ຈັບຕົວກຸ່ມຄ້າຢາເສບຕິດໄດ້ 2 ຄົນ ພ້ອມຂອງກາງຢາບ້າຈຳນວນຫລາຍ
ເມື່ອບໍ່ດົນມານີ້, ເຈົ້າໜ້າທີ່ຕຳຫລວດສະກັດກັ້ນ ແລະ ຕ້ານຢາເສບຕິດ ປສກ ແຂວງວຽງຈັນ ສາມາດຈັບຕົວຜູ້ຄ້າຂາຍຢາເສບຕິດຢູ່ເຂດເມືອງໂພນໂຮງໄດ້ 2 ຄົນຄື: ທ້າວ ມະເລົາ ອາຍຸ 22 ປີ ຢູ່ບ້ານຫ້ວຍສາລາ ເມືອງຫ້ວຍຊາຍ ແຂວງບໍ່ແກ້ວ ພ້ອມຂອງກາງຢາບ້າ 40 ມັດ ມີ 80 ພັນເມັດ ແລະ ທ້າວ ກົວເລົາ ອາຍຸ 43 ປີ ຢູ່ບ້ານໂພນແຍງ ເມືອງເຟືອງ ແຂວງວຽງຈັນ ພ້ອມຂອງກາງຢາບ້າ 8 ເມັດ ທັງສອງໄດ້ຮ່ວມກັນຊື້-ຂາຍຢາເສບຕິດປະເພດຢາບ້າມາແລ້ວຫລາຍຄັ້ງ.
ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫລວດ ພວກເຂົາຮັບສາລະພາບວ່າ: ໃນເດືອນທັນວາ 2018 ຜ່ານມາ, ທ້າວ ກົວເລົາ ໄດ້ລົງມາແຕ່ແຂວງບໍ່ແກ້ວແລ້ວມາເຊົ່າເຮືອນພັກແຫ່ງໜຶ່ງຢູ່ບ້ານດົງໂດກ ເມືອງໄຊທານີ ນະຄອນຫລວງວຽງຈັນ ປະມານ 5 ວັນ, ຈາກນັ້ນໄດ້ໂທລະສັບຕິດຕໍ່ຫາທ້າວ ເຢຍລີ ຢູ່ບ້ານ 46 (ປະເທດມຽນມາ) ບອກໃຫ້ເອົາຢາບ້າມາຂາຍໃຫ້ຜູ້ກ່ຽວຢູ່ບ້ານດັ່ງກ່າວ ຈຳນວນ 40 ມັດ ໃນລາຄາ 1 ມັດ 2,5 ລ້ານກີບ, ສ່ວນເງິນແມ່ນຈະຈ່າຍຕາມຫລັງ ເມື່ອໄດ້ຢາບ້າແລ້ວ ມາຮອດວັນທີ 9 ມັງກອນ 2019 ໄດ້ມີທ້າວ ກົວເລົາ ມາຫາຜູ້ກ່ຽວຢູ່ເຮືອນພັກ, ຈາກນັ້ນກໍພ້ອມກັນເອົາຢາບ້າຈຳນວນດັ່ງກ່າວໄປຂາຍໃຫ້ລູກຄ້າບໍ່ຮູ້ຊື່ທີ່ລໍຖ້າຢູ່ເຮືອນພັກເມືອງໂພນໂຮງ ໃນລາຄາມັດລະ 3,2 ລ້ານກີບ, ເມື່ອໄປຮອດສະຖານທີ່ດັ່ງກ່າວຈຶ່ງຖືກເຈົ້າໜ້າທີ່ຕຳຫລວດຈັບຕົວ ພ້ອມຂອງກາງຢາບ້າຈຳນວນດັ່ງກ່າວ ເພື່ອດຳເນີນຄະດີຕາມລະບຽບກົດໝາຍ.
