອງບາງຈຸດ ໂດຍໃນອະນາຄົດອາດນຳມາໃຊ້ແທນລະບົບກວດສອບລາຍນິ້ວມື.
ຜູ້ຊ່ຽວຊານກ່າວວ່າ: ປັດຈຸບັນລະບົບສະແກນຕາມີໃຊ້ກັນຢູ່ໃນຫລາຍປະເທດເຊັ່ນ: ອາເມລິກາ ແລະ ສະຫະຣາຊະອານາຈັກ ໂດຍມີຄ່າໃຊ້ຈ່າຍສູງກວ່າລະບົບກວດສອບລາຍນິ້ວມືທີ່ໃຊ້ກັນຢູ່ໃນປັດຈຸບັນເຖິງ 5 ເທົ່າ. ໂຄສົກສຳນັກງານກວດຄົນເຂົ້າເມືອງສິງກະໂປ ກ່າວວ່າ: ການທົດລອງລະບົບດັ່ງກ່າວຈະຊ່ວຍໃນການພິຈາລະນາວ່າຄວນຈະນຳເຕັກໂນໂລຊີດັ່ງກ່າວມາໃຊ້ ຫລື ບໍ່ ໂດຍຈຸດກວດຄົນເຂົ້າເມືອງທີ່ຈະມີການທົດລອງລະບົບໄດ້ແກ່ ຈຸດກວດ 2 ແຫ່ງທີ່ຊາຍແດນຕອນເໜືອຕິດກັບມາເລເຊຍ ແລະ ອີກ 1 ຈຸດຢູ່ບໍລິເວນເຮືອຂ້າມຝາກໄປເກາະຂອງອິນໂດເນເຊຍ ແລະ ຈະເປັນການທົດລອງກັບປະຊາຊົນຂອງສິງກະໂປເທົ່ານັ້ນ ລວມທັງຜູ້ຢູ່ອາໄສຖາວອນ. ສຳນັກງານກວດຄົນເຂົ້າເມືອງສິງກະໂປເລີ່ມເກັບຂໍ້ມູນຕານັບແຕ່ເດືອນມັງກອນປີຜ່ານມາ ເມື່ອປະຊາຊົນມາຍື່ນຂໍເຮັດບັດປະຈຳຕົວ ຫລື ໜັງສືເດີນທາງ.
ຂະນະດຽວກັນ, ຢູ່ສະໜາມບິນຊາງງີຂອງສິງກະໂປກຳລັງພິຈາລະນາຈະນຳເອົາລະບົບຈົດຈຳໃບໜ້າມາໃຊ້ໃນການຕາມຫາຜູ້ໂດຍສານທີ່ຊັກຊ້າ. ລັດຖະບານສິງກະໂປລະບຸວ່າ: ມາດຕະການເຫລົ່ານີ້ລ້ວນເປັນແນວທາງປະຕິບັດໃນການປັບປຸງການດຳລົງຊີວິດ ແລະ ຄວາມປອດໄພຂອງປະຊາຊົນ, ພ້ອມຮັບປາກຈະໃຫ້ຄວາມສຳຄັນຕໍ່ນະໂຍບາຍການເປັນສ່ວນຕົວ.
