ຂະບວນລົດໄຟຂອງຜູ້ນຳ ສປປ ເກົາຫລີ ເຖິງຫວຽດນາມແລ້ວ
ຂະບວນລົດໄຟຂອງທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ເດີນທາງເຖິງຫວຽດນາມແລ້ວໃນເຊົ້າວັນທີ 26 ກຸມພານີ້ ກ່ອນກອງປະຊຸມສຸດຍອດກັບປະທານາທິບໍດີ ໂດນັລ ທຣຳ ຂອງອາເມລິກາ ຢູ່ນະຄອນຫລວງຮ່າໂນ້ຍ ໃນວັນທີ 27-28 ກຸມພານີ້.
ລົດໄຟສີຂຽວຂອງຜູ້ນຳ ສປປ ເກົາຫລີ ແລະ ຄະນະ ເຂົ້າຈອດຢູ່ສະຖານີດົງດາງຂອງຫວຽດນາມ ເຊິ່ງຕິດຊາຍແດນຈີນ ຫລັງຈາກເດີນທາງຈາກ ສປປ ເກົາຫລີ ເປັນໄລຍະທາງ 4.000 ກິໂລແມັດ ດ້ວຍເວລາ 2 ມື້ເຄິ່ງ ຂ້າມຈີນມາຫວຽດນາມ. ທ່ານ ກິມ ຈ໋ອງອຸນ ຈະເດີນທາງຕໍ່ໂດຍລົດໄປນະຄອນຫລວງຮ່າໂນ້ຍ. ສ່ວນປະທານາທິບໍດີ ທຣຳ ນັ້ນ ຄາດວ່າຈະເດີນທາງເຖິງນະຄອນຫລວງຮ່າໂນ້ຍໃນຕອນຄໍ່າວັນທີ 26 ກຸມພານີ້. ໂຄສົກປະຈຳທຳນຽບຂາວເປີດເຜີຍວ່າ: ທ່ານ ທຣຳ ແລະ ທ່ານ ກິມ ຈ໋ອງອຸນ ຈະພົບກັນເປັນໄລຍະເວລາສັ້ນໆໃນຕອນຄໍ່າວັນທີ 27 ກ່ອນຈະຮັບປະທານອາຫານຄໍ່າຮ່ວມກັນ, ແຕ່ລະຝ່າຍຈະມີຜູ້ຕິດຕາມ 2 ຄົນ ແລະ ລ່າມແປພາສາ. ຜູ້ນຳທັງສອງຈະພົບກັນອີກຫລາຍຮອບໃນວັນທີ 28. ທ່ານ ກິມ ຈ໋ອງອຸນ ແລະ ທ່ານ ທຣຳ ມີກຳນົດຈະເຂົ້າພົບກັບຜູ້ນຳຫວຽດນາມ ແຕ່ເຂົ້າພົບຄົນລະເວລາກັນ. ທ່ານ ທຣຳ ແລະ ທ່ານ ກິມ ພົບກັນຄັ້ງທຳອິດຢູ່ສິງກະໂປໃນເດືອນມິຖຸນາປີຜ່ານມາ ແລະ ຄັ້ງນີ້ກໍບໍ່ໄດ້ມີການຄາດໝາຍວ່າ: ທັງສອງຝ່າຍຈະບັນລຸຂໍ້ຕົກລົງໃນຂັ້ນສຸດທ້າຍເລື່ອງການປົດອາວຸດນິວເຄຼຍຂອງ ສປປ ເກົາຫລີ, ແຕ່ມີຄວາມຫວັງວ່າ: ຈະນຳໄປສູ່ການປະກາດວ່າ: ສົງຄາມເກົາຫລີທີ່ເກີດຂຶ້ນໃນໄລຍະປີ 1950-1953 ນັ້ນຢຸດຕິລົງຢ່າງເປັນທາງການ ແລະ ອາເມລິກາຄາດຫວັງວ່າ ສປປ ເກົາຫລີ ຈະຢ່ວງບາດກ້າວເພື່ອເດີນໜ້າໃນການປົດອາວຸດນິວເຄຼຍເປັນການຕອບແທນ.
