ນາຍົກສັ່ງກວດຄືນຫລາຍວຽກໃນການຟື້ນຟູຜົນກະທົບຈາກໄພພິບັດຢູ່ເມືອງສະໜາມໄຊ

ເມື່ອບໍ່ດົນມານີ, ຫ້ອງວ່າການລັດຖະບານໄດ້ອອກແຈ້ງການໃຫ້ຄະນະສະເພາະກິດແກ້ໄຂໄພພິບັດລະດັບຊາດສົມທົບກັບແຂວງກັບອັດຕະປື ແລະ ໜ່ວຍງານກ່ຽວຂ້ອງຕ່າງໆ ກວດກາຄືນໜ້າວຽກຂອງການຟື້ນຟູເຂດຖືກຜົນກະທົບຈາກໄພພິບັດຢູ່ເມືອງສະໜາມໄຊ, ພາຍຫລັງເຫັນວ່າການແກ້ໄຂມີລັກສະນະຊັກຊ້າ ແລະ ການນໍາໃຊ້ງົບປະມານເຂົ້າໃນບາງໜ້າວຽກບໍ່ທັນມີປະສິດທິຜົນເທົ່າທີ່ຄວນ. ຕາມການຊີ້ນໍາຂອງທ່ານນາຍົກລັດຖະມົນຕີ ຕໍ່ກອງປະຊຸມສະເພາະກິດວຽກງານຟື້ນຟູຜູ້ໄດ້ຮັບຜົນກະທົບຈາກໄພທໍາມະຊາດດັ່ງກ່າວ, ຊຶ່ງ ໄດ້ຈັດຂຶ້ນໃນວັນທີ 4 ກຸມພານີ້. ໂດຍທ່ານນາຍົກລັດຖະມົນຕີໄດ້ແນະນໍາໃຫ້ເລັ່ງຊ່ວຍເຫລືອປະຊາຊົນທີ່ຍັງພັກເຊົາຢູ່ໃນເຕັ້ນຊົ່ວຄາວໃຫ້ໄດ້ຍ້າຍອອກມາຢູ່ເຮືອນພັກຊົ່ວຄາວໂດຍໄວ, ພ້ອມທັງກວດຄືນສັນຍາ ແລະ ການປະຕິບັດສັນຍາຂອງບໍລິສັດຮັບເໝົາຕິດຕັ້ງເຮືອນພັກຊົ່ວຄາວ, ຖ້າບໍລິສັດໃດບໍ່ປະຕິບັດສັນຍາກໍໃຫ້ຍົກເລິກ. ໃຫ້ກວດຄືນການບຸກເບີກ ແລະ ເກັບກູ້ລະເບີດໃນເຂດຈັດສັນຕັ້ງຖິ່ນຖານຖາວອນ ແລະ ເຂດທໍາການຜະລິດວ່າເໝາະສົມແລ້ວບໍ່ ແລະ ດໍາເນີນການຖືກຕ້ອງບໍ່ ແລະ ຖ້າເຫັນວ່າຖືກຕ້ອງເໝາະສົມແລ້ວ ກໍໃຫ້ຮີບຮ້ອນຊຸກຍູ້ປະຊາຊົນເລີ່ມທໍາການຜະລິດໃຫ້ທັນລະດູການ, ພ້ອມທັງໃຫ້ສະຫລຸບລາຍ ງານການນໍາໃຊ້ເງິນ ແລະ ຊັບສີນອື່ນໆ ທີ່ຕິດພັນກັບການແກ້ໄຂຟື້ນຟູ ເພື່ອຄວາມໂປ່ງໃສ ແລະ ມີປະສິດທິຜົນ. ມອບໃຫ້ຄະນະຮັບພິຊອບສືບສວນ-ສອບສວນ ເຈລະຈາກັບຜູ້ພັດທະ ນາໂຄງການເຂື່ອນເຊປຽນ-ເຊນໍ້ານ້ອຍ ໃຫ້ຍອມຮັບຄວາມຮັບຜິດຊອບໃນການຊົດເຊີຍຜູ້ທີ່ໄດ້ຮັບຜົນກະທົບ ແລະ ການລົງທຶນເພື່ອຟື້ນຟູເຂດດັ່ງກ່າວໃຫ້ມີປະສິດທິຜົນໂດຍໄວ.