ແມນຢູໄນເຕັດ ໃຊ້ອັອບຊັນຂະຫຍາຍສັນຍາ ເດເຄອາ
ແມນເຊັສເຕີ ຢູໄນເຕັດ ຍັກໃຫຍ່ແຫ່ງ ພຣີເມຍລີກ ອັງກິດ ໃຊ້ອັອບຊັນຂະຫຍາຍສັນຍາ ດາວິດ ເດ ເຄອາ ຜູ້ຮັກສາປະຕູທີມຊາດສະເປນ ອອກໄປອີກ 1 ປີ ຫລື ຈົນຮອດຊຳເມີ້ປີ 2020 ຮຽບຮ້ອຍແລ້ວ.
ເດ ເຄອາ ເຊິ່ງຍ້າຍຈາກ ແອດເລຕິໂກ ມາດຣິດ ມາຢູ່ກັບ ແມນເຊັສເຕີ ຢູໄນເຕັດ ແຕ່ປີ 2011 ກຳລັງຈະໝົດສັນຍາໃນຊຳເມີ້ນີ້ ເຊິ່ງໝາຍຄວາມວ່າ ລາວສາມາດຈະເຈລະຈາກັບສະໂມສອນຈາກຕ່າງແດນໄດ້ຢ່າງອິດສະຫລະນັບແຕ່ວັນທີ 1 ມັງກອນເປັນຕົ້ນໄປ ດ້ວຍເຫດນີ້ ແມນເຊັສເຕີ ຢູໄນເຕັດ ຈຶ່ງດຶງໄວ້ດ້ວຍການໃຊ້ອັອບຊັນທີ່ມີຢູ່ໃນມືຂະຫຍາຍສັນຍາອອກໄປອີກ 1 ປີ.
ທັງນີ້, ບີບີຊີ ລາຍງານວ່າ: ເດ ເຄອາ ຍັງພ້ອມຈະຕໍ່ສັນຍາໄລຍະຍາວໃນຖິ່ນ ໂອລ ແທຣັບຟອດ ແລະ ຫວັງວ່າ ແມນເຊັສເຕີ ຢູໄນເຕັດ ຈະມອບຄ່າເມື່ອຍໃຫ້ໃນລະດັບທີ່ ອາເລັກເຊິສ ຊານເຊຊ ກອງໜ້າທີມຊາດຊິລີ ຮັບຢູ່ໃນປັດຈຸບັນ.
