UN ລະບຸປີ 2018 ຈະເປັນປີທີ່ ອາກາດຮ້ອນເປັນປະຫວັດສາດ
ອົງການອຸຕຸນິຍົມວິທະຍາໂລກ ຫລື WMO ເຊິ່ງເປັນອົງການພິເສດຂອງສະຫະປະຊາຊາດ ກ່າວໃນວັນທີ 29 ພະຈິກແລ້ວນີ້ວ່າ: ອຸນຫະພູມຂອງໂລກໃນປີ 2018 ຈະເປັນປີທີ່ມີອາກາດຮ້ອນຫລາຍເປັນປະຫວັດສາດເປັນປີທີ 4, ພ້ອມທັງກ່າວເນັ້ນເຖິງຄວາມຈຳເປັນຮີບດ່ວນໃນການລົງມືດຳເນີນເພື່ອແກ້ໄຂບັນຫານີ້.
WMO ເຜີຍແຜ່ລາຍງານກ່ອນກອງປະຊຸມສຸດຍອດລັດພາຄີຂອງອົງການສະຫະປະຊາຊາດ ຄັ້ງທີ 24 ຢູ່ປະເທດໂປໂລຍ ໃນເດືອນທັນວາ ທີ່ລະບຸວ່າ: ປີທີ່ມີອາກາດຮ້ອນຫລາຍທີ່ສຸດ 20 ປີທີ່ມີການບັນທຶກໄວ້ນັ້ນ ເກີດຂຶ້ນໃນໄລຍະ 22 ປີຜ່ານມາ ແລະ ປີ 2018 ກຳລັງຈະເປັນປີທີ 4 ທີ່ມີອາກາດຮ້ອນຫລາຍເປັນປະຫວັດສາດ ເຊິ່ງໝາຍຄວາມວ່າ: ໃນໄລຍະ 4 ປີຜ່ານມາ ຄືປີ 2015, 2016, 2017 ແລະ 2018 ເປັນ 4 ປີທີ່ມີອາກາດຮ້ອນຫລາຍທີ່ສຸດຕິດຕໍ່ກັນ. ທ່ານ ເພເທີຣີ ທາລັສ ເລຂາທິການ WMO ກ່າວກັບນັກຂ່າວຢູ່ນະຄອນເຈນີວາ ຂອງສະວິດວ່າ: ທ່າອ່ຽງເລື່ອງອຸນຫະພູມໂລກເພີ່ມສູງຂຶ້ນນັ້ນ ເຫັນໄດ້ຢ່າງຈະແຈ້ງ ແລະ ເປັນທິດທາງທີ່ດຳເນີນໄປຢ່າງຕໍ່ເນື່ອງ. ລາຍງານຂອງ WMO ສະແດງໃຫ້ເຫັນວ່າ: ອຸນຫະພູມສະເລ່ຍຂອງໂລກໃນໄລຍະ 10 ເດືອນທຳອິດຂອງປີນີ້ ສູງກວ່າໄລຍະກ່ອນຍຸກອຸດສາຫະກຳປີ 1850-1900 ເກືອບ 1 ອົງສາ.
