ເສີມສ້າງຖານລາຍຮັບໃຫ້ໝັ້ນຄົງໜັກແໜ້ນ

- Untitled design - ເສີມສ້າງຖານລາຍຮັບໃຫ້ໝັ້ນຄົງໜັກແໜ້ນ

- Untitled 1 2 - ເສີມສ້າງຖານລາຍຮັບໃຫ້ໝັ້ນຄົງໜັກແໜ້ນໂດຍ: ກ້ອງສ່ອງ ອິດສະຫລະ

​ເວົ້າ​ເຖິງ​ການ​ເສີມ​ສ້າງ​ຖານ​ລາຍ​ຮັບ​ໃຫ້​ໝັ້ນຄົງ​ໜັກ​ແໜ້ນ​ກວ້າງ​ຂວາງ​ແມ່ນໜຶ່ງ​ໃນ 14 ທິດ​ທາງ​ແຜນການແຫ່ງ​ການ​ກ້າວ​ເດີນ​ ແລະ ​ບຸກທະລຸໃນຕໍ່ໜ້າທີ່ທ່ານນາຍົກລັດຖະມົນຕີ ທອງ​ລຸນ ສີ​ສຸ​ລິດ ​​ໄດ້​ລາຍ​ງານ​ຕໍ່​ກອງ​ປະຊຸມ​ສະພາ. ເປົ້າ​ໝາຍ​ກໍ​​ເພື່ອ​ເຮັດ​ໃຫ້​ປະ​ເທດ​ຊາດ​ເຮົາຮັ່ງມີເຂັ້ມ​ແຂງ ​ແລະ ​ພັດທະນາ​ກ້າວ​ໄປ​ຢ່າງ​ບໍ່​ຢຸດ​ຢັ້ງ. ​ເພື່ອ​ບັນລຸຄາດໝາຍ​ດັ່ງກ່າວມີ​ແຕ່ພ້ອມ​ກັນ​​ເສີມ​ສ້າງ​ຖານ​ລາຍ​ຮັບ​​ແຫ່ງ​ຊາດໃຫ້​ໝັ້ນຄົງກວ້າງ​ຂວາງໜັກ​ແໜ້ນ ​ແລະ ​ໃຫ້ອຸດົມ​ຮັ່ງ​ມີ, ເຫລືອ​ກິນເຫລືອ​ໃຊ້.​ ບົດຮຽນ​ຂອງບັນດາ​ປະ​ເທດ​ອື່ນທີ່​​ເພິ່ນ​ຮັ່ງມີ​ເຂັ້ມ​ແຂງ ​ແລະ ພັດທະນາ​ແລ້ວ​ແມ່ນ​ເພິ່ນ​ມີ​ເງິນຫລາຍ, ມີ​ຊັບ​ສິນຫລາຍຈຶ່ງ​ສາມາດລ້ຽງ​ຄົນ​ພາຍ​ໃນ​ປະ​ເທດ​​ໄດ້ເຊັ່ນ:​ ເບິ່ງ​ແຍງ​ຄົນ​ຕົກ​ງານ, ຄົນ​ເສຍ​ອົງຄະສະສິນ, ຜູ້​ເຖົ້າ, ​ຜູ້​ແກ່​ບໍ່​ສາມາດ​ອອກ​ແຮງ​ງານ​ໄດ້ ແລະ ສະຫວັດດີ​ການ​ອື່ນໆ. ​ເພິ່ນ​ມີ​ເງິນສະສົມ​ໄວ້​​ໃນກອງ​ທຶນ​ຢ່າງ​ມະຫາສານ​ ເຊັ່ນ: ກອງ​ທຶນ​ປະກັນ​ສັງຄົມ, ຢູ່​ຄັງຫລວງ​ແຫ່ງ​ຊາດ, ຄັງ​ສໍາຮອງ​ ແລະ​ ສ່ວນອື່ນໆ. ​ໃນ​ເມື່ອເກີດ​ວິ​ກິດ​ມາ​ເພິ່ນ​ກໍ​ບໍ່​ໄດ້​ຫວັ່ນ​ໄຫວ​ຄອນ​ແຄນ ນັ້ນ​ຄື​ຄວາມ​ເປັນ​ມາດຕະຖານ​ແຫ່ງ​ການ​ຄຸ້ມ​ຄອງ​ລັດ-ຄຸ້ມ​ຄອງ​ສັງຄົມ​ຂອງ​ປະ​ເທດ​ທີ່​ເພິ່ນ​ມີ​ການ​ພັດທະນາ​ແລ້ວ.

