ເມືອງຫລວງຣັດເຊຍຜະເຊີນ ຫິມະຕົກໜັກທີ່ສຸດໃນລະດູໜາວ
February 14, 2019 - 4:50 PM
ນະຄອນຫລວງມົດສະກູຂອງຣັດເຊຍ ຜະເຊີນຫິມະຕົກໜັກຫລາຍທີ່ສຸດໃນລະດູໜາວນີ້ ນັບແຕ່ຄໍ່າວັນທີ 12 ຈົນເຖິງເຊົ້າວັນທີ 13 ກຸມພາ ຕາມເວລາທ້ອງຖິ່ນ ເຮັດໃຫ້ທົ່ວເມືອງປົກຄຸມໄປດ້ວຍຫິມະໜາ.
ຫິມະຕົກສະສົມປະມານ 11 ຊັງຕີແມັດ ຄິດເປັນໜຶ່ງໃນສາມຂອງປະລິມານສະເລ່ຍຫິມະຕົກໝົດເດືອນ. ພາຍຸຫິມະເຮັດໃຫ້ການຕິດຕໍ່ ແລະ ການເດີນທາງປະສົບບັນຫາ, ການຈະລາຈອນຕິດຂັດ, ຖ້ຽວບິນຊັກຊ້າ ແລະ ມີລາຍງານອຸປະຕິເຫດຕາມຖະໜົນເພີ່ມຂຶ້ນຫລາຍກໍລະນີ, ຖ້ຽວບິນເກືອບ 50 ຖ້ຽວຕ້ອງຍົກເລີກ ຫລື ຊັກຊ້າ, ທາງການຕ້ອງລະດົມເຄື່ອງຕັກຫິມະ ແລະ ພະນັກງານ 60.000 ຄົນກວາດຫິມະອອກຈາກຖະໜົນ, ສະຖານີພະຍາກອນອາກາດທ້ອງຖິ່ນລາຍງານຄາດວ່າ: ຫິມະຈະປົກຄຸມຕໍ່ເນື່ອງໃນນະຄອນຫລວງມົດສະກູໄປອີກ 2-3 ວັນ.
