ເດັກກວ່າ 5 ລ້ານຄົນສ່ຽງອຶດຫິວໃນເຢເມນ
ມູນນິທິເຊຟເດິຊິລເດັນ ລາຍງານເຕືອນວ່າ: ເດັກ 5,2 ລ້ານຄົນ ສ່ຽງຕໍ່ສະພາບອຶດຫິວໃນເຢເມນ, ຂະນະທີ່ສົງຄາມຍືດເຍື້ອຕໍ່ເນື່ອງ ເຮັດໃຫ້ລາຄາອາຫານ ແລະ ເຊື້ອໄພເພີ່ມສູງຂຶ້ນໃນທົ່ວປະເທດ.
ກຸ່ມ NGO ໃນອັງກິດມີລາຍງານສະບັບໃໝ່ວ່າ: ການຂົນສົ່ງຢຸດສະງັກຈາກການປະທະກັນທີ່ທ່າເຮືອໂຮເດດາທາງທະເລແດງ ຈະເຮັດໃຫ້ເກີດສະພາບຂາດເຂີນອາຫານຢ່າງຮຸນແຮງ. ເຊຟເດິຊິລເດັນ ລາຍງານວ່າ: ເດັກອີກ 1 ລ້ານຄົນຢູ່ໃນສະພາບສ່ຽງຕໍ່ຄວາມອຶດຫິວແລ້ວ ເນື່ອງຈາກລາຄາອາຫານ ແລະ ການຂົນສົ່ງແພງຂຶ້ນ ເຮັດໃຫ້ມີຈຳນວນລວມ 5,2 ລ້ານຄົນ. ເຢເມນກຳລັງຕົກຢູ່ທ່າມກາງຄວາມຂັດແຍ່ງລະຫວ່າງກຸ່ມກະບົດຊາວຮູທີ ເຊິ່ງເປັນມຸດສະລິມຊີອະກັບກອງກຳລັງທີ່ພັກດີຕໍ່ປະທານາທິບໍດີ ອາເບັດຣັບໂບ ມານຊູ ຮາດີ ມາແຕ່ປີ 2014. ນອກຈາກນີ້ ກອງກຳລັງທີ່ນຳໂດຍອາຣັບບີ ຊາອຸດິດ ເຂົ້າແຊກແຊງດ້ວຍປະຕິບັດການໂຈມຕີໃນປີ 2015 ເພື່ອສະໜັບສະໜູນຝ່າຍປະທານາທິບໍດີ ແລະ ກ່າວຫາອີຣານວ່າສະໜັບສະໜູນຝ່າຍກະບົດ, ຂະນະທີ່ມີຜູ້ຖືກສັງຫານໄປເກືອບ 10.000 ຄົນແລ້ວ.
