ນາຍົກລັດຖະມົນຕີກຳປູ​ເຈຍ ​ຢ້ຽມຢາມ ລາວ ຢ່າງ​ເປັນ​ທາງ​ການ​ໃນ​ວັນ​ທີ 5-6 ທັນວາ​ນີ້

- PM of cambodia 1 - ນາຍົກລັດຖະມົນຕີກຳປູ​ເຈຍ ​ຢ້ຽມຢາມ ລາວ ຢ່າງ​ເປັນ​ທາງ​ການ​ໃນ​ວັນ​ທີ 5-6 ທັນວາ​ນີ້
- AGL - ນາຍົກລັດຖະມົນຕີກຳປູ​ເຈຍ ​ຢ້ຽມຢາມ ລາວ ຢ່າງ​ເປັນ​ທາງ​ການ​ໃນ​ວັນ​ທີ 5-6 ທັນວາ​ນີ້

​ໂດຍ​ຕອບ​ສະໜອງ​ຕາມ​ຄຳ​ເຊີນ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດ ຖະມົນຕີ ​ແຫ່ງ ສປປ ລາວ, ສົມ​ເດັດ ອັກ​ຄະມະ​ຫາ​ເສນາ​ບໍດີ ​ເຕ​ໂຈ ຮຸນ​ແຊນ ນາຍົກລັດຖະມົນຕີ ​ແຫ່ງ ຣາຊະ​ອານາຈັກ​ກຳປູ​ເຈຍ ພ້ອມ​ຄະນະ ​ໄດ້​ເດີນທາງ​ມາ​ຢ້ຽມຢາມ ສປປ ລາວ ຢ່າງ​ເປັນ​ທາງ​ການ ​ໃນ​ວັນ​ທີ 5-6 ທັນວາ​ນີ້ ​ເພື່ອ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ລະຫວ່າງ ລາວ ​ແລະ ກຳປູ​ເຈຍ.

ສົມ​ເດັດ ອັກຄະມະຫາ​​ເສນາ​ບໍດີ ​ເຕ​ໂຈ ຮຸນ​ແຊນ ​ເກີດ​ເມື່ອ​ວັນ​ທີ 5 ສິງຫາ 1952 ທີ່​ບ້ານ​ພາມ​ກໍ​ຊາ ​ເມືອງ​ຊະ​ຕຶງ​ຕຣັງ ​ແຂວງ​ກຳ​ປົງ​ຈາມ, ສົມຣົດ ​ແລະ ມີ​ລູກ 6 ຄົນ.

ພາຍຫລັງ​ສຳ​ເລັດ​ການ​ສຶກສາ​ຊັ້ນປະຖົມ ທີ່​ໂຮງຮຽນ​ປະຖົມ​ທ້ອງ​ຖິ່ນ​ໃນ​ປີ 1965, ສົມ​ເດັດ ຮຸນ​ແຊນ ​ໄດ້​ເຂົ້າມານະ​ຄອນ​ຫລວງ​ພະນົມ​ເປັນ ​​ເພື່ອ​ຮຽນ​ຕໍ່​ຊັ້ນມັດທະຍົມ ທີ່​ໂຮງຮຽນ Lycee Indra Devi ​ໂດຍ​ທ່ານ​ໄດ້​ອາ​ໄສ​ຢູ່​ວັດ.

​ໃນ​ປີ 1970 ກຳປູ​ເຈຍ​ໄດ້​ເກີດ​ສົງຄາມ ​ເພື່ອ​ຕອບ​ສະໜອງ​ຄຳ​ຮ້ອງ​ຂໍ​ຂອງ​ເຈົ້າຊາຍ​ສີ​ຫານຸ ທີ່​ມີ​ຕໍ່​ປະຊາຊົນ​ກຳປູ​ເຈຍ ​ເພື່ອ​ໃຫ້​ເຂົ້າຮ່ວມ​ຕໍ່ສູ້​ຕ້ານ​ພວກ​ລ່າ​ເມືອງ​ຂຶ້ນ, ທ່ານ ຮຸນ​ແຊນ ​ໄດ້​ເລີ່​ມ​ເຄື່ອນ​ໄຫວ​ໃນ​ຂະ​ບວນການ​ຕໍ່ສູ້ ​ເພື່ອ​ປົດ​ປ່ອຍປະ​ເທດ​ຊາດ ​ແຕ່​ອາຍຸ 18 ປີ ​ເຊິ່ງ​ເຮັດ​ໃຫ້​ປະ​ເທດ​ກຳປູ​ເຈຍ​ໄດ້​ຮັບ​ເອກະລາດ​ໃນ​ວັນ​ທີ 17 ​ເມສາ 1975.

ສຳລັບ​ການ​ເຄື່ອນ​ໄຫວທາງ​ດ້ານ​ການ​ເມືອງ: ​ປີ 1977 ​ເປັນ​ຜູ້ນຳ​ໃນ​ຂະ​ບວນການ​ປົດ​ປ່ອຍ​ລະບອບ Pol Pot (ລະບອບ​ດັບ​ສູນ​ເຊື້ອຊາດ), ປີ 1978 ​ເປັນ​ສະມາຊິກ​ຜູ້​ກໍ່ຕັ້ງ​ແນວ​ໂຮມ​ປົດ​ປ່ອຍ​ກຳປູ​ເຈຍ​ແຫ່ງ​ຊາດ ທີ່​ໄດ້​ຮັບ​ການ​ຮ່ວມ​ມື​ກັບ​ກອງ​ກຳລັງ​ຮັກ​ຊາດ​ອື່ນໆ ​ແລະ ​ໄດ້​ຮັບ​ການ​ສະໜັບສະໜູນ​ຂອງ​ກອງ​ກຳລັງ​ອາສາ​ສະໝັກ​ຫວຽດນາມ, ວັນ​ທີ 7 ມັງກອນ 1979 ​ໄດ້​ນຳພາ​ແນວ​ໂຮມ​ປົດ​ປ່ອຍ​ກຳປູ​ເຈຍ​ແຫ່ງ​ຊາດ ​ເພື່ອ​ຊ່ວຍ​ກຳປູ​ເຈຍ ​ແລະ ປະຊາຊົນ​ຈາກ​ລະບອບ​ດັບ​ສູນ​ເຊື້ອຊາດ, ປີ 1979-1993 ​ໄດ້​ດຳລົງ​ຕຳ​ແໜ່​ງຫລາກ​ຫລາຍ​ໃນ​ລະບົບ​ບໍລິຫານ​ຂອງ​ກຳປູ​ເຈຍ​ຄື: ປີ 1979 ດຳລົງ​ຕຳ​ແໜ່​ງ​ເປັນ​ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ, ປີ 1981-1985 ດຳລົງ​ຕຳ​ແໜ່​ງ​ເປັນ​ຮອງ​ນາຍົກລັດຖະມົນຕີ ​ແລະ ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ, ປີ 1985-1991 ​ໄດ້​ດຳລົງ​ຕຳ​ແໜ່​ງ​ເປັນ​ນາຍົກລັດຖະມົນຕີ ​ແລະ ລັດຖະມົນຕີ​ກະຊວງ​ການ​ຕ່າງປະ​ເທດ. ສົມ​ເດັດ ຮຸນ​ແຊນ ​ໄດ້​ປະສົບ​ຜົນສຳ​ເລັດ​ຢ່າງ​ພົ້ນ​ເດັ່ນ ​ເປັນຕົ້ນການ​ສ້າງ​ພື້ນຖານ​ໂຄງ​ລ່າງ​ຂອງ​ການຈັດຕັ້ງສັນຕິ​ພາບ, ການ​ໄກ່​ເກ່ຍລະດັບ​ຊາດ ​ແລະ ການ​ພັດທະນາ​ກຳປູ​ເຈຍ. ຜ່ານ​ຄວາມ​ຕັ້ງ​ໃຈ​ໃນ​ການ​ປະກອບສ່ວນ​ດັ່ງກ່າວ, ສົມ​ເດັດ ຮຸນ​ແຊນ ​ໄດ້​ພິສູດ​ໃຫ້​ເຫັນ​ເຖິງ​ສະຖາປັດ​ຕິ​ຍະ​ກຳ​ທີ່​ຂາດ​ບໍ່​ໄດ້​ຂອງ​ຂໍ້​ຕົກລົງ​ສັນຕິພາບ​ປາຣີຂອງ​ກຳປູ​ເຈຍ, ປີ 1993-1998 ​ໄດ້​ບໍລິຫານ​ປະ​ເທດ​ກຳປູ​ເຈຍ​​ໃນ​ຖານະ​ຜູ້ນຳ​ຮ່ວມ ​ແລະ ນາ​ຍົກ​ລັດຖະມົນຕີ ຜູ້​ທີ​ສອງ​ແຫ່ງ​ລັດຖະບານ​ປະສົມ​ຄັ້ງທຳ​ອິດ, ​ໃນ​ການ​ເລືອກຕັ້ງ​ເມື່ອ​ປີ 1993. ​ໃນ​ຕຳ​ແໜ່​ງດັ່ງກ່າວ, ສົມ​ເດັດ ມີ​ຄວາມ​ຕັ້ງ​ໃຈ​ທີ່​ແທ້​ຈິງ​ໃນ​ການ​ປະຕິບັດ​ຂໍ້​ຕົກລົງ​ສັນຕິພາບປາຣີ. ການ​ປະສົບ​ຜົນສຳ​ເລັດ​ຂອງ ສົມ​ເດັດ ​ໃນ​ໄລຍະ​ນີ້​ລວມມີ​ການ​ປັບປຸງ​ໂຄງ​ລ່າງ​ການ​ພັດທະນາ​ເສັ້ນທາງ​ຊົນນະບົດ, ​ໂຮງຮຽນ, ບ່ອນ​ຈ່າຍ​ຢາ ​ແລະ ສູນ​ຮັກສາ​ສຸຂະພາບ ​ແລະ ນ້ຳສະອາດ, ​ໃນ​ໄລຍະ​ທີ່​ປະຕິບັດ​ນະ​ໂຍບາຍ​ຊະນະ-ຊະນະ (Win-Win Policy) ນີ້​ໄດ້​ເຮັດ​ໃຫ້​ກຳລັງ​ຂະ​ເໝນ​ແດງ​ສິ້ນສຸດ​ລົງ ​ແລະ ມີ​ການ​ທ້ອນ​ໂຮມ​ກຳປູ​ເຈຍ, ປີ 1998 ​ໄດ້​ນຳພາ​ເອົາ​ໄຊຊະນະ​ມາສູ່​ພັກ​ປະຊາຊົນ​ກຳປູ​ເຈຍ ​ເຊິ່ງ​ເຮັດ​ໃຫ້ ສົມ​ເດັດ ຮຸນ​ແຊນ ​ເປັນ​ຮອງ​ປະທານ​ພັກ, ​ໄດ້​ດຳລົງ​ຕຳ​ແໜ່​ງ ນາຍົກລັດຖະມົນຕີ ​ແຫ່ງ ຣາຊະ​ອານາຈັກ​ກຳປູ​ເຈຍ, ​ເປັນ​ຜູ້ນຳ​ລັດຖະບານ​ປະສົມ​ຄັ້ງທີ​ສອງ ຂອງ​ພັກ​ການ​ເມືອງ​ຫລັກ (ພັກ CPP ​ແລະ ພັກ FUNCINPEC), ພາຍ​ໃຕ້​ການ​ບໍລິຫານ​ປະ​ເທດ ສົມ​ເດັດ ​ໄດ້​ນຳພາ​ປະ​ເທດ​ກຳປູ​ເຈຍ​ເຂົ້າ​ເປັນ​ສະມາຊິກ​ອາ​ຊຽນ, ​ເດືອນ​ກໍລະກົດ 2003 ສົມ​ເດັດ ຮຸນ​ແຊນ ​ເປັນ​ຜູ້​ລົງ​ສະໝັກ​ໃນ​ການ​ເລືອກ​ຕັ້ງ​ເປັນ ນາຍົກລັດຖະມົນຕີ ​ແລະ ​ໄດ້​ນຳພາ​​ໃຫ້​ພັກ CPP ຊະນະ​ການ​ເລືອກ​ຕັ້ງທົ່ວ​ໄປ, ວັນ​ທີ 15 ກໍລະກົດ 2004 ສະພາ​ແຫ່ງ​ຊາດ​ກຳປູ​ເຈຍ​ໄດ້​ເລືອກ​ໃຫ້​ດຳລົງ​ຕຳ​ແໜ່​ງ ນາຍົກລັດຖະມົນຕີ ​ໃນ​ສະ​ໄໝ​ທີ 3 ຂອງ​ລັດຖະບານ​ປະສົມ ລະຫວ່າງ​ພັກ​ປະຊາຊົນ​ກຳປູ​ເຈຍ ​ແລະ ພັກ FUNCINPEC, ວັນ​ທີ 16 ກໍລະກົດ 2004 ​ໄດ້​ຖະ​ແຫລ​ງກ່ຽວ​ກັບ “ຍຸດ​ທະ​ສາດ​ນະ​ໂຍບາຍ​ສີ່ຫລ່ຽມ” (Rectangular Strategy) ​ເພື່ອ​ການ​ຂະຫຍາຍຕົວ, ການ​ຈ້າງ​ງານ, ຄວາມ​ສະ​ເໝີ​ພາບ ​ແລະ ປະສິດທິພາບ​ເພີ່ມ​ຕື່ມ​ໃນ​ຍຸດ​ທະ​ສາດ​ນະ​ໂຍບາຍ​ສາມຫລ່ຽມ​ໃນ​ວາລະ​ທີ່​ຜ່ານ​ມາ, ວັນ​ທີ 23 ພະຈິກ 2005 ພັກ​ປະຊາຊົນ​ກຳປູ​ເຈຍ​ໄດ້​ອອກ​ມະຕິ​ແຕ່ງຕັ້ງຢ່າງ​ເປັນ​ເອກະສັນ​ໃຫ້ ຮອງ​ປະທານ​ປະ​ເທດ ສົມ​ເດັດ ຮຸນ​ແຊນ ​ເປັນ​ຜູ້​ລົງ​ສະໝັກ​ຕຳ​ແໜ່​ງ ນາຍົກລັດຖະມົນຕີ ສະ​ໄໝ​ທີ 4 ຂອງ​ສະພາ​ແຫ່ງ​ຊາດ, ວັນ​ທີ 25 ກັນຍາ 2008 ​ໄດ້​ຖືກ​ຄັດ​ເລືອກ​ເປັນ ນາຍົກລັດຖະມົນຕີ ອີກ​ຄັ້ງ ​ແລະ ​ເປັນ​ສະ​ໄໝ​ທີ 4 ຂອງ​ການ​ດຳລົງ​ຕຳ​ແໜ່​ງ (2008-2013) ດ້ວຍ​ຄະ​ແນນ 90 ສຽງ ​ໃນ 123 ບ່ອນ​ນັ່ງ​ຂອງ​ສະພາ​ແຫ່ງ​ຊາດ, ວັນ​ທີ 23 ກັນຍາ 2013 ​ໄດ້​ຖືກ​ຄັດ​ເລືອກ​ເປັນ​ນາຍົກລັດຖະມົນຕີອີກຄັ້ງ ​ແລະ ​ເປັນ​ສະ​ໄໝ​ທີ 5 ຂອງ​ການ​ດຳລົງ​ຕຳ​ແໜ່​ງ (2013-2018) ດ້ວຍ​ຄະ​ແນນ 68 ສຽງ ​ໃນ 123 ບ່ອນ​ນັ່ງ​ຂອງ​ສະພາ​ແຫ່ງ​ຊາດ, ວັນ​ທີ 20 ມິຖຸນາ 2015 ​ໄດ້​ຖືກ​ເລືອກ​ໂດຍ​ບັດ​ເລືອກ​ຕັ້ງລັບ​ຈາກ​ພັກ​ປະຊາຊົນ​ກຳປູ​ເຈຍ​ໃຫ້​ເປັນປະທານ​ພັກ, ວັນ​ທີ 15 ສິງຫາ 2018 ພັກ​ປະຊາຊົນ​ກຳປູ​ເຈຍ ​ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງດ້ວຍ​ຄະ​ແນນ​ສຽງ​ເຕັມ 125 ບ່ອນ​ນັ່ງຂອງ​ສະພາ​ແຫ່ງ​ຊາດ ​ແລະ ສືບ​ຕໍ່​ບໍລິຫານ​ປະ​ເທດ​ອີກ​ຄັ້ງ ​ເປັນ​ສະ​ໄໝ​ທີ 6 (2018-2023), ວັນ​ທີ 17 ສິງຫາ 2018 ​ໄດ້​ຖືກ​ແຕ່ງຕັ້ງຈາກ ສົມ​ເດັດ Preah Boromneat Norodom Sihamoni ​ເຈົ້າຊີວິດ​ ແຫ່ງ ຣາຊະ​ອານາຈັກ​ກຳປູ​ເຈຍ ​ໃຫ້​ເປັນ ນາຍົກລັດຖະມົນຕີ ​ແຕ່ງຕັ້ງ ​ແລະ ຈັດຕັ້ງຄະນະ​ລັດຖະບານ, ວັນ​ທີ 21 ສິງຫາ 2018 ​ໄດ້​ລິ​ເລີ່​ມ ​ແລະ ດຳ​ເນີນ​ການ​ສ້າງຕັ້ງ “ສະພາ​ທີ່​ປຶກສາ​ສູງ​ສຸດ” ​ເພື່ອ​ເປັນ​ຫລັກ​ແຫ​ລ່ງ​ແຫ່ງ​ຄວາມ​ສາມັກຄີ ​ແລະ ຄວາມ​ເປັນອັນ​ໜຶ່ງ​ອັນ​ດຽວ​ຢ່າງ​ແທ້​ຈິງ​ໃນ​ເສັ້ນທາງ​ແຫ່ງ​ປະຊາທິປະ​ໄຕ, ວັນ​ທີ 9 ກັນຍາ 2018 ​ໃນ​ກອງ​ປະຊຸມ​ຄັ້ງປະຖົມມະ​ເລີກ​ຂອງ​ສະພາ​ແຫ່ງ​ຊາດ ສະ​ໄໝ​ທີ 6 ​ໄດ້​ຖືກ​ແຕ່ງຕັ້ງ​ໃຫ້​ເປັນ ນາຍົກລັດຖະມົນຕີ ​ແຫ່ງ ຣາຊະ​ອານາຈັກ​ກຳປູ​ເຈຍ.

-    AD conten website - ນາຍົກລັດຖະມົນຕີກຳປູ​ເຈຍ ​ຢ້ຽມຢາມ ລາວ ຢ່າງ​ເປັນ​ທາງ​ການ​ໃນ​ວັນ​ທີ 5-6 ທັນວາ​ນີ້
- lattana banner - ນາຍົກລັດຖະມົນຕີກຳປູ​ເຈຍ ​ຢ້ຽມຢາມ ລາວ ຢ່າງ​ເປັນ​ທາງ​ການ​ໃນ​ວັນ​ທີ 5-6 ທັນວາ​ນີ້
- lattana banner 1 - ນາຍົກລັດຖະມົນຕີກຳປູ​ເຈຍ ​ຢ້ຽມຢາມ ລາວ ຢ່າງ​ເປັນ​ທາງ​ການ​ໃນ​ວັນ​ທີ 5-6 ທັນວາ​ນີ້
error: Alert: ເນື້ອຫາຂ່າວມີລິຂະສິດ !!