ມູຣິນໂຢ ຕອບຮັບຮ່ວມວິເຄາະເຕະບານ ກັບໂທລະພາບຊື່ດັງຂອງຣັດເຊຍ
ໂຈເຊ້ ມູຣິນໂຢ ອະດີດຜູ້ຈັດການທີມ ແມນເຊັສເຕີ ຢູໄນເຕັດ ໄວ 56 ປີ ຮັບງານໃໝ່ດ້ານການວິເຄາະເຕະບານອີກຄັ້ງ, ຫລ້າສຸດໄດ້ຕອບຮັບຮ່ວມວິເຄາະເຕະບານກັບໂທລະພາບຊື່ດັງຂອງຣັດເຊຍ RT ຫລື Russian Today ໂດຍ ມູຣິນໂຢ ຈະມາສ້າງສີສັນຮ່ວມວິເຄາະໃນລາຍການບານເຕະ ແລະ ການຖ່າຍທອດສົດເຕະບານ ຢູຟາ ແຊມປ້ຽນລີກ ໃນລະດູການນີ້ ນັບແຕ່ຮອບ 16 ທີມສຸດທ້າຍນັດທີ 2 ເຖິງຮອບຊີງຊະນະເລີດ ເຊິ່ງຝ່າຍຈ້າງກໍຄືໂທລະພາບ RT ບໍ່ໄດ້ເປີດເຜີຍວ່າໃຫ້ຄ່າແຮງງານ ມູຣິນໂຢ ຫລາຍໜ້ອຍປານໃດ ເພາະກ່ອນໜ້ານີ້ RT ເຄີຍຈ້າງ ມູຣິນໂຢ 1.171.000 ປອນ ມາຮ່ວມວິເຄາະບານໂລກ 2018 ພຽງ 4 ວັນ.
ສຳລັບ RT ເປັນຊ່ອງໂທລະພາບຊື່ດັງອັນດັບຕົ້ນໆຂອງຣັດເຊຍ ຕັ້ງຢູ່ນະຄອນຫລວງມົດສະກູ ອອກອາກາດຫລາຍພາສາ ນອກຈາກພາສາຣັດເຊຍຍັງມີພາສາອັງກິດ, ສະເປນ, ຝຣັ່ງ ແລະ ອາຣາບິກ. RT ເລີ່ມອອກອາກາດສູ່ນາໆຊາດໃນປີ 2005 ຮັບຊົມໄດ້ 100 ກວ່າປະເທດ.