ຖ້າ​ຈະ​ຕັ້ງ​ໂຈດ​ກັນ​ວ່າບັນດາຊັບ​ສິນ​ເງິນ​ຄໍາເຫລົ່ານັ້ນ​​ເພິ່ນໄດ້​ມາ​ຈາກ​ໃສ ? ມັນກໍໄດ້​ມາ​ຈາກ​ການ​ເກັບ​ພາສີ-ອາກອນ​ລາຍ​ໄດ້ນໍາຜູ້​ປະກອບ​ການ​ຜະລິດ, ທຸລະ​ກິດ, ການ​ຄ້າຂາຍ​ແລະ ແຫລ່ງລາຍ​ຮັບ​ໃນ​ທຸກ​ຮູບ​ແບບທີ່​ຖືກຕ້ອງ​ຕາມ​ກົດໝາຍ​ໃນທົ່ວ​​ປະ​ເທດ.

ແຕ່ເມື່ອຖາມວ່າ​ເປັນ​ຫຍັງ​ລາວ​ເຮົາ​ໃນ​ຜ່ານ​ມາຈຶ່ງ​ປະສົບ​ບັນຫາຫຍຸ້ງຍາກ​ໃນ​ການ​ສ້າງ​ຖານ​ລາຍຮັບ ? ການ​ເກັບ​ລາຍ​ຮັບ​ແຕ່ລະ​ປີ​ກໍບໍ່​ໄດ້​ຕາມ​ຄາດໝາຍ​ແຖມ​ຍັງ​ປະສົບ​ບັນຫາ​​ເລື່ອງ​ເງິນ​ຄໍາ, ການ​ເບີກ​ຈ່າຍ​ເງິນ​ເດືອນ​ໃຫ້​ພະນັກງານກໍຊັກ​ຊ້າ​​ເປັນ​ສອງ​ສາມ​ເດືອນໃນ​ບາງ​ກົມ​ກອງ ​ແລະ ທ້ອງ​ຖິ່ນ ​ແລະ ​ລວມ​ໄປ​ເຖິງ​ການ​ໃຊ້​ຈ່າຍ​ອື່ນໆ. ອັນ​ສາ​ເຫດ​ຕົ້ນຕໍ​ຂອງ​ມັນ​ກໍ​​ແມ່ນປະ​ເທດ​ເຮົາ​ຍັງ​ບໍ່​ຮັ່ງມີ, ສາ​ເຫດ​ທີ່​ບໍ່​ທັນຮັ່ງມີກໍ​ຍ້ອນການເກັບ​ພາສີ-ອາກອນ​ແຕ່ລະ​ປີບໍ່​​ໄດ້ຕາມ​ຄາດໝາຍ​​ ຍ້ອນຍັງ​ມີ​ຊ່ອງ​ຫວ່າງ, ຊ່ອງ​ໂຫວ່, ມີການ​ສໍ້​ລາດ​ບັງຫລວງ​ຢ່າງຫລວງຫລາຍ ​ແລະ ​ແຜ່​ລາມ. ຄໍາ​ວ່າ​ສໍ້​ລາດບັງ​ຫລວງ​ຢ່າງ​ຫລວງຫລາຍ ​ແລະ ​ແຜ່​ລາມ​ນີ້​ກໍ​ໝາຍ​ຄວາມ​ວ່າ ຜູ້​ຢູ່​ລຸ່ມ​ກິນ​ຢູ່​ລຸ່ມ, ຜູ້​ຢູ່​ເທິງ​​ກິນ​ຢູ່​ເທິງ, ສ່ວນຜູ້​ຢູ່​ເຄິ່ງກາງ​ກໍ​ພາກັນສວຍ​ໂອກາດ​ສາວ​ໄດ້​ສາວ​ເອົາ, ໃນການ​ສໍ້​ລາດ​ບັງຫລວງນີ້​ກໍ​ຍ່ອມ​ສະ​ແດ​ງອອກ​ໃນຫລາຍ​ດ້ານ​ ຄືເກັບພາສີ​-ອາກອນ​ມາ​ໄດ້ຫລາຍ​ຖອກ​ເຂົ້າ​ຄັງຫລວງ​ໜ້ອຍ, ​ສ່ວນ​ທີ່ເຫລືອ​ປັນ​ກັນ​ເຂົ້າຖົງ​ບຸກຄົນ​ຜູ້ເຮັດ​ວຽກ. ອັນ​ສອງມາພາກັນ​ຕັດ​ໄມ້​, ຄ້າ​ໄມ້ເຖື່ອນ. ອັນ​ສາມ​ເຮັດ​ທຸລະ​ກິດ​ນ້ຳມັນ, ທຸລະ​ກິດ​ລົດ​ ແລະ ​ທຸລະ​ກິ​ດອື່ນໆ​ບໍ່​ເສຍ​ພາສີ. ອັນ​ສີ່ບັນຫາ​ຢາ​ເສບ​ຕິດ. ອັນ​ຫ້າເກັບ​ພາສີ​ທີ່​ດິນ​ບໍ່​ໄປບໍ່​ມາ​​ອືດ​ອາດປານ​ດຶງ​ຂາ​ເຕົ່າ, ​ເກັບ​ມາ​ໄດ້​ແລ້ວ​ມັນ​ເຮ່ຍ​ມັນ​ຮວາຍ​ເຂົ້າຖົງ​ພວກໄປ​ວັດ​ແທກ,ເຮ່ຍຮວາຍ​ໄປນໍາ​ຕົ້ມ​ເປັດ, ຕົ້ມ​ໄກ່, ນໍາ​ອີ່​ໜູ​ອີ່​​​ໄໜ່ຢ່າງ​ຟຸມ​ເຟືອຍ.

