IMF ເຕືອນຄວາມເຄັ່ງຕຶງທາງການຄ້າ ບັນທອນເສດຖະກິດໂລກເຕີບໃຫຍ່
IMF ຄາດຄະເນວ່າ: ເສດຖະກິດຂອງກຸ່ມປະເທດທີ່ພັດທະນາແລ້ວ ຈະມີການຂະຫຍາຍຕົວ 2,0% ໃນປີນີ້ ແລະ 1,7% ໃນປີໜ້າ, ສ່ວນກຸ່ມປະເທດເກີດໃໝ່ ຈະມີການຂະຫຍາຍຕົວ 4,5% ໃນປີນີ້ ແລະ 4,9% ໃນປີໜ້າ.
ກອງທຶນການເງິນສາກົນ (IMF) ອອກລາຍງານເຕືອນວ່າ: ຄວາມເຄັ່ງຕຶງທາງການຄ້າລະຫວ່າງ ອາເມລິກາ ແລະ ຈີນ ອາດບັນທອນການເຕີບໃຫຍ່ຂອງເສດຖະກິດໂລກ ລວມທັງຄວາມສ່ຽງທີ່ອັງກິດຈະອອກຈາກເອີຣົບໂດຍໄຮ້ຂໍ້ຕົກລົງ. ນອກຈາກນັ້ນ ຍັງຄາດຄະເນວ່າ: ເສດຖະກິດຈີນຂະຫຍາຍຕົວຊ້າລົງໃນປີນີ້ ແລະ ປີໜ້າໂດຍຢູ່ລະດັບ 6,2%.
ທັງນີ້, IMF ໄດ້ຫລຸດຕົວເລກຄາດຄະເນການຂະຫຍາຍຕົວຂອງເສດຖະກິດໂລກ, ພ້ອມທັງເຕືອນວ່າ: ຍັງຄົງຜະເຊີນກັບປັດໄຈສ່ຽງຫລາຍປະການ ໂດຍຄາດຄະເນວ່າ: ເສດຖະກິດໂລກຈະມີການຂະຫຍາຍຕົວ 3,5% ໃນປີນີ້ ແລະ 3,6% ໃນປີໜ້າ ຕໍ່າກວ່າລະດັບ 3,7% ສຳລັບທັງ 2 ປີທີ່ມີການຄາດຄະເນໃນເດືອນຕຸລາປີຜ່ານມາ.
ການດຳເນີນການຂອງ IMF ໃນຄັ້ງນີ້ ຖືເປັນການຫລຸດຕົວເລກຄາດຄະເນການຂະຫຍາຍຕົວຂອງເສດຖະກິດໂລກເປັນຄັ້ງທີ 2 ໃນຮອບ 3 ເດືອນ.
