ມີຜູ້ເສຍຊີວິດ 11 ຄົນຈາກແຜ່ນ ດິນໄຫວຮອບໃໝ່ຢູ່ເກາະລອມບອກ
ມີຜູ້ເສຍຊີວິດຢ່າງໜ້ອຍ 11 ຄົນ ເຊິ່ງເປັນຜົນຈາກແຜ່ນດິນໄຫວຮຸນແຮງຫລາຍເທື່ອ ຢູ່ເກາະລອມບອກຂອງອິນໂດເນເຊຍ ລະຫວ່າງວັນທີ 18-19 ສິງຫາ ແລະ ລະບົບໂຄງສ້າງພື້ນຖານຍັງເສຍຫາຍເປັນວົງກວ້າງ.
ສຳນັກຂ່າວຕ່າງປະເທດລາຍງານວ່າ: ສຳນັກງານບໍລິຫານຈັດການໄພພິບັດແຫ່ງຊາດຂອງອິນໂດເນເຊຍ (BNPB) ລາຍງານຄວາມຄືບໜ້າຂອງສະຖານະການ ຫລັງເຫດແຜ່ນດິນໄຫວຮຸນແຮງຫລາຍເທື່ອ ຢູ່ເກາະລອມບອກ ຢູ່ທາງຕອນກາງຂອງປະເທດ ລະຫວ່າງວັນທີ 18-19 ສິງຫາວ່າ: ໜຶ່ງໃນຄັ້ງຮຸນແຮງທີ່ສຸດວັດແທກໄດ້ 6,9 ແມກນິຈູດ, ຮອງລົງມາຄື 6,3 ແມກນິຈູດ ໃນຕອນບ່າຍວັນທີ 19 ສິງຫາ ເປັນເຫດໃຫ້ມີຜູ້ເສຍຊີວິດລວມກັນຢ່າງໜ້ອຍ 11 ຄົນ ແລະ ສິ່ງປຸກສ້າງອີກຫລາຍກວ່າ 1.800 ແຫ່ງພັງເສຍຫາຍ ຕະຫລອດຮອດລະບົບໂຄງສ້າງພື້ນຖານ ໂດຍສະເພາະລະບົບນ້ຳປະປາ ແລະ ກະແສໄຟຟ້າທີ່ຖືກຕັດຂາດເກືອບທົ່ວເກາະ.
ທັງນີ້, ແຮງສັ່ນສະເທືອນຄັ້ງດັ່ງກ່າວເປັນຜົນຈາກການເຄື່ອນທີ່ຂອງແຜ່ນເປືອກໂລກຄົນລະແຜ່ນກັບທີ່ເກີດແຜ່ນດິນໄຫວຮຸນແຮງ 7,0 ແມກນິຈູດ ໃນວັນທີ 5 ສິງຫາຜ່ານມາ ແລະ ບໍ່ແມ່ນແຜ່ນດິນໄຫວ ຫລື ອາບເຕີຊ໊ອກຂອງເຫດການໃນຕົ້ນເດືອນນີ້ ເຊິ່ງສົ່ງຜົນໃຫ້ມີຜູ້ເສຍຊີວິດຫລາຍກວ່າ 460 ຄົນ.
