ສະຫະພາບເອີຣົບຮັບຮອງສັນຍາ ຖອນອອກຈາກສະຫະພາບເອີຣົບ ຂອງອັງກິດ
ສະມາຊິກ EU 27 ປະເທດ ມີມະຕິຮັບຮອງຂໍສັນຍາຖອນອອກຈາກສະຫະພາບເອີຣົບຂອງອັງກິດ ເຊິ່ງຄະນະຜູ້ບໍລິຫານຂອງສະຫະພາບເອີຣົບກ່າວວ່າ: ເປັນຂໍ້ຕົກລົງ “ດີທີ່ສຸດໃນຕອນນີ້” ແລະ “ບໍ່ຄວນມີການແກ້ໄຂອີກ”.
ສຳນັກຂ່າວຕ່າງປະເທດລາຍງານວ່າ: ທ່ານ ໂດນັລ ທັສ ປະທານຄະນະມົນຕີເອີຣົບ, ທ່ານ ມອງ ໂຄລດ ຍຸງເກີ ປະທານຄະນະກຳມາທິການເອີຣົບ (EC) ແລະ ທ່ານ ມິເຊລ ບານິເຢ ຫົວໜ້າຄະນະເຈລະຈາຖອນອັງກິດອອກຈາກສະຫະພາບເອີຣົບ ຂອງ EU ຖະແຫລງໃນວັນທີ 25 ພະຈິກ ພາຍຫລັງສຳເລັດກອງປະຊຸມວາລະສຸກເສີນຂອງສະມາຊິກສະຫະພາບເອີຣົບ (EU) 27 ປະເທດ ເຊິ່ງໃຊ້ເວລາຫາລືບໍ່ຮອດ 1 ຊົ່ວໂມງວ່າ: ສະມາຊິກບັນລຸຮັບຮອງສັນຍາຖອນອອກຈາກສະຫະພາບເອີຣົບຂອງອັງກິດ ທີ່ລັດຖະບານສະຫະລາຊະອານາຈັກສະເໜີ ໂດຍການຮັບຮອງຂອງ EU ເປັນການຮັບຮອງໃນເບື້ອງຕົ້ນວ່າ: ການພົ້ນຈາກສະຖານະພາບສະມາຊິກ EU ຂອງສະຫະລາຊະອານາຈັກຈະເປັນໄປຕາມກຳນົດເກົ່າ ຄືໃນວັນທີ 29 ມີນາ 2019.
ອີງຕາມສັນຍາສະບັບນີ້, ອັງກິດຕ້ອງຈ່າຍ “ຄ່າຖອນອອກ” 39 ຕື້ປອນອັງກິດ ໃຫ້ສະຫະພາບເອີຣົບ, ການຖອນອອກຈາກສະຫະພາບເອີຣົບຢ່າງເປັນທາງການ ແລະ ມີໄລຍະຂ້າມຜ່ານ 21 ເດືອນ ໂດຍເລີ່ມຈາກເດືອນມີນາປີໜ້າ. ໃນໄລຍະຂ້າມຜ່ານ, ອັງກິດຍັງຈະເປັນສະມາຊິກຕະຫລາດຮ່ວມເອີຣົບ ແລະ ສະຫະພັນພາສີເອີຣົບຄືເກົ່າ ແລະ ບໍ່ຕ້ອງເສຍພາສີໃນການຄ້າກັບປະເທດສະມາຊິກສະຫະພາບເອີຣົບ. ສັນຍາລະບຸພິເສດວ່າ: ອັງກິດ ແລະ ສະຫະພາບເອີຣົບ ຈະພະຍາຍາມສ້າງ “ເຂດການຄ້າເສລີ”.
