ສະຖານທູດຫວຽດນາມສະຫລອງວັນຊາດ 2 ກັນຍາ ຄົບຮອບ 73 ປີ
ໃນວັນທີ 31 ສິງຫານີ້, ທ່ານ ຫງວຽນ ບ໋າ ຮູ່ງ ເອກອັກຄະລັດຖະທູດວິຊາມັນຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາລາວ ໄດ້ຈັດງານລ້ຽງສະຫລອງວັນຊາດ ສສ ຫວຽດນາມ ຄົບຮອບ 73 ປີ (2/9/1945-2/9/2018) ຂຶ້ນທີ່ນະຄອນຫລວງວຽງຈັນ ໂດຍມີທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ລັດຖະມົນຕີ-ຮອງລັດຖະມົນຕີກະຊວງຕ່າງໆ ພ້ອມດ້ວຍທູຕານຸທູດຕ່າງປະເທດປະຈຳລາວເຂົ້າຮ່ວມນຳດ້ວຍ.
ທ່ານ ຫງວຽນ ບ໋າ ຮູ່ງ ກ່າວວ່າ: 73 ປີທີ່ຜ່ານມາ, ພາຍໃຕ້ການນໍາພາຂອງພັກກອມມູນິດຫວຽດນາມ, ປະຊາຊົນຫວຽດນາມໄດ້ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍນາໆປະການ ແລະ ສາມາດຍາດໄດ້ໄຊຊະນະອັນໃຫຍ່ຫລວງ, ມີຄວາມໝາຍປະວັດສາດ, ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ, ປົກປັກຮັກສາປະເທດຊາດ, ລິເລີ່ມ ແລະ ພວມປະຕິບັດພາລະກິດປ່ຽນແປງໃໝ່. ພິເສດ,ປີ 2017 ເປັນຄັ້ງທໍາອິດພາຍຫລັງຫລາຍປີ, ຫວຽດນາມ ໄດ້ປະຕິບັດສໍາເລັດຢ່າງຮອບດ້ານ ແລະ ລື່ນ 13 ຄາດໝາຍ ໃນການພັດທະນາເສດຖະກິດ-ສັງຄົມທີ່ສະພາແຫ່ງຊາດໄດ້ວາງອອກ. ເສດຖະກິດມະຫາພາກໝັ້ນທ່ຽງ, ສາມາດຄວບຄຸມໄພເງິນເຟີ້ໄວ້ໄດ້, ການເກັບລາຍຮັບ ແລະ ການດຸ່ນດຽງໃຫຍ່ຂອງການພັດທະນາພື້ນຖານເສດຖະກິດລ້ວນແຕ່ບັນລຸຕາມຄາດໝາຍທີ່ໄດ້ວາງອອກ, ການເຕີບໂຕຂອງ GDP ບັນລຸ 6,81%, ຍອດມູນຄ່າຂາອອກ-ຂາເຂົ້າບັນລຸ 425 ຕື້ໂດລາສະຫະລັດ ຊຶ່ງເປັນລະດັບສູງສຸດນັບແຕ່ກ່ອນມາຮອດປັດຈຸບັນ; ການດຶງດູດການລົງທຶນໂດຍກົງຈາກຕ່າງປະເທດບັນລຸເຖິງ 33 ຕື້ໂດລາສະຫະລັດ. ລັດຖະບານຫວຽດນາມຍາມໃດກໍເອົາການພັດທະນາເສດຖະກິດຕິດພັນກັບການແກ້ໄຂບັນດາບັນຫາສັງຄົມ ເປັນຕົ້ນແມ່ນການລຶບລ້າງຄວາມອຶດຫິວ, ຫລຸດຜ່ອນຄວາມທຸກຍາກ, ການເບິ່ງແຍງດູແລສຸຂະພາບໃຫ້ແກ່ປະຊາຊົນ ແລະ ບັນລຸໄດ້ບັນດາໝາກຜົນທີ່ສຳຄັນ. ໄປຄຽງຄູ່ກັບການພັດທະນາເສດຖະກິດ-ສັງຄົມ, ພວກເຮົາມີຄວາມປິຕິຊົມຊື່ນເປັນຢ່າງຍິ່ງ ແລະ ມີຄວາມເອກອ້າງທະນົງໃຈທີ່ເຫັນວ່າໃນຊຸມປີຜ່ານມາ, ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ໄດ້ຮັບການພັດທະນາຢ່າງຕໍ່ເນື່ອງ, ກຳລັງເຂົ້າສູ່ລວງເລິກ ແລະ ມີປະສິດທິຜົນກວ່າເກົ່າ. ການພົວພັນດ້ານການເມືອງ, ການຕ່າງປະເທດນັບມື້ນັບໃກ້ສິດຕິດແທດ, ຄວາມໄວ້ເນື້ອເຊື່ອໃຈນັບມື້ນັບໄດ້ປັບປຸງ ແລະ ເພີ່ມທະວີ. ໃນປີ 2017 ສອງຝ່າຍໄດ້ປະສານສົມທົບກັນຈັດຕັ້ງສຳເລັດຜົນເປັນຢ່າງດີທີ່ສຸດ ຄືປີສາມັກຄີມິດຕະພາບໄດ້ຈັດຕັ້ງການສະເຫລີມສະຫລອງວັນສ້າງຕັ້ງ ສາຍພົວພັນການທູດຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ-ລາວ ຄົບຮອບ 40 ປີ ດ້ວຍຫລາຍຮ້ອຍກິດຈະກຳ ແລະ ຫລາຍຮູບການທີ່ອຸດົມສົມບູນ. ການຮ່ວມມືທາງດ້ານເສດຖະກິດມີບາດກ້າວຂະຫຍາຍຕົວໃໝ່, ຫວຽດນາມສືບຕໍ່ເປັນໜຶ່ງໃນບັນດາຄູ່ຮ່ວມມືດ້ານການລົງທຶນ ແລະ ການຄ້າລາຍໃຫຍ່ທີ່ສຸດຂອງລາວ. ການເຊື່ອມຈອດສອງພື້ນຖານເສດຖະກິດ ເປັນຕົ້ນແມ່ນການເຊື່ອມຈອດທາງດ້ານຄົມມະນາຄົມກຳລັງ ໄດ້ຮັບການຊຸກຍູ້ຢ່າງແຂງແຮງ, ຂ້າພະເຈົ້າເຊື່ອໝັ້ນວ່າ ໃນອະນາຄົດອັນໃກ້ໆນີ້, ໂດຍມີການຮ່ວມມືຂອງຫວຽດນາມ ແລະ ບັນດາປະເທດອື່ນໆຢູ່ໃນພາກພື້ນ, ປະເທດລາວຈະກາຍເປັນສູນການເຊື່ອມຈອດ ແລະ ຜ່ານແດນທີ່ສໍາຄັນຂອງພາກພື້ນ. ການຮ່ວມມືດ້ານສຶກສາພັດທະນາແຫລ່ງຊັບພະຍາກອນມະນຸດສືບຕໍ່ເພີ່ມຂຶ້ນທັງດ້ານຈຳນວນ ແລະ ຄຸນນະພາບ. ການຮ່ວມມືດ້ານການປ້ອງກັນຊາດ, ປ້ອງກັນຄວາມສະຫງົບ, ການຕ່າງປະເທດນັບມື້ນັບແໜ້ນແຟ້ນ ອັນໄດ້ປະກອບສ່ວນສຳຄັນເຂົ້າໃນການຮັກສາສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍໃນສັງຄົມຂອງແຕ່ລະປະເທດ, ໄດ້ຍົກສູງອິດທິພົນຂອງຫວຽດນາມ ແລະ ລາວ ໃນພາກພື້ນ ແລະ ເວທີສາກົນ. ວຽກງານໂຄສະນາເຜີຍແຜ່ໃນໝູ່ປະຊາຊົນ ໂດຍສະເພາະແມ່ນຄົນຮຸ່ນໜຸ່ມຂອງສອງປະເທດກ່ຽວກັບມູນເຊື້ອ ແລະ ຄວາມສຳຄັນພິເສດຂອງສາຍພົວພັນ ຫວຽດນາມ-ລາວ ໄດ້ຮັບການດຳເນີນຢ່າງປົກກະຕິ.