- Wave100S AD to Website 2020 0 - ເສີມສ້າງຖານລາຍຮັບໃຫ້ໝັ້ນຄົງໜັກແໜ້ນ

ແຕ່​ກ່ອນ​ເຮົາພາກັນຕິ​ວ່າ​ບໍ່​ມີ​ເຄື່ອງມື​ທັນ​ສະ​​ໄໝ, ​ໃຊ້​ແຕ່​ແມັດ​ກໍ້​ຍ່າງກ່ອງເກາະ​ກ່ອງ​ກ້ອຍ​ຄັບທີບ, ​ແຕ່ມາ​ດຽວ​ນີ້ມີ​ຮອດ​ກ້ອງ​ບາ​ລູນ, ມີດາວ​ທຽມ​ຈັບ,​ ມີ​​ຮອດ​ເຄື່ອງ​ວັດ​ແທກ​ດີ​ຈີ​ຕອນ​ວ່າ​ແຕ່​ຊີ້​ໄປ​ໝ່ອງ​ໃດມັນ​ກໍ​ບອກ​ວ່າ​ກວ້າງ​ຍາວ​ໜ້າ​ພຽງ​ເທົ່າ​​ໃດ​ຮູ້​ໂລດ. ​ໃນ​ຊຸມ​ປີຜ່ານໆມາ​ເຮົາ​ເຫັນ​ວ່າ​ລາຍໄດ້​ຈາກ​ພາສີ​ທີ່​ດິນ​ບໍ່​ພໍ​ກາຍ​ເຄິ່ງ. ທັງ​ໝົດທີ່​ໄດ້​ຍົກ​ມາ​ນີ້​ມັນລ້ວນ​ແລ້ວ​ແຕ່​​ເປັນສາ​ເຫດ​ທີ່​ເຮັດ​ໃຫ້​ເຮົາ​ເກັບ​ລາຍ​ຮັບ​ແຕ່ລະ​ປີ​ບໍ່​ໄດ້​ຕາມຄາດ​ໝາຍ. ນອກ​ນີ້​ກໍຍັງ​ມີ​ຫລາຍ​ອັນຫລາຍ​ຢ່າງ​ທີ່​ມັນ​ຍັງ​ຄຸມ​ເຄືອ, ສົມ​ທົບ​ກັບຖັນ​ແຖວພະນັກງານ, ​ບຸກຄະລາ​ກອນ​​ຈໍານວນ​ບໍ່​ໜ້ອຍ​ເຮັດ​ຫຍັງ​ກໍອີງ​ໃສ່​ແຕ່​ຜົນ​ປະ​ໂຫຍ​ດ, ຫາ​ແຕ່​ຊ່ອງ​ຫວ່າງ, ຊ່ອງໂຫວ່. ສະພາບ​ເດັ່ນທີ່​ສຸດ​ແມ່ນ​​ໃນຊ່ວງ​ຫ້າ​ປີ​ສິບ​ປີ​ຄືນຫລັງຈົນ​ກາຍມາເປັນ​ປາກົດ​ການ​ຫຍໍ້​ທໍ້​​ໃນສັງຄົມເຫີ່​ກັນຊອກຫາ​​ເອົາ​ແຕ່​ດິນ, ສໍ້​ໂກງ​ເອົາ​ເງິນ​ຂອງ​ລັດ. ຫາແຕ່​ຜົນ​ປະ​ໂຫຍ​ດ​ສ່ວນ​ຕົວໃນ​ຖັນ​ແຖວ​ພະນັກງານລັດຖະກອນ​ທັນ​ໃຜ​ທັນ​ໄດ້, ທັນ​ໃຜ​ທັນ​ເອົາ. ຈາກປັດ​ໃຈ​ທີ່​ໄດ້​ກ່າວ​ມາ​ຂ້າງ​ເທິງ​ນີ້,ມັນ​ຈຶ່ງ​ກາຍມາ​ເປັນ​ບັນຫາ​ຊໍາ​ເຮື້ອ​ທີ່​ແກ້​ໄຂ​​ຫຍຸ້ງ​ເຫ​ຍີ​ງສົມຄວນ.

​ເຖິງ​ຢ່າງ​ໃດ​ກໍ​ດີ, ມາ​ເຖິງ​ວັນ​ນີ້​ມັນ​ສົມຄວນ​ແລ້ວ​ທີ່​ພວກ​ເຮົາ​ທຸກ​ຄົນ​ຕ້ອງ​ໄດ້​ພ້ອມ​ກັນ​ສໍານຶກ​ແລະ ຮ່ວມແຮງຮ່ວມ​ໃຈ​ກັນ​ກັບ​ລັດຖະບານ​ຊຸດທີ 8 ພ້ອມ​ກັນ​ຕັດສິນ​ໃຈ​ຜ່ານ​ຜ່າ​ທຸກ​ຄວາມ​ຫຍຸ້ງຍາກ​ເພື່ອ​ຄວາມ​ໝັ້ນຄົງ​ຮັ່ງມີ​ຂອງ​ຊາດບ້ານ​ເມືອງ​ໃນ​ອະນາ​ຄົດ. ​ເປົ້າ​ໝາຍ​ອັນ​ສໍາຄັນກ່ອນ​ອື່ນ​ໝົດກໍ​ເພື່ອ​ຄວາມ​ໝັ້ນຄົງ​ຂອງຊາດ,​ ເພື່ອ​ຄວາມ​ຢູ່​ດີ​ກິນ​ດີຂອງ​ພະນັກງານ, ທະຫານ, ຕໍາຫລວດ​ ແລະ ປະຊາຊົນ​ບັນດາ​ເຜົ່າ​​ໃນ​ທົ່ວ​ປະ​ເທດ.

- WhatsApp Image 2020 05 27 at 5 - ເສີມສ້າງຖານລາຍຮັບໃຫ້ໝັ້ນຄົງໜັກແໜ້ນ
- WhatsApp Image 2020 05 27 at 5 - ເສີມສ້າງຖານລາຍຮັບໃຫ້ໝັ້ນຄົງໜັກແໜ້ນ
error: Alert: ເນື້ອຫາຂ່າວມີລິຂະສິດ !!